Thursday 18 December 2008

SIKNI ENG

December thla kan chuankai meuh chuan thing tin par a mawi thin e tiru. Va tinreng ten partin zu an dawn a, an lenlaini an chen thin. Van boruak thiang tak karah si meikhu leh romei khu zam raih te khian boruak dangdai hun lawmawm a entir a. A ni, chhumzingin thlapui eng mawi tak mai a khuh no paw riai mai a, Thlapui chuan chhumzing chu achhun eng paw riai mai bawk a, heng thil pahnihte hi han thlir vang vang pawh hian a inhmeh zia leh a inchawih mawi tawn zia a lang a ni. Heng te hian Siamtu khuarel famkimzia leh ropuizia a puangchhuak chiang thin. Tlangsam a han par vul chuk tawh phei chuan Lal piancham hun lawmawm hi kan rilruah a lang lo thei lo thin a nih hi. Chungtiang bawkin pardang te pawh hian lung an dum a, Thinlai an hnem thin. Han hawi vel ila, masi parmawi tinreng mai a han vul chuk tawh chuan lunghlui a lenga, tu emaw ngaih em em sawi tur awm chuang hauh si lo hian, lung hi a leng veng veng mai a ni. Heng bar thla par te hian Kristmas rim an ti nam vek mai. Thingtlangah chuan Masi rim a nam ta, kan ti thin a nih kha.

Zokhaw lam atanga tu leh fate chak dap a, khawpui lam rawn pan duah duah mai te leh, naupang lawm leisak theilo nu leh pa nih hreawm zia hria ang mai a theihtawpa thlan fara hnathawkpa tih hriat ngawih ngawih leh kumpuilingleta fefap khawpa hnathawkpa hmelpu ngawih ngawih ten an fate tana an theih tawp a tha leh mawi thawmhnaw leh balloon cheimawi rawng chi hrang hrang tial vel te an han lei hawng sup sup thin phei chuan lunglamah engemaw mawlhtu awm ang hrimin thinlai a fan chhuak thin, hengte avang ngawt pawh hian Mizo Kristiante tan a siam ang hrimin masi hi a hlu bik riau a ngaih theih a ni awm e. A ni, thingtlang leh hmun hrang hrang atanga mahni khaw lam pan a bawr fahran maia inkhai thliah thliah chunga an han in seng sang sang mai han hmuh te hian SIKNI ENG hlutzia a hriat theih a. Bazar leh a chhehvela thil zuar ten Christmas sale tia an authawm ri te chuan boruak a siam a, a ti masi a ni. khawvawt lam hret si, mahse la vawt chhe lutuklo leh inchei nuam tawk leka boruak nuam chuan SIKNI ENG huntawng nawmzia a tichiang a ni.

Ram hla a u leh nauten chhungkaw kima Lal pianchampha lawm nan tiin hmuntin hmuntang atangin mahni khua leh tui ngei kan pan dem dem a, chhungkaw kim taka he hun lawmawm hi hman theuh kan duh thin a ni. Theihnise, tute pawh hian mahni vangkhuaah ngei lawi tura pan vek kan nuam awm e. Chhungkaw rual leh neinung deuhte phei chuan program mumal tak an duang leh ngei ang a, awmni khamin ran pui te talhin ruai ropui tak an kil ho leh ngei dawn si a. Heng te hi tunah chuan kan nunphung pangngai a ni tawh a, kan tihdan pangngaiah kan neih tawh a ni ber. Kan awihlai puan ang hnawlin kan in saseng dem dem thin a, chu mai a ni lo, he hun lawmawm hian mitin te rilru a ti phawklek a, nula leh tlangval ten chance tha tak an neih chu pumpelh tum hauh lova party leh picnic program an siam te chuan hun dangdai Lalpiancham hun lawmawm SIKNI ENG lo in herchhuak ropui zia a tichiang leh zual a ni. Chhungkaw tin kan phusa sang sanga, chhungkim takin ruai kan han theh thin te kha a va lo hlu em tiru. Chumai a ni lo intihhlimna hrang hrang hmangin awm ni kan kham thin hi kei chuan Lalpa malsawmna kan dawn liau liau ah ka ngai e. Naupang deuh ten thleng kan dawh thin a, Masi-pa in kan dil apiang zanah min lo thlak saka, zing khawvar hun kan nghakhlel em em thin a nih kha. Heng hun te hi naupang tan chuan a hlu a, a hlimawm a, kan naupan laia Masi kan nghahhlelh chhan pakhat a nih thin kha maw.

Chuan le! Urlawk zan kan hnaih ta deuh deuh va, hla dang a lang thei ta lo, “kum sul liam hnu kan nun ngaih lai tho leh thin, Remna Lal pian hun champha hmatianga kan thlir, SIKNI ENG mawi leh zan boruak thiang leng vel, ngaih lai tizual tur reng an maw”! Tih hla te hi mitin te thinlung luah khattu a ni ta tlat mai a, he hla tel lo hian Masi a kim tlat lo. kei zawng mittui nena ka lo chham ve fo a ni tlat. Chutah, “Kumpui sul a lo vei chang hian lunglen a tho leh thin, ngai lo leh lawm lo reng hi awm thei lo, kan ngaih Kristmas ni eng a lo zam thar leh ta” tih te chuan thinlung a ti phawklek a, mi a vel a ni ber e. kei zawng mittui tla zawih zawiha ka sak loh theih loh hla mawi a ni tlat a sin. “pawmlai nei leh lusun fate chantawk hi dawn ve teh, hnutiang mual liam hnu ngaiin an tap e. Par ang an lawm hnu, he ni ropui lo thlen hian, chhungkim dar ang lenlai kha ngai zualin, tapin luaithlipui an nul ngei ang” tih te phei chu a thu a tha mai pawh a ni lova, a thluk hian lung a kuai hrim hrim tawh a ni. Hmanlai deuh chuan tunlai ang hian Masi hla kan la ngah lo va, Music a ngaihtlak theih phei chu Pi Lalsangzuali Sailo kha a ni deuh mai a. Zanlai muttui lai tak maia ri riai riai lo lang thin pawh “ A chungnung bera chungnung, chung nung ber Lal ropui leiah hian kumkhuain rem leng se Haleiluiah” tih te “Kumhlui thlahna”Kum hlui aw¨ding rih rawh, zamual chu liam mai lo la” tih te khan lung a ti leng veng venga, tu ngaih sawi tur hre hauh si lo khan, mitinte thinlai a thawng vawng vawng thin a nih kha. Heng te hi Zofate thinlai luahtu hla mawi a ni a, kan thinlai hnemtu ani. Keizawng he hunah kher hi chuan hla dang a lang thei mawlh lo.

Kum a lo liam zel a, hmana nula tlangval thin kha an tlangval nula reng lo va, hmana putar leh pitarte kha an tar reng lo. Hnah hlui a til a, hnah tharin a thlak leh thin. Aw! hringnun hi han dawn ve vang vang mah te u! kan vul lai ni hi a rei lo lua teh a sin. Kan hringnun par vul lai hi a tawi mang e, kan dam chhung te chu ni thawnthu angin a tawp thin. Keizawng heng kan hun tawng ropui Masi hunah tal hi chuan lenrual kim taka lung duh te nen nuihiau par tlan ka nap thin. Thuro iangin thla nei teh reng ila, Kan Zotlang ram nuam, han fan del del ka nuam a, siktuithiang dawna lenrualte nen tualchai ka nuam thin. Kan hun leh ni te hian min nghak mawlh si lova, kum a liam a nga, hai ang tarin mual kan la liam tho tho dawn si. Tute mah hi kumhlun tur reng kan awm lo. pakhat temah kan awm lo. A ni, Kei chuan he hringnun hi hlim taka hman lian ka duh a, Lal pianchampha te hi chhungkaw kima len rual te nen hlim taka hman ho dial dial ka thlahlel fo. Mahse Nang leh kei hi kan duhthusam ang ngawtin kan awm thei lo a nih hi. He hun lawmawm Kristmas lo thlen apianga ka hriat chhuah lo theih loh thil a awm. Chu chu hmangaih taka min enkawltu, Naupang mai ka nih lai pawha Hnam rilru min lo tuh saktu ka zuapa a ni e. A lei hringnun lo chawlin he leiah hian hmu dawn tawh lo mah ila, nghilhni reng ka nei thei si lo. Aw, SIKNI ENG lo herchhuak e, mahse Nang ngaih a zual leh si thin. Zuapa! thlafam vangkhua lawi mai lo ni la, keini I hrailengte lawm a kim tur. He SIKNI ENG hian I hlimthla kan chantawk min ngaih tira, kan thinlai muhnu a kai tho leh thin. Aw, Nang nghilhni kan nei long che. Tia chham mai loh chu tih theih dang reng ka nei si lo.

Zofaten kumpuilingleta Tlumtea thlira kan lo thlir leh nghahfak ber kristmas leh kumthar boruak hi kan huntawng ropui ber a ni a, ngai lo leh lawm lo tunge awm thei ang? Masi hla sak tawh phei chuan lung lam a kuai a, thinlai a thawng dawt dawt mai thin a nih hi. Remna Lal hian thinlai hnem mawlh teh se. Mitin ta tur chanchintha Lal Krista lo piang kha, lawm turin Khawchhak mifingte chuan an neih ro thil hlu te kengin Bethlehem dai an pan a, Ran thleng tlawm taka nausen piang chu chibai bukin an thil hlu te an hlan a ni. Chu nausen chu khawvel chhamdamtu a ni tih an chianga, an zahzia lantir nan chibai zahawm an buk a ni. A ni, Vawiin niah hian keini Lal Isua hnung zuitute hian enge neih ro thil hlu kan neih ve le? Sum tam tak kan nei lo a ni thei e, beraw leh mora te phei chu kan nei ve kher lovang. Rangkachak leh lunghlu pawh kan nei kher lo thei. Mahse, kha nausen kha engkim titheitu a lo ni a, a ni chuan amah ringtute a thlahthlam ngai lo va, a veng reng thin a ni. Chutihlaiin kan neih ro thil hlu a phut ve tlat mai pakhat a awm; Chu chu kan thinlung a ni. Bethlehem khua ran thlenga nau lo piang Lal Krista hi a tlawm lua ma nge tiru, khawvel hian Lei leh Van Lal a nih hria se a va piang ropui dawn em. Hawh u, keini a chhandam fate chuan kan thinglungte ama hnenah hlan tharin, chibai zahawm buk turin i inbuatsaih ang u hmiang.

Pu KC.Lalvunga(L) phuah 'SIKNI ENG' Daduhi sak hian ka lung min len fo:


Late, Lalsangzuali Sailo, Krismas hla(Remna Lal a piang):

20 comments:

  1. E, hotupa thuziak chuan lung a va tileng ve le. Nia, Zoram lama hlim taka Christmas kan hman thin kha a lo nuam thinin a lo hlu teh e. Hei kan khua Ahmedabad-ah phei chuan Navratri festival leh diwali hi an festival ropui berte a ni mai a, an nghahhlelh leh chu January thlaa Kite festival hi a ni leh mai. Christas boruak chu chhete pawhin a awm lo. A ni hnaihah Mall lian deuh ah te hian sales promote nan Christmas sale engemaw an ti ve ang a a ni mai. A tha reng reng e, Krista hming lamin a awm tal a.

    Nu Zualbawihi hi a ngaihawm hle mai. Ka nu thiannu a nia. A hlate hi naupan tet atanga keini pawhina kan lo ngaihthlak thin a ni. Pawl 12 ka zir laiin holiday hmangin Aizawlah ka hawng a, a thuziak zawh hlim hlawl type chhuah sa chhiar tura min pek kha ka la hre reng. Tum khat chu an ina kan lengin a sam tan tur thu min hrilh a, ka tan hmain i en dawn nia a tia, thuthleng sei chungah a lawn a, a sam zial a thlah a, a sam chuan chhuat a la thleng tho mai. Chumi tum chuan Padma Shri a dawnte, a award dang dawnte min hmuhtir bawk a. Kha kha mumal taka kan inkawm hnuhnun ber a ni ta. Hlaphuah, zai, thuziak, etc..leh mawhphurhna hrang hrangah a inrawlh nasa em em mai a, a hun a hmang full awm hle thin mai ka ti thin.

    ReplyDelete
  2. @Maruata, a ni ngawt mai tiraw, kum 6 ngawt mizo kara ka hman tawhloh hnuin nikum kha ka han chho a, mizo society nawm zia leh kristmas kan hmandan danglam bik zia te ka han hmu nawn leh a, rilruah Mizo nih nawmna a lang vawng vawng mai a. Kan tet lai ai kha chuan tlemin an tihdan a lo danglam hret hret ve tawh a, changel hnah nena ruai hlui siam te chu an uar ta vak lo va, zai emaw a la nuam reng a, ka van duai ka ti dawn nge, ka vannei ka ti zawk dawn, ka thlen hnu reilo teah kan vengah mitthi lumen ngai vawi 3ngawt kan nei a, mahse khawhar hla sakna chance a lo ni veleh zel a, ekhai mittui tla dawn dawnin ka han zai ve alawm le. Mizote tan chuan Mizoram hi a lo nuam ber e tih hi ka hmuhdan a ni ta ber.

    Ni e, Pi Zualbawihi chu ralkhat atang pawhin kan in be fo thin a, i nu thiannu lo ni ve rengin, mi hi a duhsak ve thei khawp mai a, a lehkhabu pawh bu 3 ngawt mi rawn thawn ve vang vang kha a ni a, eng emaw avanga ka rilru a hah emaw, ka beidawn dawng chang te hian ka han be thin a, rilru hi a dam sawng sawng thin. Lehkhabu mi chah nual a, mahse, ka hawn hunah ka hawn sak ang ka tih laiin nikum khan chatuan ram min pan sa ta thut mai si kha a ni a. Rilru a na duh khawp mai.

    An inah ka han leng a, a pasalin nen mittui tla zawih zawihin a sulhnu kan fang a, rilru a na duh khawp mai. A thu hnutchhiah min chhiar sak lai phei chuan tlangval a zawnga tah ngailo tak kha ka tap ve zawih zawih mai a, Mizonu ah chuan sulhnu ngah leh nu chhuanawm nih a tling tak zetin ka hria. Ka ui bang thei lo.

    ReplyDelete
  3. ka chhiar tha ang nakinah :-) in va inchhang deuh ve a.. ka tran leh ka tran.

    ReplyDelete
  4. tun Christmas chu a khohar thlak leh don mange aw..haw leh theih don si loh

    ReplyDelete
  5. Mizoram chhuah ka chak phah vek mai e.. ka chhuak dawn bawk a..ka inthei bawn!!! hehe...I ziak ngaihnawm lehpek ltuk..

    ReplyDelete
  6. Thanks Puii, i lo tlawh fo dawn nia aw.. remchan ang zelin..:)

    Ni e tiraw B-te, keipawh lung a leng lawk khawp mai.

    Sir Sawmpuia, ni e, remchan ang zelin le..:)

    ReplyDelete
  7. hotupa chu naupan lai min ti ngai alawm maw le...

    kan naupan lai a lar thin, siampuii sailo, Lalsangzuali sailo , te kha nikum ka haw chuan an zai tir ri ka hre ta mang hauh lo mai!!

    ReplyDelete
  8. Ngaihnawm khawp mai, kan naupan lai a massi kan nghahhlelh theihzia te, kan dawhthlak tur hriat chaka chhungte'n an thuhruk na niawm a kan rin pakil kar a kan vah kual chiam a, phur thak kan kai tak chiam tumte pawh min ti hrechhuak a lawm.

    Han ti daih ila i thuziak hi Krismas kan hmuah dan chungchang vel a i ngaihdan chiang leh zualin han chhunzawm thei la chhiar a va chakawm ve le :)

    ReplyDelete
  9. @hotupa (aka -avena) ni e tiraw, kei chu ka bengah chuan Siampuii kha a la tha ber a, kumhlui thlah nan erawh Lalsangzuali sak, kum hlui aw ding rih rawh, tih khan thinlung ala hnen ber awm e. Nikum kha Lalruotmawi Kristmas hla vel te an play nasa a, ka lung zu tileng zo hauh lo va.

    Tin, tunlai thluk leh rimawi a an siam ho Kristmas hla thu fahrah te te hian ka lung a len hlei theilo va, Kristmas pawh beisei angin ka han hmang ta lo a ni.

    @amuana, ekhai, thu leh hla hi ka thiamlo lulai em a, i han sawi ang chi hi ka tlin ve ngut emaw chu, nangni zawk hian han keuh tlu ta zawk ula, keinin thiam ang tawkin lo tuihnih ve ila, a tawk lek lawng maw te ka tia. Mahse, hotuten in tih tlat chuan kan NO ngam nang maw..:)

    Thleng dawh sawi takah chuan kan chhungkua hi kan ching khawp mai a. Ka hriat phak chinah lian tak ka nih thleng khan kan la dawh thin a. Thil tha ve tak mai chu, Thleng kan han dawh khan, kan duh, kan nu emaw pa emaw ten dil ula, an tih ang chin kha kan han dil a, uluk tawkin kan han tawngtai kha a lo hlu ngawtin ka hria. Ka nu hian artui hi a uar ve hrim hrima, engpawh dil ila, Artui hi chu dil loh hian a lo awm ve leh ziah thin a. Ka han ngaihtuah let hian nuih te pawh a za lek lek thin.

    ReplyDelete
  10. Hmmn... Krismas lam hawi hman ka la nih loh teh lul nen i post ka chhiar a, min ti buai riau mai. A ngaihnawm mai a ni lo va, Mizoramah min haw pui a, kan ngaih em2 kan ramah ngei Krismas min hmuah tir a ni ber e!

    Hetia Krismas a lo thlen dawn a, kan ram lam kan ngaih em2 lai hian anni ve thung erawh chuan 'Aw Bethlehem ka ngai a che..' te kha an lo ti daih ang a! Mahse Vairengte la pel uuk lo pawh Bethlehem leh Palestina rama Berampute min ngaih tir daih thin tu hi eng dang a ni lo, AMAH, min tlan tura lo pianga kha...!

    Krismas chibai chu la inbuk rih lo ang aw...

    ReplyDelete
  11. @mafaka, ekhai, i rawn leng lut a, a lawmawm hle mai. Kristmas hawn i tum meuh bik lo a va ang em? awmhmunah Lal chibai kan buk ho a niang chu tiraw.. A ropui em a sin.. rawn leng lut fo dawn nia..

    ReplyDelete
  12. Daduh`in Sik ni eng tih a sak hi chu eng hunah pawh nise ka lung hi a ti leng thin khawp mai. Zoram pawn lam atang phei chuan a lunglen thlak zual te hian ka hre thin.

    ReplyDelete
  13. @rotlingpa, ekhai, va tiropui ve..welcome.. ni e he hla hi ka duh thei khawp mai a, hei dula zarah en pahin kan ngaithla thei a, lawmawm khawp mai.

    ReplyDelete
  14. ram pawnah hian christmas hi vawi 1 mah ka la hmang ve lova, hman tumna rilru la ka la nei lova, hmang turah pawh ka la indah phal lo. ka thianpa pawh hi a haw vang vang zel. Zorama u-ama nuam ka tihzia chu in hrethiam ang chu maw???

    ReplyDelete
  15. @rka, ekhai, a ni khawp a sin, ram pawn leh chhung chu inthlau tak a ni. Naupan lai ngaiin kan chiau reng mai a nih ber hi. Kristmas kher hi chu chhungkaw kim taka han hman ho dar dar hi a chakawm a, a lo hlu em em bawka, hun lo kal zel tur kan hriat lawk loh avangin kim taka hman theih reng pawh a ni lo va, a theih hram chuan chhungkim taka hman hram hram hi a tha ngawt mai.

    ReplyDelete
  16. Hnam dang karah zawng ka Krismas ve thei tak tak thin lo.
    Kan thu leh hla hmanga kan Krismas-na ringawt pawh hi lunglena kurpuina tham chu a ni ve reng reng maw!!

    ReplyDelete
  17. Hotupa chu bei lunglen thlak hle mai a. Khawhar deuh a Mas hun a awm te pawh hi a tha a niang e, post ngaihnawm tak tak te a hring chhuak a. Flight miss vang te pawn a dang tha tak te han chhuak leh se :) Chuan kei mi phunchiar hian ka lo ngaihtuah ve mai mai chu, sentence thenkhat hi hei ai hian tawi ta hlek se, a sipel chawpa chhiar keini ang tan chuan chhiar a va nuam leh zual dawn em... te ka tia! Tluang deuhin i ngaih Zoram chu i rawn thleng thuai dawn nia.

    ReplyDelete
  18. Zoram lam atng pawhin blog chu la ngaipawimawh reng maw.. tha ltk tlat! kumthar chibai le tlai tawh hle mahse. Chhuak thei lo tan chuan tih ngaihna vak pawh awm lo a nih ber mai hi :)

    ReplyDelete
  19. I like your post. It is good to see you verbalize from the heart and clarity on this important subject can be easily observed... Chip Eng Seng Developer

    ReplyDelete