Friday 14 November 2008

Beiseina Nung Nen

Ka suangtuahna vak vel chu a phi ruai mai a, ka ngaihtuahna chuan hla tak a thlir a, mita hmuh theih si loh a chu, ka thinlungrilah erawh a lang chiang hle si. Rilru mumal pawh pu hleithei lo va, ka suangtuahna riang tak vahvaih lai chuan, he ka taksa hi ka hnuchhawn ta emaw tih mai turin ka sakruang chuan awmzia a nei tam lo va, a hahchawl a nih chiah loh pawhin a muhil a ni ta ve ang. A ni, mawlhtu eng emaw chuan mi tiharh tlat mai a, muttuina leh dawihlo dangten awmzia an nei lah lo. Chutianga BEISEINA Nung nei a ka awm lai chuan, ngaiteh, i puanven sawichhing la, harh ta che, engah nge i thlaphan a, i rilru i tihhah mai le.., rawn ti chiah mah suh se, ka chhia leh tha hriatna mawlmang tak chuan mi sawi harh a, mutmu pawh tuah hleithei lo va awm, kei a riang vala chu ben harhin ka awm ta a ni ber e. Chu chu hringmite min sawiharhtu darthlalang a ni a, ben harh zawh loh nih chu khawvela thil hlauhawm ber a lo ni thin si a.


A ni, he kan Zoram khawvarna lamtluangah hian beiseina nung chu a la bet ve tlat a. Natna khirh tak veiin, harsatna hrang hrang karah chaurau ek thai hial mah se, Zonu chhulchhuak Zofate tana RAM BIK a nih miau avangin, chu Zoram insiksawi hun chuan ka thinlungah hmun pawimawh ber a luah lo thei si lo. AW, Rorelna fel leh dik changchawi a enkawltu mamawh em em kan ram riangte khian chhanchhuaktu a ngai a, a rum vawng vawng mai a lo ni e. Hruaitu hlemhle takten hun lo kal zel tur thlirlawk a, Zoram tana hmathlir thui tak nena ram an hruai loh avangin kan 'Zan Ar Khawthim Dai Kal' a nih ber hi. Dikna leh Mawihawihnate chu kan vui mek a, a thei thei, a chak chak, a huai huaite lalna RAM-ah kan chantir a ni ringawt tawh a nih ber hi le. Zoram tana pa nih tling, hruaitu arsi engmawi, mahni aia ram dah chungnung zawk, hun lo kal zel tur thlira thangtharte hmakhaw ngaimi leh fefap khawpa ram tana hnathawkmi te tan hmun siam sakin, chu mi ngei chuan he Zoram hi han tuai hriam se ka va ti thin em.


Aw Zoram, tluchhe mai tur atan kan phal lo che a, tho la, ding ta che!..Baal hmaa thingthi ve ngai lo dawiburten an dawt at zawh loh darfeng valrual a za tel i tan kan la awm e, lungphang suh la, zam hek suh ang che. I tan chhuihthangval rualten suihlung rualin phaikhai kan vawr za ang a, i hliam te chu thawi dama awmin, mawina nena thuam i la lo ni chek ang. Chutin i chhungah Chhinlung chhuak Zofa hnahthlakte suihlungrualin halloten sirtiang kan sawn za tawh ang a. Chu hun chu thlira beidawng lo, Zofa Lanu/Valrualte "BEISEINA NUNG" hi lo thamral mai lo se.

17 comments:

  1. Hotupa, Zofate ah hi chuan i chiang ngawt mai, Zoram hi a nangmah hliah hliah a, i neitu hliah hliah bik hian ka hre thin :)
    Mizo Poet ah chuan ka ngaihsan Zuahliana Hla hian kan chilh zawm teh ang :)

    Damna zawngin kan au va,
    Thihna kawngah min nem liam a;
    Dikna tanin kan pen a,
    Derdepnain kawng an dal ta;
    Chakna leh theihna kan hlan a,
    Duh lovin min hawisan a;
    Hlimna par kan chawm laiin,
    An kein min rap pherh a.
    Aw kan chhuah a;
    Suan an chhuah a.
    Thu tha kan leih bua a;
    Thisen an leih bua a..........
    Dikna rah behin
    Rah hrualin awm mahse;
    Hal ral turin
    Meipuiah paih mahse;
    Dikna a thi dawn si lo


    A sei ta phian mai a :)

    ReplyDelete
  2. Zoram ah khian Baal hma a thingthi ve nagi lo mi tam tak an la awm ve ani tih hi kei pawh rinna mit in ka thlir ve thin. Houtpa i rilru leh ngaihtuah na ah hian Zoram i vei tak zet ani tih hriatpui te zinga mi ka ni ve in ka hria.

    Hman deuh khan tunge a hming ka hre tawh lo Mi pakhat hian KRISTIAN THALAI ah "Kei ni chu kan tel ve lo" tih a rawn ziak a, office eiru duh ve lo tlat te, sawrkar hnathawk pakhat an office a mi water filter chhe tawh an pu in nei tura a pek mahse In a thleng a a han en chiang a hote in a lo chhia a mah chuan a siamtha ta a, a tuk ah office ah chuan a keng let leh a, an pu chuan "ka pek tawh che kha nei ta mai mai che" a lo ti a. Ani erawh chuan "Ka pu hei hi office ta a ni a, a chhia kha siam alo harsa silova, tuna chuan a tha leh tawh a, bakah sawrkar ta a ni a, ka kawl thei lo a ni" tiin a chhang a...he tiang lam hawi mifel leh mi dik chanchin 5 vel an hming leh veng nen a rawn ziak chhuak a, khami ka chhiar atang khan ka rilru ah hian kan chhia kan in tih viau lai hian mitha leh fel tam tak langsar si lo hi an lo awm teuh a ni tih min ngaihtuah chhuah tir thin.

    Pu.Vankhama'n Rambuai hlima a phuah "Thola Ding ta che, I hliam a dam e, I tha thum te pawh a kiam e.." tia thahnem ngai taka a lo auh lawm lawm Zoram hi heng mifel te zarah hian engtik ni ah emaw chuan a ding chhuak ngei ang..mel tam kal erawh kan la hmabak si a.....

    ReplyDelete
  3. e khai Ka U , hei zet chu..tunah kan ram hruaitu ni tur/ni tawh/ni mek te ho khi... a copy sem ve ila? an chhiar a tan ka it tawp.

    He Vairampur a tang hian Zoram tang fan fan.....lo ti ve leh tawp mai teh ang.

    ReplyDelete
  4. @amuana, hotupa, i mi faknaah ka lawm e. Amaherawhchu, ka phu loh thil a ni tih erawh ka chiang a. Tin, Pu Zuahliana hla i han tarlan hi ka lo hriat ngai loh a ni a. A ril ka va ti raih raih em. Tunge sa tawh? a thluk nena neih thlap atan ka it hle mai. Sialsuk lam Laltanpuia (L) hla pawh kha nalh ka ti ngei mai.

    @azassk, Ekhai Zarbawih, i comment chhiar a manhla narawh e. Ni e, mifel tak tak leh rinawm tak tak chu an awm ngei a, mahse an lang tham tawh lo a ni ber e. Chuvangin a tam zawk khi kan dik zan tawh lo a ni ber mai. Hei Chiahpuam boruak ngeiah pawh thil dik lo leh tha lo a nih hrereng chunga ti kan tam ber a nih hmel. Engtikah tak harh ang maw le.

    @Awzzman, ka nau hi chu i thlir thui thin e. Kan politician leh officer te khian thil tha chu an hria, mahse a tha ber aiin tha ve tho nena ram enkawl an duh zawk a ni mahna.. Thang leh thar lo la awm zel tur te tana RO tling hi ngaihtuah chhuak thei se a duhawm ber mai.

    ReplyDelete
  5. Ram rorelna kawngah party ruih chilh aiin mifel leh tha duhna rilru mipuiah a intuh mek niin alang a, beiseina nung pawhin par a la chhuang ve chek ang chu.

    ReplyDelete
  6. Hotupa, chhiar a manhla hle mai..Kan Zoram khi, kei chuan a fiamthu lam zawng hian thu ka la tlangpui a. Mahse serious tak a vei tu tan chuan a hahthlak thin ngawt in ka ring :(

    ReplyDelete
  7. @Puibawiha, Ni e, tiraw, han beisei phawt ila, khawvar hun chu a la awm ngei ang chu maw..

    @luliana, ekhai hotupa, ni e, fiamthu zawnga lak chuan a hlimpui theih viau mai. Chutiang zawnga thu chheh thiam pawh a pawimawh hle a ni. I kutchhuak ho ka hlimpui thin hle mai.

    ReplyDelete
  8. Hotupa, I thuziak chuan min cho hle mai. Kan ram khi a thim zawng a thlir hi chuan khawi kil atang pawh hian a thim em em vek hian a hriat a. Nimahsela, beiseina nung nen a kan thlir a, thangthar, nu leh pa te ram hruaitute, sakhaw hruaitute lamin kan beih chuan a dingchhuak em em ang tih ka rinawm e.

    ReplyDelete
  9. Beisei na nung..... kan va khawngaih thlak thin em ti rawh... ka comment thui vak rih lo mai ang.... chhiar erawh a nuam bawn tawps..

    ReplyDelete
  10. @sekibuhchhuak, i tilawmawm e. NI e, a eng zawng ringawta thlir theih a ni bik si lo va, a thim zawnga thlir phei chuan thim ve tak a ni. Mahse khua a la varin ka ring.

    @vaiva, rawn lut fo rawh khai.

    @chhangte_ll, I tilawmawm e, hman ang zelin i lo chhiar fo dawn nia.

    ReplyDelete
  11. "Beiseina nung," a dik lutuk. Kan ram hi siamthat tlak tawh loh khawp leh hmuhsitawm lutuka kan chhuah thin em em hi chu ka lo lainat ve thin. Duhthu chu a sam mawlh lo, mahse "beiseina nung" neih hi a pawimawh ka ti ve thin.

    Ramin enkawltu tur "pa" a mamawh rualin hrin man awm "fa" a mamawh bawk, tih hi ka rilruah a riak reng bawk thin nia, hotupa!

    ReplyDelete
  12. faka, ekhai hotupa, i han tihrik zeuh "Hrin man awm FA" tih tak hi a vei awm hle a ni. Politician te tikhaw lo tu leh rilru dik lo puttirtu hi mipui kan nihna a awm chiang hle mai. Chance kan neih phawt chuan hlemhletna hi kan ngaizam thei chiang hle tih a chianna em em chu tunlai kan buaipui mek CHIAHPUAM boruak atang hian a hriat hle a ni.

    Chuvangin, thenkhatte hi chu kan ka a kua a, kan iak ve mai mai ni berin a lang mah. Mifel erawh an awm ngei e, mahse a lang pha meuh lo va, hei hian mi tha aiin mi tha lo hi mizo zingah kan tam tawh zawk tih a hriat theih a ni.

    ReplyDelete
  13. ziak tha thei thruai thruai hle mai hotupa nge nge.... BEISEINA NUNG kan neih hi Pu Thena te hian han ti alh hluai thei se kan va ti emm!!

    ReplyDelete
  14. Zorun ngei hi kan chief Minister ni zawk ta se, Zoram chuan change kan nei ngei ang mawle!!

    I ziakdik ngawt mai, beiseina nung nen lo thlir phot mai ang aw.

    ReplyDelete
  15. @wonderboy, ekhai hotupa Pu Thena hi chuan a duh tawkin min han hrual se chu mipui moral hrim hrim tan pawh taimakna leh disipilin pawh ka neih that phah viau ka ring. Tin, hmasawna ruhrel pawh mizo lo la piang zel turte tan ro tling hnutchhiah tur kan neih ka ring thin. Engpawhnise, beiseina nung nen i thlir phawt ang. Thalai zingah a ni tluka vision nei tha leh taima an lo awm thut thei bawk.

    @Amanda, umm, hotunu hi chu i tawngkam thaah kan tawlhtluk hi a hlauhawm thin ma nge aw.. Ni e, beiseina nung nen i thlir phawt ang u.. Zoramah khua a var thut thei bawk a nia.

    ReplyDelete
  16. Thu leh hla thiam nge2 ziak chu a ngaihnawm in a tha lehpek kher mai! Han comment vak ngaihna pawh ka hre lo i ziak tha ltk a... a dik a ni ti tawp mai teh ang beiseina nung nen

    ReplyDelete