Chhungkim Dar Ang Lenlai

Kan unaua a tlum ber hi hmeichhia a ni a, a tet lai atangin a hmel leh hawiher a danglam bik a, nausen ngo vingveng, mit meng pawl deuh phau mai hi a ni lehnghal a,a sam pawh a buang deuh thar thin. Sap naupang a an em avangin ka pan a hmingah 'Baby' tiin a ko thin a, 'Baby Lalkrawschhuangi' tiin kan ko hlen ta a ni. Chutianga hmel danglam bik tak mai chu ni mah se, a tawng erawh a fiah lo hle thung a, lian tak a nih thlengin a tawng fiahlo reng a ni. Atan 'masi' chu 'mati' a ni rei hle a. Engtikah tak rawn tawng fiah ve ang maw, tia kan nghah laiin kan hriat loh hlanin a tawng chu a lo fiah ve ta viau mai a, a han tleirawl meuh phei chuan a tet lai hmel a thlah a, a sam rawng a lo danglam zo ta a, a aw leh chezia thleng maiin a inthlak zo ta a ni. Thil mak tak zawng a ni phawt mai.

'Masi' lam fiah thiamlo a nih laia 'Mati' a tih tlat lai hi keini chhungkaw tan chuan ' Chhungkim dar ang lenlai' an lo tih ngei mai chu a ni a, reilo teah ka pa'n min boral san a, kum tam a ral hmain inchhung chhuahsanin hmun khawhar lamah lehkha zirin ka chhuak ve ta bawk a. Ka tleirawl hun chhung chu Hostel velah chawthing leh chawthar inpawlh ringin ka hmang liam a ni ta ber mai. Chhungkua anga Kristmas kan hman hnuhnung ber kum kha ka han ngaihtuah let hian ka mittui hi a hnam lo theilo a ni. Tunah chuan a thenin mual min liam san tawh a, a thenin nupui fanau an nei zo tawh a, nung dama la awm te pawh tuantul vangin kar hla tak takin min kar cheh tawh avangin inhmuh a lo har zo ta. Chuvangin 'kar hlaa lenrual lung duh zawng te, in dam lai a ni em?' tih hla te chu kan chhungkaw tan chuan Zaipawl saka sak tham a ni.

Unau pali lek kan ni bawk a, kristmas urlawk zanah ngat phei chuan kan unau thenkhatte an rawn riak ve thin a, thleng kan dawh a, masi putar hnenah kan ei chak zawng te kan thil duh te kan dil a, uluk takin kan theih tawpa rei kan tawngtai thin. Naupang chumchhiap mai kan la nih avangin chham ngai kan chham ngun tlauh tlauh thei hle a, zing khawvar kan nghahhlelh thin zia kha aw, Masi putar chuan kan thlengah enge a lo thlak ang? kan tawngtaia kan dil te kha min pe ang em? ti reng renga khawvar hma atanga khuma let kual tawh naupang rual chu kan han tho ta ngei a. Thlengdar chhungah chuan kan thil ei chak leh duh zawng thenkhatte chu a lo awm rui mai ta thin a, kan va lawmin kan va au nasa thei em. Uluk taka kan tawngtai laia lo ngaithla ru khiautu ka nu khan Pathian tihdan a zir a ni ngei ang, kan duh zawng ngawt aiin kan mamawh kha min thlak sak ta thin a. Tunhnua ka ngaihtuah let chang hian ka ngai vawng vawng thin.

Kum a lo vei a, kan nau-i pawh a la tawng fiah chuang lo va, in chhung lum chhuahsan a, hla taka boarding sikula awm tur ka ni a, Kristmas pawh hawng thei ka ni dawn lo va, hawng tur pawh ka ni bawklo a ni. Kan te beri chu kum 5 emaw lek a ni a, ka kalna apianga mi ngen chiam thin avang leh ka hruai ve loh chuan a trah chiam thin avangin thenawm naupang te nena kawmchara an inkhualtelem laia chhuahsan ni se, tia ka nu remruat chu a tlawrh palh a, kan kawt zawla ka chhuak mai tur thawm chu a hria a ni chek ang, a rawn tlan hawng vang vang a, mi rawn kuah chawt mai a, chu ta a thusawi chu ' A u, Mati ah lo hawng lawh aw' tih hi a ni. "A U, Masi ah lo hawng rawh aw" a tihna a ni a. Huphurh lawk ang ngei maiin Kristmas a lo thleng hnai a, rilruah eng dang a lang tawh lo, kan thenawm naupang insual hrat tak kei aia upa hret tawh lehnghal, min vel trap fo thintu te pawh huat lamah a lang tawh lo va, a sual a sual khan a ngaihawm em em tawh mai a ni. Kan huana Zawngtah leh Antram te kha an rah vul chuk awm si a, ka va han ei chak thin tak. Kan kawmchara kan vawkpui nguk ri te pawh thinlungah a ring tulh tulh mai a. Kan arpui tuk ri leh kan arla kak ri te, kan arpa chhiarkhuan pau ri te chu kan kawmchhaka UPC khuang ri thin ai pawh khan ka bengah chuan a ri ring zawk a. Thlang sappui rimawi chitinreng ai pawhin ka thinglungah chuan a mawi zawk thin. Fiahlo taka Masi pawh Mati titlat thin kan nau-i thusawi leh ti ti ri te chu ka bengah a mawi tulh tulh mai a, fiah leh fiahlo pawh thlu lo va, a han zai lang lang ri te chu, zai a zawnga zaisa thiam ai pawhin ka bengah chuan a mawi zawk a, ka ngai vawng vawng thin.

Pa nei tawhlo chu chhung inkhawm pawh ka nu'n a vaihma vek thin a, ding chunga baibul chang kan by-heart te kan han sawi ve lauh lauh te a nih loh chuan kut kuangkuahin ka nu thusawi kan ngai thla thap thin kha a ni a. Vawikhat phei chu kristmas hnaih tawh takah hian chhung inkhawm kan nei a, ka nu hian a thusawi atanga a lakchhuah thu tawi te te min zawt hlawm a, a tawp berah kan te ber tawng fiah vak lovi chu a han zawt ta a; Masi hi tu pianchampha nge Baby? a han ti a. A han ngaihtuah ve vang vang a, a tawpah chuan 'A u Mampuia pantam niang, ka te lo e' tiin a chang a, kan nui ta dar dar a 'A U Mampuia Piancham a ni ang, ka hre lo ve' a tih ve na a ni a. Tawng fiah vak lo kan nei chu kan hlimpui thin khawp a, a tawng fiah hnuah erawh a bawl theih tawh si lo va. Khang hunlai kha a lo nuamin a lo hlimawm ngawt mai. Keini unau tan chuan kan vanglai a ni a, ka pa'n min hmanpui lai phei kha chu kan kim lai ber a nih avangin 'Chhung kim dar ang lenlai' tia vuah loh theih loh a ni ngei mai. Tunah erawh hmanlai an chang zo ta. Au kir theih ni tawh si lo.

A ni, nangni chhungkima Masi hmuak thei te u, in vanneih bik zia kha chhut ula, hlim takin kristmas hmang ang che u. Hun leh ni te hian min nghak lo va, hlim ni a her chhuah pui ang bawkin trah ni te pawh a lo her chhuak thin. Keizawng, Kristmas kawl a lo en apiangin ka lung a zing a, ka lungduh then tak te min ngaihzual tir si thin. Bazar a thil zuarte au rawl te, naupangten an nu leh pate hnena ngenngawl tak maia a mamawh a thlen ri ka hriat te hian ka mur chum chum a, nu leh paten an fate kai dam dama laitual an leng vel ka hmuh chang te leh rawng chihrang hranga in leh a chhehvel chawimawi chuk te chuan ka lung min len a, kristmas hla mawi tak tak te chuan kan 'Chhungkim Dar Ang Lenlai' min ngaih tir fo thin. 'Kumpui sul a lo vei chang hian, lunglen a zual leh thin' tih hla te phei chu mittui tla zawih zawih chunga ka sak loh theih loh hla mawi a va nih teh lul em.

Aw, hringnun hi ka han dawn vang vang thin a, kan vul lai ni te hi a va rei lo em. Kan vanglai kan hmang dawn tan chauh emaw kan tih laiin chuai lam kan pan leh mai si thin, van boruak thiang kak mai te khi, reilo teah chhum thim mupin a khuh phui mup ang maiin kan hlim lai ni te chu khuh bovin a awm mai thin. Hnah hlui te an til zo va, hnah tharin a thlak ang hian tu te mah hi kumhlun tur kan awm si lo. Chhung kima awm reng thei kan ni lo va, thihna leh changkanna te bakah retheihna te chu kan hmachhawn loh theih loh an nih ang bawkin, chhungkua min thendarhtu mai an ni lawi si. Kan kim reng dawn emaw kan tih laiin he leia hmuh tawh hauh lo tura chatuan ram min pan san ta; kan u, kan nau, kan nu, kan pa, kan pi kan pu leh kan thiante kha an va ngaihawm tak em, intawn leh ni awm tak ang maw. Keizawng Masi a lo thlen meuh chuan, he lei hnutiang chhawna hawilopar min thliahsan ka hmangaiha leh hmangaihi te ka va ngai thin tak em. He leiah hian hmu leh dawn tawhlo mah ila, van jerusalemtharah erawh kan in tawhkhawm leh ngei ka ring tlat a. Mihringa min duang chhuaktu, ze hrang hrang te zaikhata min hruaikhawmtu hian "Chhungkim Dar Ang Lenlai" zamual liam hnu kha a taka min la tawn tir leh ngei ka beisei tlat a ni.

Here is Blue Christmas by Jon Bonjovi