Tuesday 21 October 2008

Kum Sarih Liam Ta

Kum 2001 kum kha a ni a, kum tawp Pawltlak thla a nih tawh avangin chu ramah chuan nichhuak eng reng hmuh tur a awm tawh si lo. Zing Khua lo varin kawl a lo eng a, ni chhuak eng mawi hmuh hmain zan mut a lo hun leh mai thin. Han hawi vel ila, vur tla lah chu lapua ang maiin van atangin a tla pheng phe leu suau suau mai reng bawk si. Ngaiteh, electric eng tih loh chu eng dang reng hmuh tur a awm si lo. A ni, hringfate hun chhiar danah chuan Krismas hun ropui a ni tawh a, Zoramah chuan chhungkaw kokim takin an awmho dial dial ang tawh ngei ang a, vengtinah inkhawm dar a ri mang mang tawh ang a, thiani te, thiana te inkhawm turin kan in sawm sap sap tawh awm si a tiin ka sana leh calendar chu ka enkawp fo thin. Radio ka han herhhawng a, chutah leh Fernando tih hla ABBA ho sak kha, a rawn zai chiah mai phei chu ka lung a va leng chiang kher em. A hnuah Elvis hla Blue Christmas tih ten a rawn chhunzawm a, chutih laia ka thinlung chu hmu thei ila, a hnim ruihin ka ring hial. Chu khawpui chu Sweden khawpui pahnihna Gothenberg dai pawn a ni a. Thlasikah chuan ni eng hmuh tur a awm ngai lo va, khua a rawn var a, rei rial lovin thimin a rawn nang nghal deuh mai thin a ni.


December ni 24 zan chu thianza hovin Jail tlawh ila, thil pek te kan theih ang ang keng bawk ila tiin rem kan ruat ho va. Chuta sak atan tiin hla pawh kan thiam ang ang kan zir ve bawk a. Kan hla zir lai te chuan kan zai thangkhawk ri chu ram reh tak khawpui daipawn feah chuan a lo ring duh ngang mai. Silent Night ngei mai phei kha chu mittui tla pura lo sak pui a awl kher mai. Lung a lendan leh a mi deh dan pawh a dang zar mai a. Eng emaw changa motorin vur a chil ri ser ser bak chu ri dang hriat tur a vang teh a sin. Eng emaw chang chuan Lalpa engatinge hetah kher kher hianin mi awm tir le tih mai pawh awl tak a ni a. Ka lung hi a zing nitin a, hlim taka nuih har har pawh awlai lo tak a ni. Mihlim thei ve tak nia ka inhriatna te pawh he hmunah kher hi chuan an tawmbo vek a nih loh vek pawhin an hrisel ta lo a ni tal ang.


Tichuan, ruahman ang ngeiin kan awmna atanga darkar 2 tlan zeta hla Jail hmunah chuan Car 3 meuh kengin kan in zui chhuak ta dal dal hlawm a. A then kalkawngah an zai a, a then an titi bawrh bawrh bawk a. Kei erawh lunghnurin ka mittui a parawl kuang mai a. Ka suangtuahna te pawh chu kan Zoramah a thlawk delh delh a ni berin ka hria. Ka thiante, ka unaute , kan thenawm khawvengte leh kan kohhran thlengin mitthlaah an lo lang zut zut mai a, ka thiante hi USA, England, Denmark, Holland etc.. atangte an ni hlawm a, Kristmas an hmandan pawh a inzul hlawm deuh vek avangin an ti ti pawh a rual phian a, hmun fianrial leh khawhar tak pawh an ni tan chuan nunphung pangngai a ni mahna, engah vak an ngai lem chuang lo. Chutia Zo taka kan kristmas hmandan te ka suangtuah neuh neuh lai chuan Jail chu kan thleng ta a, sawi tawh angin Vur atam em avangin kalkawngah kan buai lek lek chang lah a tam. Chuvangin a hun takah kan thleng chiah lo na a, Jail chhungah chuan kan lut thei ta tho a, Jail tang te an rawn chhuak a, Inkawmhona hun reilo te kan neihpui hnuah kan hla neih ang ang te kan sa a, Jail tangte hi an hmel atang chuan pa hrisel hmel pui pui leh sek tel tul deuh vek mai an ni hlawm a. Tam tak chu an sual vang renga tang pawh an ni bik kher lo mai thei a, vanduai vang liau liaua Jail bang zut te pawh an awm thei e.


Amaherawhchu, heng ho hian nupui fanau an nei ve ngei awm si a, he hun hi engtin tak ngaihtuah ve ang maw? an chhung leh khatte ngaiin an lung a leng ve viau ngei awm si a tih ngawt chu ka rilruah a lo lut thin a. Kan ruahman angin kan hla sak turte kan sak zawh hnu chuan thilpek kan ken ang ang te chu hlanin kan hawng leh ta vang vang a. Tichuan, December 24 chu mahtea laikhum belin zan dar 12 ah ka mut san ta daih zu nia.. Kum a zawnga ka kristmas hman loh ber kum a nih rualin kum a zawnga ka kristmas hman that ber kum erawh a ni lawi si. Kum kha leh chen Kristmas ka lo hmang ve tawh thin tak na a, Jail tang te tan vawikhatmah ka la zai ngai lo va, thilpek ka hlan lah ka hre hek lo. Chuvangin kristmas ka hman liam tawh zawng zawngah inchhirna tur han sawi tur reng a awm lo va, tunhnu hian ka ngaihtuah let changin ka hlim veng veng thin.

17 comments:

  1. E khai hotupa, i va ti lunglenthlak tan ve hei! Ni e, midangte tana inpekna hun atana krismas hman hi 'krismas spirit' dik tak chu niawm tak a ni. Pathianin a fapa min pek na ni kha a ni miau mai a.

    Thlasik a thaw tan a, lung a leng zual hle. Tun Inrinni atang hian sana pawh herh danglam a ngai dawn ta reng mai hotupa!

    ReplyDelete
  2. E khai pu ber chu, zofest puipa lo zuk ni reng che a!! Pu hriata te inah khan kawmna chang kan lo hre lo che kha pawi kan la ti khop mai. :-)
    Masi te chu ilo va hmang tha bik thin ve. Nia, masi hi chu a huau2 zawng nilo, midang tanpuina hun atan a hman dan in zirtir theih a tha khawp mai.

    ReplyDelete
  3. @faka, hotupa, i dam a? ka email i hmuh ka lo ring ngawt a, mahse hei ni 4 vel hnuah a rawn let leh nia mawle, a mak ngawt mai. Ka rawn ti tha leh mai ang e. Inrinni zan chu darkar 1-in kan mu rei thei dawn a, am takin i mu ang aw..:) Sap ram thingtlang hi chu heng Kristmas vuakvetah hi chuan a khawhar thlak ngawih ngawih a ni ber e.

    @wonderboy, ekhai, mi rawn tlawh a, ka va lawm em. Kum 2006 Zofest ah khan, in lo awm tawh ngei tak ang a, inhria ila, kan han inzui ho dial dial tur. Lalpahriata te Inah khan, ka motor rui a la reh lo va, a khat tawkin ka luak zauh zauh reng a, a va hreawm e aw.. Mizo nula leh tlangval ho kha in fel hlawm ka ti hle mai. Khami zana in zanriah buatsaih te kha a tui hle mai. Motor rui miah lo phei ila chu ka ei tam ngawt ang. Muanpuia, Dave, David M.Thangliana te ho nen khan, kan rawn chuang ho va, Meizial, sahdah, Kuhva etc.. nen min han ur tak tak mai kha a ni a, ka thi lo chauh a ni ber e..:) ka sim ngei mai.

    ReplyDelete
  4. hahaha hotupa chu leh!! lungleng overnessss! luangliam bawrh bawrh nesss!

    :D

    Min ti lungleng zo ve vek a lawm le!!

    Tu sak nge kha... "trying to remember, a house thats not a home... trying to remember, christmas all alone... I just break down, when I look around... pam pam pam pam It will be lonely this christmas, without you to holdddd" tih nen i in hmeh bawn tawp tunah tak hian!!!! :)

    eeee rawn online la, kan titi hrep dawn nia hotupa. tikhan lo lonely mai mai tur a ni hlei nem :)

    ReplyDelete
  5. Krismas i hmang thra trangkai hle anih chu. Guitar lah chu i neih thrat hmel si, guitar thiam hi a nuam awm bik!

    ReplyDelete
  6. Hotupa nge nge lungleng awm leh pek hle mai...kan khaw lam hi chu thlasik kan nei ve vak lova..!!

    'ka lunglen tuar zo lo chhawl ang ka uai
    Tu zun ah nge chhuihthangvala ka uai
    A len hian a leng thin zunzam cham phei"..tih hla hi kan thlan sak ve ngawt mai teh ang che :)

    ReplyDelete
  7. Christmas hman dan dik tak a nih chu.... a hun lai tak kha chuan i enjoy kher lovang, mahse kristmas awmzia diktak a dik takin i hmang tih lo hre zel dwn nia.. Midangte tana thiltha tih te, tanpui ngaite tanpui theia awm te leh khatiang tih duh na rilru neih te kha thil ropui tak leh Christmas in a a tum diktak pawh a ni e... keini pawh hian zir ve thei zel ila a tha khp mai... chuan maw i 2nd pic a vur khi a mak ka ti tawp.. road ah khian engmah snow them pawh a kai silova an chho vek bawk sia.. a nalh top..yet kinda strange..

    chuan tunkum chu i lung a leng tawh dawn loh kha... ehemmhemzzz :)

    ReplyDelete
  8. A ngaihnawm dap dap hle mai!!

    ReplyDelete
  9. Hotupa, chhiar pah ringawt pawn Zoram chhunga thu luau chung hian kan lung a lo leng ringawt a lawm le. Nang hi thu i thiam hle mai. Tin, i thuziak hian min cho hle bawk, Ni e, kan Christmas hman dan hi tuna phei chuan giving lam ai chuan receiving hi kan uar mah mah a, inzir tur kan ngah hle mai. tin, tun Christmas chu i mal tawh loh ngei ka ring :)

    ReplyDelete
  10. Krismass rim a va nam nasa tawh bik ve helaiah chuan.

    I thuziak hi a tha khawp mai. Bethlehem rim nam reng renglo a inbawk hran a, khawvawh vanga in kuah deuh chil chial a, a then lirthei a an chet sual lai a, a then khum laizawla lo chetsual te hi krismas ta riau zawk hian kan hre thin, chuvangin, Lalpiang chibai buk tum inti zofa tam takte hi chu Kaisar-a lal ramah kan tap a, tlem a kal thui deuh inti te chuan Jerusalem ah Bawkte an khawh tawk anga, nang erawh chuan hemi kum a i krismas hman danah erawh hi chuan Ran In i thleng chiang ani tih ka sawi ngam e :)

    ReplyDelete
  11. Masi hi chu aw Mizo te tan hian a hlu chuang bik thin hian ka hria. Kan awmna lamah pawh hei tun apang in "Krismas ah i haw dawn em?" "In khua/veng ah a mi i hman dawn?" etc tih vel kan in zawt ngun ta malh malh hle mai.

    Zo taka thlasik khawvawt hnuaia mahni hmun ngeia Krismas hman loh tluk zeta nuam lo hi a tluk pui avang ve khawp asin!

    ReplyDelete
  12. @illusionaire, ekhai pu sandman, i hla rawn sawi hi nalh ka ti dawn riau mai, a dang i la thiam em...? Ni e, remchangah kan la in be dawn nia, lunglen biahthu kan inhrilh a niang chu tiraw, tlangval hmeltha leh zei tak hnen atanga nula bem dan te pawh zir ve kan mamawh lo bik lo va..:)

    @mesjay, chibai, i rawn lenglut a, ka lawm hle mai. Ka guitar hi maw, neihlungkhawnga ka neih ve hram hram a ni e.. Tu tihdan deuhin ka ro a nih hi..:)

    @ekhai hotupa, i hla rawn tarlan hi Ramnghinglova hla kha a ni lawm ni? tleirawl laiin kan sa nasa thin khawp mai. Ka lunghnem an awm lo, bazarah pawh..tih nen ka han chhunzawm ang e..:)

    @puii, ka nau hi chu i fel thin mawle.. ni e, Kristmas hmandan dik tak tur ni zawk awm tak a ni. Mahse, a awl lo hle thung a. Mahse, thil tha tih hi chu inchhir awm loh tak zawng a ni ngei mai. Isua zarah.

    @amanda, welcome em em, i rawn lenglut fo dawn nia, ka lawm em em bawk.

    @DayDreamBeliever, hotunu i mi faknaah ka lawm hle mai, a tak tak han ni phei se chu a va ropui dawn em tiraw.. 2006 kum kha aizawlah ka hmang a, ka lung a leng ru riau tho nia mawle.. naupan lai kha a lo nuam ta berin ka hria.

    @amuana, hotupa hi chu naupang hmuia chithlum tah dan tawk hi i thiam mawle.. i comment ka chhiar hian ka luangliam thelh zu nia..:) Ka lawm em em e.

    @azassk, zarbawih, a ni ngawt mai tiraw.. tu pawh bia ila, Kristmas hmanna tur hi kan inzawt deuh zel chu a nih ber hi mawle.. a ropuina lam aiin kumkhata kan boruak insiksawina hun pawimawh ber a nih vang pawh a ni thawkhatin ka hria.

    ReplyDelete
  13. Hi, do you write in English, too? If you do, please let us know the issues that you would like the political participants to take note of during the forthcoming elections in your state.

    Get in touch with me at:

    hemraj.singh@merinews.com

    We would like you to be part of an ever-expanding community.

    Be our eyes and ears in your state.

    HemRaj Singh
    Content Manager,
    Merinews

    hemraj.singh@merinews.com

    ReplyDelete
  14. Hei chuan lung a van kuai ve aw! Masi dik tak zawk in hmang ani tih kei chuan ka pawm thlap mai.

    Hetiang ang hawia hman zel hi tum ila Zoram lamah te pawh hian atha hle awm si a.

    ReplyDelete
  15. This comment has been removed by the author.

    ReplyDelete
  16. e khai va ngaihnawm ve le..!! ramthim ah kan awm lai min ti hre chhuak rum rum a lo`m le... khatih hun lai kha chuan veng lamah hman ka chak thei si..Big Boss khan phal si lo...meitei ram riang tawk ah meitei tawngin X-mas kan hmang ta thin anih kha...mahse tun hnu ah kan ngaihtuah let chang hian...rinna a ka unaute ho khan engtin takin x-mas hi hmang ve tawh ang maw? an zingah hman ka thlang tawh zawk ngei anggggg.

    ReplyDelete
  17. @HemRaj Singh, thanks for your visit. Ya, let me think about it.

    @Sekibuhchhuak, ni e tiraw, Kristmas hi a hmandan tur dik tak hian kan lo hmang ngai miah lo zawk ni ta berin ka hria. I hrechiang ngawtin ka ring ta.

    @Awzzman, ekhai naute hi chu in fel thin hle mai. Meitei kara Kristmas hman chu a dan a dang zar tak ang a.. I pa missionary a ni thin tihna a ni ang a. A ropui hle mai a. Chutiang vel chu report rawn ziak teh khai.. harsatna tam tak in tawh chang a awm awm si a, a ngaihnawm dawn em a sin.

    ReplyDelete