Saturday 8 December 2007

Vanduai Vannei

Ka nghahhlelh em em December thla a lo thleng dawn ta e tia thlumtea thlira ka lo thlir thin Zoram chuan chhuah hun chu thulh thut a lo ngai ta. Eng dang vang a ni lo va, he "Informal Meeting on Future of WGIP" vang hi a ni. Urgent information ka dawn avang leh zin tum tawh te pawh tulh leh theih ni se tia ngenna an rawn siam deuh kher avangin keipawhin ka tum chu ka thulh leh ta zawk a ni. Engpawhnise, meeting nazawng hi a pawimawh em em vek kher lo va, tel vek kher pawh a ngai lo va, thu leh hla han thawn mai chang te pawh a awm fo a, tuntum erawh a pawimawh satliah pawh a ni lo va, a tul em avangin ka han tel ve leh ta a ni. He Meetinga thurel leh sawihona lam chu tarlan ka tum rih lo va, ka vanneihna leh vanduaina lam zawk hi tuntum hi chuan tarlan ka han tum zawk ang e.

December 4 khan a nikhatni atan meeting chu kan tlingtla a, meeting hun ka tlai tep tawh avanga ka bungrua leh thawmhnaw thenkhat chu Geneva Rail Station locker-a ka hnutchhiah chu han lak zet a, ka thlenna tur UN Mandat lam pan leh nghal deuh mai ka tum avangin ka necktie leh kawrchung pawh a ngai ngaiin ka ha rih nawk nawk a. Bus chuan dan hi tih than loh chuan direction diklo zawk lama chuan palh a awm avangin leh ka chuan sual fo tawh avangin ka fimkhur hle a, chuvangin ka zawng kual rei fu reng a ni. A tawpah ka chuanna tur nia ka hriat Bus number 5 chu chak takin ka pan phei a, ka lawn chho chiah rual hian mi pakhat hmanhmawh taka rawn chhuk hian a meitalh leh Meizial a thlauh palh a, chu chu ka rah sak ka hlauh avangin ka ding chawt mai a, a ni pawh chuan ka rah sak a hlauh avangin ka kekawr hmawrah a chelh ve bawk a. Tichuan, a chhar a, an chhuak a, bus a inkhar a, a kal ta a, ngaih tha taka ka thut lai chuan mi pakhat hian sap tawngin ka pu i wallet han check teh, a bo em? mi rawn ti a, ka han check chu a lo awm ta der lo mai a. Eheu, min ruk sak ta em ni dawn? tiin hmun hrang hrang te ka han dap kual a, ka ahna kekawr ipte veilam chu a lo ruak ta tlat mai si a, ka bing ta chum chum mai a. Bus driver ka han hrilh nghal a, english a lo la thiamlo zui nen tawng te kan han let te te a, tichuan a hrethiam nghal a, Police a phone nghal a, tichuan bus stand hmasa berah tawng lettu nen chuan kan chhuk nghal a. Rail Station lamah chuan kan kir leh ta a, mahse khua a thim tawh avang leh dar 8 lai a nih tawh avangin Police office pawh chu a lo inkhar hlawm tawh si a, tichuan city Police station kan pan ta nghal a. Rilruah ngaihtuahna a kal thui hle a, ka wallet ah hian Geneva ka cham chhunga hman tur pawisa fai ka dah a, ka credit card te, ka ATM card te, ka medical Card te, ka Bus/Tram/train card kum 2 tana ka siam te bakah thil pawimawh tam tak ka dah vek mai si a. Ka rilru a buai ru hle a ni.


Mahse, thlaphan hmel tak leh buai hmel viaua lan erawh ka duh hauh lo va. Ka buai avang leh ka phi chung avanga kawngro a sut teh chiam dawn loh avangin cool tawka awm mai chu tha ka ti ta zawk bawk nen, Police Station ah chuan ka han in report ta a, an ni chuan an lo hrethiam nghal deuh mai a, tunlai hian hetiang hi a tam a, fimkhur hle tur a sin, min lo ti ve bawk a, ka luh hma hret hian Mumbai lam Vai pahnih Wallet tibo ve tho te chu an lo awm ve bawk a, an ni pawh French thiam bik maplo an nih avangin an khawngaihthlak hle mai a. Kan han inzawt a, an ni ai chuan ka thil tihbo chu a letin a tam si a, pawi min tihpui hle a ni. Tichuan, kan thil tihbo te chu detail taka kan hrilh hnuah min register sak thlap a. Min hriatpuina lehkha te chu min pek hnuah kan chhuak leh ta a. Zan dar 9 a rik tawh avangin ka thlenna tur UN Mandat pawh an khar a hun tawh a, chanchin han hrilh turin ngaihtuahnaah a awm meuh tawh loh avangin engmah ka hrilh ta bawk si lo, ka buai ru ang reng hle a. Cheng khat pawh ka nei bawk si lo va, ka buai em em a ni. Ka bank card emaw credit card emaw te chu lo kawl ila, khawiah pawh pawisa a lak chhuah mai theih tur kha a ni si a, mahse, wallet hian a keng tel vek avangin kut bengin ka awm ta a ni.

Ka han ngaihtuah ta vang vanga, hmelhriat lah chu an vang nasa mai si a, tin, an tawng ka thiam loh avangin ka tlangnel lo hle mai bawk si a. Chutia rilru beidawng ang reng taka ka awm lai chuan ka Mobile chu ka bag chhungah a lo la awm hlauh mai chu lo niin, ka han la chhuak ta a, hmana ka hmelhriat tawh genevaa khawsa ka Zohnahthlakpui Davida number chu ka han zawnga, ka lo la nei hlauh mai pek a, ka lawm teh a sin. A hnathawh zan a nih chuan a awm dawn lo chiang khawp zan dar 9 ah phei chuan. Mahse, ka han be thei nghal a, a dam vak loh avangin leave a lo lak ni kher kher a lo ni a, chuti ni lo se zawng zan dar 12 vel thleng duty nei thin a lo ni a, vanduai tak chu ka vannei fu ta mai a. Tichuan, ka harsatna te ka hrilh hnuah ekhai, lungngai suh, ka rawn lam nghal ang che, tikhan lo awm rawh, mi rawn ti a, reilo teah kan inhmu ta a, ka lawm kher mai. Mahse, ka Credit card kha min ruk sak zingah a tel avangin rilru erawh a nuam thei lo va, bank han call mai turin a number ka lo nei si lo, a tuk zingah ka bank number te chu zawng chhuakin ka han call nghal a, min lo block sak nghal thuai a, tichuan ngaihngam tak chuan ka awm thei ta a. Meeting lah chu zing dar 9 a tan tur a nih avangin zan lam mut that vak loh nen chuan hmel a lang phuai duh kher mai. Mahse, thulh thei ka ni lova, thulh tur pawh ka ni lo va. Rilru nuam tak leh lungkham lo hmel taka awm hram hram ka tum ta zawk a.

Ka rilruah heti hian a lo lang ta a. Khawiah pawh hian mi tha an awm rualin misual pawh hi an lo awm vek mai a. Geneva phei chu khawpui muang tak leh mihring cheng te pawh hawihhawm tak mai a ni thin a, mahse, misual rukruk ching pawh an lo awm ve nual tho hi a lo ni a. Chumi khami ah lo dah ila, a bo lo tur, khatianga meitalh leh meizial a tih tlak lai khan trick a lo hai a ni awm sia, lo din lek loh tur, te ka ti a, ka ngaihtuah neuh neuh a, Sebo hnua kawngkhar an changzo ta a ni. Chutihlai chuan heti hian ka han ngaihtuah ta zawk a, tihbo tur neia kan awm te hi a lawmawm zawk a, a rutu ni lova, a ruksak nih te hi kan va nihlawh em. Ruksak duhna thinlung nei lo va kan han awm te hi kan la vannei ma nge. Ka wallet leh a chhunga awm zawng zawng ka sum te, ka cards te leh thil dangte chu ru vek mah se, ka hlawh lak tur min ruk sak thei lo va, ka nunna pawhin engmah a tuar bawk lo va, ka la vannei ma nge, Lalpa hian kan mamawh chinah chuan min veng chiang hle mai. Tiin ka ngaihtuah chhuak ta a, ka lawm ru hle mai a. Lawmthu ka sawi ta zawk a. Ka pawisa te kha thil sual tih nana hmang lo va, thil tha tih nana an lo hman zawk nan pawh lungsi takin ka tawngtai thei ta a ni. Pathian chuan engkim mai hi a relfel thin a, kan tana tha ber turin rem a ruat thin a ni. Vanduaina a awm chuan vanneihna pawh a awm thin a, chhiatna kan tawh hun a awm a, malsawmna kan dawn hun a awm bawk thin a, a thil tha leh kan duh zawng zawng te hi nei vek thin ila, siamtu kan hrechang hauh awm si lo, chhiatna kan tawh aiin malsawmna kan dawn a tam fe zawk a, chutiang bawkin kan vanduai hun aiin kan vanneih hun a tam zawk thin si a.

He Meeting ah hian Bolivia ram tan Case lian tak mai khelho a ni bawk a, an ambassador chuan mittui tla zawih zawihin report a pe a, tanpui an tul zia nasa takin a sawi a, tunah hian Bolivia ramah chuan civil war a thleng mek a, an ram hruaitu pawh UN in a ruat rih hmiah mai a ni a. Tawngtaipui an va mamawh em. An ni chauh a ni nemaw.. Khawvelah hian keini aia a let tam taka vanduai, an mihring nihna chanvo pawh hauh pha hlawl lo, thihna ruam kara khawsa mek, indo avang te, khawmual chhiat vang te, hrileng avang te leh natna hrang hrang avangin nitin mi tamtakin hreawm tuarin nunna an chan mek a, kan chenna khawvelah hian remna leh muanna bakah he khawvel hi a lo him theih nan nang leh kei hian chanvo kan nei ve a ni.

Heal The World:

10 comments:

  1. Ummm a ngaihnawm hle mai, i vanduaina ah chuan ka tawrhpui rual chein, ngaihtuahna dang hmang thei a i awm chu a lawmawm hle mai. Hetiang anga vanduaina tawh pawh a rilru siam thei te hi alawm mi vannei leh mi awhawm ber te chu ni. Kei zawng ka thil theih loh thin a ni a, puhmawh tur ka zawng kual a, ka inngaihtuah thinrim vak thin.

    Harsatna leh Vanduaina emaw kan tih te pawh hi vanneihna leh lawmna min thlen tu an ni chawk a nia, Pathianin i tawrhna te a hre reng anga malsawmnain a vur ngei ang che tih hi ka ring tlatin ka duhsak a che

    ReplyDelete
  2. @amuana, ni e tiraw, malsawmna kan dawn nasat teh lul nen hian lawm nachang kan hre thin si lo. Nitin ei tur, thawh tur kan neih bakah mutna hun te kan nei thei a, hriselna te kan nei thei a, dam taka kan hun kan han hmang thei te hi a malsawmna vek a ni si a, keini erawh chuan kan khamkhawplo va, vuina tur kan zawng a, kan phunnawi a, kan lung hi a awi thin si lo. Vanduaina chhete kan han tawk a, dem tur kan han zawng ringawt thin te hi a mak thin a ni.

    A fapa ngei pawh mualphona tinreng turin kross lerah khenbehin a awm tir a, hmuhsitna leh endawnna tinrengin a bawm a, chutianga a fapa duh em em pawh a tawrh a phal chuan keini tuar ve pawh a phal ngei ang. Tawrhna phenah malsawmna erawh kan hriat lohvin a dah thung hian ka hria. Hetiang zawng hian ngaihtuahna nei ila a dik awm e a.

    ReplyDelete
  3. I thlirdan chu a tha/ropui hle mai. Harsatna tawh lai pawh a a positive lam zawng a la thei hi mi vannei ber pawl anni...mi tam tak tih theiloh anih avangin.

    Keipawh ka ti fo thin a, kan chunga thil (engpawh) thleng reng reng hi Pathian hriatpui lohvin a thleng ngai lo. Chuvangin, heng experience atang hian Pathian hian engnge min zirtir a tum le ti zawngin ka la ve fo thin.

    Chhan nei lovin Pathian hian a thlawn ngawtin thil min tawntir hian ka ring lo. I sawi ang hian, thil rutu nilova, ruksak a kanla awm thei te hi a malsawmna min vur tamtak min hriat chhuah tirtu ah a hmang alo ni reng mai. Pathianah chauh 'engkima lungawina' hi alo neih theih ani tih i thuziak atang hian a ti chiang khawp mai. Ka mamawh lai tak aniang, ka chhiar chu min encourage lutuk.

    Ka ziak ta duah a..Ka 'all time favourite' chang hi ka han tarlang leh hram ang e:
    "And we know that in all things God works for the good of those who love him, who have been called according to his purpose."-Romans 8:28

    ReplyDelete
  4. @jinx, i sawi hi a dik ngei mai. Tin, i baibul chang han tarlan pawh hi a fuh tak zetin ka hria. Rilrua awm ang pawh dik taka han ziah chhuah hi a har thin a, thu thiam loh chu thuhran, ka mizo tawng hi a limit deuh thin a.

    Masawmna te, ropuina te chauh hi kan dawn tur a ni lo va, harsatna te, beidawnna te, hreawmna te hi kan tawrh ve tur a ni a. Chutiang chu tuar lo turin nitin kan tawngtai ngawt thin a, mahse siamtu hian kan tawrh ve a phal a, kan tawrh ngei pawh a duh thin, a hmangaihna kan hriat thiam theih na leh kan hriat nawn fo nan.

    Kan duh zawng leh it zawng kan dil fo a, kan tana tha tura remruat tur erawh chuan kan dil ngam meuh thin si lo. Mahni tana tha tur pawh hre hauh si lo hian kan duh zawng zawng kan han dil tawp tawp mai thin a, a ni erawh chuan kan that pui tur chauh min pek a duh thin si a.

    ReplyDelete
  5. E khai, a va ngaihnawmin a va fun hnem em!Ka thu duh em em mai "When the going gets tough, the tough gets going" tih zawng2 kha i nei zo a ni ber a lawm le hei!

    Harsatna kara lawm tlat te, manganna kara thlamuan tlat te, na chunga dam tlat te hi Lal Isua zara ringtuten kan neih theih thin, 'nun laimu' diktak chu a lo ni e. Ropui khawp mai

    ReplyDelete
  6. kan hotute chu thil pawm dan thiam hle mai.Ka buai lawng dam chhung ni ka chhiar thiam ta , tih phuah chhuak tu thinlung i tawm phak hmel bik tlat mai.

    'kei nin vanduaina ah ka ruat
    A hmangaihna lan tir tu'

    tih anih kha maw!

    ReplyDelete
  7. @mafaka leh avena,

    in dam tlang maw,, ni e tiraw, engkim mai hi a pawmdan thiam a, a tawrh dan kan hriat hi a lo pawimawh dawn khawpin ka hria. Hringnun hi thil hrang hrang inpawlh tura khuanu duan a ni miau si a ni. In thlirna hi ka pawm zawng tak a ni bawk e..:)

    ReplyDelete
  8. Sarcastic zawng ni miah lo in, in fel hlawm ngei mai, a ziaktu leh a comment tu zanwg zawng te. Comment ve pawh ka zak lek lek ani kei misual hi :P

    Ka post ang ka lo tih ruk neuh2, sap ram ka zin leh vah kualna ah re re, India ang a thil ven trung2 a ngaih loh zia ka lo ziak dawn a, ziak leh lo mai ang :D

    ReplyDelete
  9. @jerusha, india nena khaikhin rualah chuan a la ziaawm viau mai. Masi a hnaih vang a ni.. an ti a, tak tak pawh ani mai thei. Hetiang hunah hian sum mamawh a na pawh a ni mai thei. India sawi takah chuan Kolkatta phei hi chu a rapthlak tawp.. Delhi nen. Maharastra leh Bangalore lam khi ziaawm khawp mai, chennai lam pawh a nih tho ka ring. Kol leh Del chu fimkhur lehzual a ngai.

    kum 2001 kha ni tain ka hria. Mizopa kum 50 mi vel pawh hi Palica baazar ah a thiante nen an leng ho a, a hnuah a thiante kuhva khilai turin a wallet a han hawng chu pawisa zawng an la fai vek a, thil dang zawng him takin an kil leh thlap a, an khung fel leh thlap mai si a, mak tak a ni, an huangtau kan ti dawn nge, an hnehsawh kan ti zawk dawn..bon tak an ni..

    Keia thil tawn hi chu Train Station a nih vang a nia, heng ah hian drugs khawih hi an awm ve thin a, chung ho chu an ni ngeiin a rinawm mah. Dan naranin thilbo chu a tlem, thlauh palh vang te, theihngilh vang hrim hrim te a kan tihbo hi chuan him takin kan hmu let leh duh khawp mai. Mahse, ruk tum hrim hrim chi hi chuan an pe let duh tawhlo a nih hi.. mi tlemte chauh an ni ngei bawkin ka ring.

    ReplyDelete
  10. Harsatna kara lawmna tur zawkalo ti thei mi te hi alawm khawvelin a ngaihsan thin chu ni! i thil bo kan va tuarpui tak che em.

    ReplyDelete