Friday 9 May 2008

Chunchawi (Mother's Day)


"Chun'nu Lunglawm kim nan, ka neih rohlu hmangaihna hlan let ve nang e! Run timawitu Ka Nu kiangah chuan a hrailengten nui hiau par tlanin hlim zai kan vawr thin! A ni, a hmangaihna chuan a fate hrui angin min phuar tlat a, a rilru leh suangtuahna chenin min tuam thin. Aw, he ti em a hmangaihna ril hian a ni maw a fate min lo hmangaih le, keizawng sakhming chullo ka chun'nu nunnemi hriatreng nan nghilh loh par hlan zel ta nge!"

He ni pawimawhna hi sawi teh chiam ngailova hrethiam mai turah in ngai ila; Hringmi kan chan chhunga kan nun tidanglam theitu leh tikhawlo theitu chu kan nu te hi an ni a. An rilru puthmang a zirin an fanaute kan felin kan sual thei a ni.

Khawvel missionary ropui leh communist kulhbang su tlanga Lal Isua chanchintha hriltu pa huaisen leh dik 'Krista Tawrhna' (Tortured for Christ) tih lehkhabu ropui ziaktu Rev.Richard Wurmbarnd te chuan "Ka nu ang hi khawvela nu zawng zawng te hi ni teh reng se, khawvel hian Tanin(Prison) a mamawh lo tawp ang" a lo ti hial mai a ni.Tin, Khawvel doctor hmingthang leh lar tak Siamese naute phir lu inzawm tlatte pawh dam biai a zai saktu leh miin 'Gifted Hand' tia an koh hial Dr.Benjamin Carson, MD(Pediatric Neurosurgeon) chuan 'ka nu hi tuna ka dinhmun min hruaithlengtu a ni a, a mi enkawlna leh tawngtai sakna avang chauha vawiin ni hi thleng thei chauh ka ni' a ti. A nu tawngtai sakna leh enkawlnaah lawmthu a sawi bang ngailo. Mizo zinga hriat hlawh tak Brig. T. Sailo chuan ka pa remti lo chungin ka nu chu kristianah a in pe a, ka pa ngaihdan a nih loh em avangin a then phah ta nghe nghe a, ka pa remti lo chungin lehkhathiam tir mi tum a, a thiam ang tawk leh a rilru phak tawkin sikul ka kal chhung zawng min chawm a, ka lehkha thiam loh a hlau em em a. Rim takin hna a thawh phah a, a mi enkawlna leh ngaihtuahna kha ka ngaihtuah let hian a ropui ka ti tulh tulh thin, a ti.

Heng kan tarlan thenkhatte atang pawh hian pa tello va Nu te thil tih ropui theih zia chiang takin kan hre thei awm e. Chhungkaw tihlimtu leh nun tifamkimtu chu Nute hi an ni a. An tello chuan hringnun hi a nguai ngiai a, a khawharthlak ngawih ngawih thin. Tin, chhungkaw hlimna thuruk kawltute an ni a, nu berin inchhungkhur a awp lum thiamdan a zirin chhungkaw nuam leh chhungkaw hreawm a lo piang thin. Chhungkaw nuber awplum lohna inchhungkhur chu a rethei a, dam lai thlanthim ang maiin a thim mup mai thin a ni.

Kan naupan lai deuh hian Kan thianpa kawmngaih tak pakhat chu a nu'n hunlo takah a boral san avangin nu nei lo a lo ni ta reng mai a. Vawikhat chu Mother's Day a lo thlenga, Biakin-ah Nu-te chawimawina hun hmangin mifaten an nu te chu pangpar mawi tak tak an hlan a, lawmthu an hrilh laiin, a ni chuan nu nei ve tawh lo a ni tih a in hrechhuak thut mai a, Mi faten "ka nu i mi enkawlna avangin ka lawm e" an tih sap sap laiin a ni erawh chuan hrilh tur nu a nei ve ta lo. A rilru suangtuahna vakvel chuan a nu ngaih a tizual a, minuten an fate an hmangaih ang bawka a nu'n a hmangaih thin zia te a ngaihtuah let a, a bianga mittui lo luang chhuak chuan a ka a hup zo ta lo, a trap ta zawih zawih mai a, a nu hmangaihna chhang let hman lova kha leh chen a lo awm kha a in thiam thei lo va, na a ti a, hreawm a ti a ni. Aw, ka nu khan min la dam pui ni se ka hmangaihna hian a va tuam let dawn chiang em tiin a thinlung atanga rawn hnam chhuak zawih zawih a mittui chu a hul hlei thei lova, Mother's Day a lo thlen apiangin a thinlungah a nu hmel a lang thar leh thin.

A nunna pe a, an hmangaihna chhiarsen rual loh thuk leh ril Lal Isua hmangaihna hnaih bertu chu 'Nuin a fate a hmangaihna' hi a ni. A thinlung zawng zawng a pe a, ram hla taka an awm pawhin a tawngtai sak a, a hrereng thin. A suangtuahna vakvel chuan a fate a awmpui a, tawhsual leh hreawm tinreng an tawh hlauvin thindama awm har a ti. Pa ber lung tih awi loh hlauvin hreawm tinreng a tuar huam a, a tuar chhuak thin. Nausen chumchiap an nih a ta a hnuntui nen a chawm liana, chaw an ei thiam hma a ta chaw a fah thin. An tlei loh hlauvin a awi nileng thin a. An lo seiliana an hrisel loh hlauvin kawng engkimah a tha ber tur zirtir a duh a, zirna run an belh chinah phei chuan a rilru zawng zawng mai chu a fate enkawl nan a hmanga, hreawm tinreng karah a hmangaih a hrin fate tan a theihtawp a chhuah thin. Sualrawng an bawl chuan a muhil ngai lo va, a lungkham ber chu a fate an ni. A ni, Nu te hmangaihna chuan a fate min tuam tlat a, min endawng ngai lo. He ti khawpa hmangaihna nena min enkawl thintu kan nu te hi kan chawimawi ngai em? Kan tana an thinlung petute hi kan hmangaih let meuh em? hmangaihna chuan hmangaihna vek a phut let tlat a sin.

A ni, kan hmangaih ten min hmangaih let si loh chuan kan rilru a na a, kan nun a hlim ngailo. Nu-te chawimawia hmangaih let nachang hre lo khawpa kan bo a nih chuan inenfiah kan mamawh tihna a ni. Hmangaihna nena min chawmliana min enkawltu kan nu te hian hmangaih let an va phu em! khawvel ram tam zawkten NU te tana 'NI' an siam hi a ropui a, keini pawhin thinlung leh tih tak zetin kan nu te kan hmangaih let ve zia kan tilang ve dawn lom ni? ka nu ka hmangaih che a sin, I mi enkawlna avangin ka lawm e! kan ti ve ngai em? Zofate hian zir tur kan la nei tam awm e. Kan nu te hi chawimawi a, duat taka enkawltu ni ve turin kan thinlungte i sawiharh thar leh ang u. Nitin mai hian 'Nute Ni' hi nunpui thiam teh reng ila, a va tha lehzual dawn em.

Hla thu chuan; Ka chunnu kiangah ka lunglawm a kim, Ka rilru hahin min chhawka, ka tana a rilru min pekna te, min tawngtai sakna te kha a va hlu em. A hmangaihna chuan a hraite min tuam lum tlat a, suahsual rawng kan bawlsanin hlim ni reng a nei ngai lo. Heti ema hmangaihna nena min chawiliantu ka chunnu tan, enge tihsak ve theih ka neih aw! thil ropui tak tihsak thei lo mah ila, ka tih theih awmchhun a hmangaihna chhanlet chu ka bat a ni zawk e. tiin.

11 comments:

  1. Hotupa, ka chhiar thuak thuak hrih hman chauh, soi tur ka la nei hmanlo a, thildang daih...deezer kha kan in register ve ringot a, i tih thikin, blog a dah dan tur etc vel hi ka thiam a va zo em!!

    ReplyDelete
  2. Aw, hotubu berin i mamawh chuan thiam leh thiamlovin han sawifiah tum ang aw.. i bloga menu listah khan 'Configure HTML/JavaScript' tih ah khan deezer a mi, i hla list kha paste phei la, chu chu a ni deuh mai a, Mahse hla ho kha Mizo hla emaw sap hla emaw i duh ang khan deezer site khan a lo neih loh chuan i upload chawp thei tho a. Chuan fev. song list siam la, chutah chuan khung khawm la, a fel vek mai ang.. harsatna a awm chuan min hrilh fo dawn nia, pite puih te chu kan phurna lam tak alom..:)

    ReplyDelete
  3. Hotupa, hei zet chu(h) sawi ngaihna ka hrelo!!! A tha thlawt!!!! I thuziak chhiarin rilru leh suangtuahna a pawt kual vel a, ka hriatna ka hloh tlat. Ka rilru a harhfim leh hunah ka sawi zawm zawk a nge

    ReplyDelete
  4. Tha lutuk, ziak ngaihnawm hle mai! Happy mothers day' ti phawt teh ang! NU tluka khawvela hlu hi an awm thei hian ka ring lo! i sawi ang hian kan hmangaihna te hi tihlan thiam a pawimawh khawp mai. Kum kan hmang tam tial tial a, min hmangaihna kan hre telh2 zel a nih hi.

    ReplyDelete
  5. Hotupa, I salute thee. Ziak tha leh khawp mai. Happy Mother's Day to you. Nakina chhiar nawn leh ngei ngei chi i post hi chu, ka u handset atangin. Thanx for the lovely read once again.

    ReplyDelete
  6. @puii, thank you, same to you..

    @illusionaire, ekhai hotupa, i ti lawmawm e.. thiam ang tawkin kan han luangliam ve a nih ber hi maw..:)

    ReplyDelete
  7. i Thianpa nu neilo chu kalo ngaihtuah ve thung a ka khawngaih hle mai. I thilziak hi un tum zet chu a khawihdan a dang zar mai. "Hmangaihna" vang hian nu hi a hlu ni in ka hria. Mihring nih chuan kan mamawh vek si a. Good post.

    ReplyDelete
  8. "Chunnunnemi Ni" a ropui ka ti ngawt mai, keipawh ka nu ka call tak kha, lawmthu sawiin ka hmangaih thu tawngkam ngeiin ka hrilh chu a lawm asin..

    Hotupa nge nge i bei ril thei ngawt mai, i thu leh hla te hi chhiar nin a har ka ti ..

    ReplyDelete
  9. @sawmpuia, hotupa a ni ngawt a sin, hetiang deuh bawk hian keipawh pa neilo chan ka chang ve tawh a.. a hreawm duh khawp mai.

    @azaia, i tiropui hle mai, chutia tawngkam ngeia i hmangaihna i han hrilh chu, a ruk takin a chhuang che ang a, fapa chutiang hrilh let thei a nei che chu a lawm hle bawkin ka ring. Thanks.

    ReplyDelete
  10. a va tha ve...han soi bleh tur poh ka hre ber lo...tha topss

    ReplyDelete
  11. kan pu te ho hi chu in ziak ngaihnawm thei thin hle mai..keep it up!

    ReplyDelete