Friday 28 December 2007

Kumtharah Rilru Thar

Kum kal taa ka hun hmandan te ka chhut kir a, kawng hrang hranga ka dinhmun leh a rahchhuahte ka dawn kirin ka lung a awilo hle a, ka rilru takin a tlawmngaih thlak ka ti a, kum 2007 chu hman nawn leh hial ka duh phah a ni. Amaherawhchu, 2007 kum chuan mual min liam san tawh a, kan au kir zo tawh lo vang. Ka hun kal taa ka thil tih leh harsatna ka tawh zozai te chu hunin a her liam pui tawh a, ngaiin ngailo mah ila, 'PAST' an ni zo ta. Inchhirin, in ngaihtuah lunghnur thin teh mah ila, kan au kir tawh chuang lo ang. Chuvangin hun lo kal tur zawkah hian ka ngaihtuahna leh suangtuahnate chu ka hmang tha zawk tur a ni tih chu kan ngaihtuah ho tur a ni ngei ang. Hun kal tawha kan tihsual leh siam that ngai lai te chu kum tharah kan siam tha tur a ni.

Sap thufing chuan; 'i hun kal tawh thlir let la, fin phah nan hmang ang che', te an lo ti a. Chinese thufing pawhin, 'kum kal taah ngai awh a i in hriat chuan, i hnungtawlh tihna a ni', a lo ti ve bawk a. Kan hun hman liam takah khan, ngai kan awh nia kan inhriat chuan kan hnungtawlh tihna a ni. He khawvel intlansiakna ramah hian ngaiawh thei kan ni lo va, dinhmun ngaia ding nia kan inhriatna chu kan hnungtawlhna a ni. Chuvangin kan thlen chin chinah hma kan sawn em? ngai kan awh em tih hi kan in enletna tur chu a ni. Kum 2008 lo her chhuak hi engtiang chiahin nge kan nunah Cho-na kan siam dawn? Kan thlen tum chin leh kan beiseiah in hlankai ngei kan tum dawn lawm ni? Mi tam tak, Mei zu te, Zu in te, Drugs khawih te leh sim tur neiten, kumtharah chona nen an sim duh te sim phah nan an hmang thin. Sim tur neilo khawpa famkim hringfaah awm tak ang maw..

Hringnun hi chona tello chuan hmasawn theih a ni lo va, chutiang bawkin kristianna pawh hi chona tello chuan a limit tlat a ni. Chona chu enge a nih chiah tih erawh kan chian a ngai thung ang. Kohhran enkawltute chuan a kohhran mipuite tana thlarau ruaipui a peih a ngai ang a, kum danga an budget an khum ngei theih nan hma an la tur a ni. Thil man a to zel a, ei leh bar a harsa tulh tulh ang bawkin mitin hlawh a sang tulh tulh thung a, pawisa hlutna erawh a tla hniam tial tial lawi si a, chuvang tak chuan ngai awh chu hnungtawlhna a ni. Zirlaite tan kum kal taa an mark hmuh aia sang an hmuh loh chuan an hnungtawlh tihna a ni ang a, hnathawka eizawng tawh ten kum tharah chuan kum hlui aia an hlawh an khawl tam a, hmasawnna kawng hrang hrang an chuaikai a ngai. Chuti a nih loh chuan an hnungtawlh ve tho tihna a ni ang. Kristiante tan pawh intuaitharna leh harhtharna nei lem tawh lo nun neitute kan nih chuan kan thlarau chan pawh a hlui viau thei bawk. Nitin intuai thara, nun thar nei turin Baibul chuan min zirtir a nih kha. Kum liam taa kan nun te kan chhut let ang a, kan tlin lohna te, kan hriat lohna te, kan fel lohna te leh kan bawhsualte chu siam thain kan intuai thar tur a ni ang. Chu chu ringtu nun dik tak pawh a ni ngei ang. Heng te hi kan tan chona chu a ni awm e.

Thenkhatte tan, nupui/pasal neih kum a lo herchhuak ang a, thenkhatte tan erawh naute thar pian kum a lo ni bawk ang a. Chutiang deuh bawkin nausen piang te tan pawh khawvel eng an hmuhna kum a ni ngei bawk ang. Kan B'day kan lawm kumtin ang bawkin pitar leh putar tu emaw chuan za mual min liam san leh ngei ang a. Sik leh sa avang leh natna hrang hrang avangin tute emaw chuan an lei hringnun an chhuahsan ve leh ngei bawk ang. Tawhsual leh rikrum thil avanga chhiatna tawk kan awm leh ngei ang a, nunna hial chan phah te pawh kan awm ngei ang. Khawvelah kan cheng miau si a lawm le. Amaherawhchu, thenkhat tan kum ropui, an la tawn ngai loh hlawhtlinna dawhsanah an chuangkai ang a, lawmna avangin an biangah mittui a hnam chhuak mai thei bawk. Hringnun hi a inchawlh pawlh tlat si alom le.. hlawhtlinna chauh hi kan nei theilo va, hlawhchhamna te leh vanduaina te pawh hi kan ta ve tho a ni. Chuvangin, a inchawhpawlh tawka pawmdan thiam a ngai hle dawn a nih hi.

Second, Minute, Darkar tin mai hi au din rual lohvin a kal chawt chawt a, kan hmahun lo kal tur phei zawng kan hre hauh lo na a, kan fimkhur hle tur a ni. Hun leh ni te an liam zel ang bawkin kan nunah pawh inthlakdanglamna a herchhuahpui a ngai. Nun hian danglamna a chan ve loh chuan minung kan ni dawn si lo. Chuvangin, kum hluia kan thil tihte atanga in chhut leiin, kum tharah tanlak phah nan leh hmasawn nan i hmang ang u. He hringnun lamtluang hi beidawn san mai lovin kan um dawt dawt tur a ni a. Kan tawhsual tawh te, kan beidawnna te leh kan hlawhchhamnate chu kan tan zirna tha leh min tichaktu ni hloh teh se. Chu chu chonaah pawh kan ngai tur a ni. Baibul chuan ' bei la, bei nawn rawh' a lo ti a, chak tak leh huaisen takin kan 'hmabak' chu hmachhawn zel turin kumtharah chuan rilru tharin tan ila zel ang. Ka Mizopui zawng zawngte Kumthar 2008 hi in tan malsawm in dawnna kum lo ni mawlh se, Pathian awmpuina leh a hmangaihna lo chang hlawm ang che u.

8 comments:

  1. E Khai, a tha hle mai a, la rilru ah he thupui chiah chiah hi a lo awm a, thiamlo chung chungin ka lo thai chhin ve lai takin, nangin tha eltiangin i rawn tarlang ta tlat mai.
    a ngaihnawmin a tha khawp mai.

    ReplyDelete
  2. hotupa chu bei tha hle mai, kumthar thuziah ka chhiar hmasak ber a vanneih thlak e.

    ReplyDelete
  3. @amuana, thanks, i ziak chu chhiar theiha i chhawp chhuah veleh ka lo chhiar ang e. Hetiang lam chhiar hi makmawh lai a awm ve a... I bei ho zel ang..

    @sawmpuia, ekhai hotupa, nangni mithiam zawk leh tling zawk te cho chhuah nan kan han ti rawih mai a nia.. In thukhawchang ka lo ngaichang ang e..:)

    ReplyDelete
  4. Happy New Year, Puia!

    I thu hi a ril ruih zel mai aa... 'Chona' i tih hi ka la fuh khawp mai. Kum lo thar hian a ken tel malsawmna, harsatna, hlimna leh lungngaihna te zawng2 nen hian min cho a ni. Huaisen taka hmachhawn tur kan va ni em!

    'Nupui/pasal neih kum a lo her chhuak ang a' i tih hi nangmah i insawinaah ka lo ngai tlat pek a:)

    ReplyDelete
  5. mafaka, nupui neih kum hi chu hotupa avena chanah i ngai tlang ang u. A ni hi a awm ber a, a phu ber bawka, a tul chuan sawmpuia'n ten palai hna thawh pawh an hreh hauh si lo va.. kei ngei pawh tih-huk a awm dawn phawt chuan ka solo ang tih hman kum atangin ka tiam tawh a, solo thiam vaklo chungin ka tolo tal ang.. tiraw hotupa..

    ReplyDelete
  6. hotupa chu , nupui neih lam i sawi ri ring ta viau mai..a lawmawm e!!

    hringnun i hawl kim khawp mai, mihring hi chu tirhkoh pawla pawh in nitin ka thi thin atih kha maw! mahni in hriat chian a, kan dinhmun theuh in en let fo hi a tha reng ani..

    'chona' i han tih pawh khi a pawi mawh khawp mai. mahni mihring in kan tih ve theih reng te hi pathian in min tih sak kher tur ah kan ngai ta mai em ni tih theih tur hian kan tawngtaina hla thenkhat te pawh hi a awm te hian ka hre thin.

    hotupa mafaka hian sawi tur a ngah in ka ring!

    ReplyDelete
  7. E i van ziak tha dap dap ve aw! Ni e, he kumthar hi kum tha tak mitin tan a nih ngei ka beisei. Happy new year (Belated)

    ReplyDelete
  8. @avena, ekhai hotupa,, kumin chu nupui neih kumah puang ve tawh mai ila a tha ang, ka ti deuh a, min zawn hmuh sak thuai a ngai dawn a va ang ve..:) mafaka pawh hian puang ve tawh mai se, nang nen.. a lungthukim hi a tha ngai e..:)

    @puii, thanks. Krismas leh kumthar i hmang nuam em? Zawlkhawpui chu a nuam bawk maw? chanchin detail deuh taka hriat a va chakawm ve..

    ReplyDelete