Thursday 15 November 2012

Nghilh ni awm lo Zuapa

Hmanni chu ka pa nausen laia a Baptisma chanpui ka nu Lalduhi hian Synod Gallery-ah a Baptisma channa Certificate a han dil a, an ni'n phal takin an zawnpui a, File pakhat hlui tawh tak vawikhatmah la hawn leh loh tih hriat zet mai an han keu chu a indawt chiah mai hian ka dawtah chiah hian i pa baptisma channa certificate ka hmu hlawl mai chu ka mittui a va tla nasa em... tiin min rawn hrilh vang vang a.. Rambuai avanga kangral tura ngaih leh rilru pawhin a ngaihtuah tel tawh loh ka pa baptisma channa daih mai min han hrilh chu ka rilruah kum 7 mi lek ka nih laia hmangaih taka kan thlah liam ka pa chu thinlaiah a lo thar leh thin. Ka va ngai thin tak em....

 Ka pa hian Zoram tan zalenna sualin ramhnuai lama nun a thlang a, an eiin that loh luatah pum lam that lohna a vei a, chu chu zual zelin a thihpui ta hial a ni. A thih hnuah a thianpa Captain Lalleha Tlau, Aizawl Electric Venga mi (Khawkawn khawchhuak) min hrilh ka la hriatreng chu; CRP hovin min hual a, kan Silai mu neih ang ang kan kap ral vek tawh si a, inpek ngawt kan duh si lo va, chawlhkar thum dawn lai mai chu ramhnuaiah a awm awm ringin kan khawsa hlawm a, Eitur lah nei tawh hek lo, Balhla kung te pawh kan ei fai vek tawh a, a hnuah phei chuan Zapanhlo zikno te kan ei tawh mai mai a, tlema pumpui chak lo deuh phei chu an pum lamin a tuar lo va, damdawi kan nei bawk si lo va, kan sepui ruah do tlawk tlawk a ni ber a. I pa phei chuan pum nat a nei a, a na a chhuah chang phei chuan a vial ngawih ngawih zel mai a, a mittui a tla zawih zawih a, kan khawngaih thei hle a, mahse ka tha veleh mai ang, a ti zawi sap a, tlawmngai takin a awm ve zel a.

Vawikhat chu chutia mangang taka kan awm lai chuan CRP ho chuan rawn luhchhuah an tum ta a, an thlen chin apiang an hal khu hluah hluah zel mai tih report kan dawng ta a, keini pawh chu kan sahimna zawnga kan tlanchhiat mai a tul ta a, chutia hmanhmawh taka kan tlanchhiat lai chuan i pa pumna a chhuak a, a sawi chhuak duh si lo khan amahin a tuar tlawk tlawk hi a lo nia, a tawpah a kal thei tawh lo chuan midang tihbuai hreh luatah a mahin a lo bibo hi a lo ni a. Kan tam tham deuh avangin kan zinga a kal ve reng emaw ka ti a, kan han chawl zawk chu, i pa hi ka hmu ta lo va, engtiziange tiin ka han zawt hlawm a, tuman an hre si lo va, tichuan ka hote chu tikhan lo han kal ula, ka va zawng ang e, tiin a rang thei ang berin ka let leh ta a.

Vai sipai ho thlen chin chu a khu ngeinguai mai a, tichuan chiang taka ka biak hnuhnung berna bul velah chuan ka han au a, Thingkung atang chuan a rawn eih thei hram a.. Engtiziange ni tiin ka han zawt a, a ni chuan, ka kal thei ngang tawh si lo va, midang tihbuai che u ai chuan heti hian ka theih ang angin ka lo bibo mai ang chu ka ti a, a tia. Kan han inpaw chho chu hnung lamah min um bawk si.. kei aiin a sang fe mai si a..a ke hian lei a hnuk a, Silai pakhat ve ve kan la ak zui nen, hlauhthawnna nen chuan ni lo se, ka paw zo hauh lovang a, tunhnua ka ngaihtuah leh hian ka lo va chak e aw ka ti thin a, tin, va zawng leh lo ila chu CRP ho khan an thah loh pawhin an sawisa viau ang.. a ti a. Kan pate hunah khan an mahni theih ang tawk ram leh hnam tan tiin an lo penchhuak ve kha ka ngaihtuah let hian hlu ka ti a, nunna thap hial khawpa ram tana inhlan pa ka nei kha a nunna tawi phah hial mah se, ropui ka ti a, ka va han tluk lo tak em, ka tih ngawih ngawih chang a awm fo thin.