Saturday 4 April 2009

DAM CHHAN

Hringmi ziarang hi a lo inang lo thei viau mai a. Kan seilenna a zirin kan mizia pawh a danglam hle thei a. Thlahkhat unau rau rauah pawh seilenna hrang chu kan rilru puthmang pawh a danglam hle thei awm e. Tin, kan lo chawrchhuahna chhungkua a zirin kan ziarang pawh a inpersan daih thei bawk ang, chuti lam chu remchang danga chhuizau atan khek rih ila.

He khawvel hmachhawn a, khaw eng hmu a, nu pum chhung atanga lo piang chhuakin hringfaa chhiar ve ngei tura kan lo tel ve tawh si chuan kan nunkawng chuan awmzia mumal tak neia hringnun lamtluang a lo zawh a ngai ta a ni. Khawiah pawh piangin, khawiah pawh seilian ila, kan dam chhung ni te chu a sei emaw a tawi emaw kan hmanral ngei ngei a lo ngai ta a. Kan mizia leh ngaihtuahna pawh engti zawng pawhin danglam thin mah se, he hringnun hi awmze nei tura duan a ni.

Khawvela cheng ve tura kan pian ve tawh miau avangin kan chhuahna theuh te chu kan hnam leh kan ram kan ti ta vek mai a. Kan vanneih leh vanduai a zirin kan chenna khawmual pawh a in sawihhleih theih viau mai thei bawk. A thente chu phaizawl hmun chhamdelah te a ni a, a then chu tuipuikam tiau dup hmunah te pawh a ni thei. A thente chu thlaler ram ro takah pawh a ni thei a, a then te chu tlang ram chhengchhe tak pawh a ni ang. Tin, sik leh sa bakah boruak inlumlet thlengin a danglam hle thei bawk awm e, kan pian chhuahna hmun a zirin kan chenna ram leh hnam pawh a hrang ta nuaih thei a ni.

Vanneia siamin keini Mizote chu tlangram boruak thengthaw nuam lai tak maiah dahtu awm ang hrimin kan cheng ve tlat mai a. Kan ram leh hnam kan sawina bulpui ber chu he tlangram hi a lo ni lo thei ta lo va. Chu chu vawiin hian nang leh kei hian ka ram kan tih ve theih awmchhun chu a lo ni ta reng mai a ni. Hei lo chu vanhnuai leichinah hian ramdang reng kan nei lo va, hei lo chu buaipui tur leh vei tur kan nei bawk lo a ni.

Chu kan ram chuan hmanni lawk khan thim zing a ta, khaw eng a rawn hmu ve dek dek a, a than a la kin loh avangin a ruh pawh a la no em em a ni. Duat tak leh dim dawih taka enkawl ngai a la nih avangin than kin tawh ruhkawl nena hmeh rem chi lah a ni lo. A chhunga chengte pawh chuti bawk. Kan pi leh puten hmanni lawkah khawveng eng an rawn hmuh ve chauh avangin an hrin an tu leh fate pawhin dinhmun ngialnghet leh mize puitling tak kan neih hmasak zet he hnam ropuina tur hmanraw pawimawh ber a ni.

Hnam upa leh fing zawkte chu ngaisang teh lua lo mah ila, an chimrala kan awm mai loh nana kan inhmakhua erawh kan tih hmasak ber tur a ni. Pawn lam landan chauha an ruala ke penin chhungril lamah kan um phak leh si loh chuan boralna lamtluangah kan in hnuk lut thei a, kan dinhmunah lungawi lovin kan nihna pawh kan zahpui hial thei a ni. Chuvangin an ni tana thil pawi lo, keini tana pawi tlat si te, an ni tana khap tul lo, keini tan erawh khap tha zawk tlat te, an ni tana pawi lo, keini tan erawh pawi thui tak te a va tam em. Chuvangin Baibulin a sawi angin engkim ka tan tih a thiang a, mahse ka tan tih vek erawh a tha lo ve, a tih angin inven rukna leh inhmakhua rukna thinlung hi kan put a la ngai tlat a ni.A bik takin, thiamna leh finna lamah te, huaisenna leh taimakna kawngah te, hmeichhiat mipat kawngah te leh sakhuana kawngah pawh inthlah dul a hnekin tan kan lak sauh sauh a tul tak meuh meuh a. He kan ram riangte hi zaidam tak leh hmangaih taka enkawltu a neih phawt chuan a chhunga cheng Zofaten puitlin hun kan la nei ve chek ang.

vawikhat pian ve manah mahni ram leh hnam tana thil tha hnutchhiahtu nih chu kan damchhan a ni dawn lawm ni? Nang leh kei hian kan ram leh hnam tan eng emaw kawng zawng talin thil tha kan tithei tih hria ila, kan puanvente sawichhing ila, kan theihna kawng theuhah Zoram tan enge kan tihsak dawn le? Khawvela thil tha tituten hriatreng an hlawhna chhan chu thil tha tih kha an damchhana chhiar a nih vang chauh a ni. Chungmite chu thi tawh mah se, an nung reng thin.

13 comments:

  1. Hotupa, Ngaihnawm e, as usual!

    Ni e chhung lam takna nei silova, a pawnlai chin-ah chiah hian hnam changkang zawkte hi kan copy zel mai ang tih chu hlauhawm tak ani.

    ReplyDelete
  2. Hotupa..ni khawp mai, vawi khat piang a vawi khat thi tur theuh kha kan ni a...khawvel in eng ang in nge min hriat reng ang tih hi ngaihtuah fo atha ve khawp in alang asin...william shakespeare ka hria a, a dam hun lai a England Lalpa erawh tunge ka hre tlat lo thung!!

    ReplyDelete
  3. Zorun... a fuh lutuk, a thu nen pawh a inhmeh thlawt. Mahni ram leh hnam tana thil tha hnutchhiah chu kan tih tur dik tak ani. Mahni hnam zia chhawm nung zel tur a tan kan lak erawh a tul viau mai.

    ReplyDelete
  4. Amen!

    "Kan mizia leh ngaihtuahna pawh engti zawng pawhin danglam thin mah se, he hringnun hi awmze nei tura duan a ni..." Amen !

    "Nang leh kei hian kan ram leh hnam tan eng emaw kawng zawng talin thil tha kan tithei" Amen !

    Hotupa, sawi tur dang ka nei love, 'Amen' tih mai loh zawng..

    ReplyDelete
  5. @Sekibuhchhuak, ni e tiraw, changkanna zawng zawng hi kan hnam tan a hrisel vek lo tih hi hriat tel a tha khawp mai.

    @avena, hotupa, a ni ngawt mai. Kum tam tak a ral hnu pawha kan la hriatreng chhan hi thil tha an hnutchhiah vang chauh a ni thin si a.

    @Geminiboyz, thanks. Ni e, kan tawng ka thiam that mumal loh hun hun hi kan hnam pawh a boral hun chu a ni deuh mai a. Infuih thar kan mamawh khawp mai.

    @Zaia, hotupa, mi lo tawmpui tih ka hriatin ka phur sawt mai. Ka lawm e.

    ReplyDelete
  6. Hotupa, a ropui thi hle mai. Ram leh hnam vei lo thalai chuan amah pawh a in hmangaih thiam lovang. Ram hmangaih lo chuan midang hmangaihna pawh a tlachham a ni. Nang zawng, ram hmangaih a, veitu i ni. Thalaite rilru chawk phur a, hruaitu ni tlak i ni!

    ReplyDelete
  7. Pathian thua kan sawi fo thin, Belvawttu leh a kuta hlum awm ang hian, Ram pawh hi a chhunga chengte a zirin a hmel lan dan a dang lam mai thin ani.

    ReplyDelete
  8. @vana, ekhai hotupa, eng kan nih loh hi, kil khat atang hian ka chek ve tlawk tlawk ringawt, tih theih erawh a tlem hle si. Ni e, vei tur vei si lo hian, vei loh tur lamah ka rilru a peng hma zawk si thin sia.

    @Puibawiha, a ni ngawt mai tiraw..a chhunga chengte hi a sawi danglam theitu ber te chu an ni lawi si a..

    ReplyDelete
  9. Hotupa, 'I'm speechless' an tih ang deuh hian ka awm!! :)

    ReplyDelete
  10. A tha hle mai i thil ziak chu hotupa. Thih tawh hnu pawha thu sawi zel nun hi nun ropui chu a va ni em! Engtia rei nge kan dam tih aiin, engtiangin nge kan nun kan hman tih hi a pawimawh ber zawk chu a lo ni. Ropuina dik tak hi thiamna leh hausaknaah a awm lo va, midang tana kan nun leh hun kan pek danah a innghat zawk si a.

    ReplyDelete
  11. a haa..... i ziak tha thei em mai!!! ka comment tawh rih lo mai .. he he

    ReplyDelete
  12. @luliana, heheh hotupa.. Mizo idol thlanlai mi tihrechhuak e..:)

    @Faka, hotupa, i han tuihnihna hi a dik lehzual awm e.. Ni e, dam rei leh rei loh lam aiin kan damlai ni kan hmandan hian kawngro a su tam zawk fe a ni ang. Mizo history ah pawh mi ropui leh ropui lo tehna hi dam rei leh rei loh lam aiin a dam hun chhung an hmandanah a innghat ve viau tho mai. Khawvel miropuite pawh chutiang zel chuan..

    @hairihai.. thanks.. i blog hi ka han lut dawn a, a ka blank rih a nih hmel.. han update ve rawh khai..

    ReplyDelete
  13. dam chhan..?
    I sawi ang deuh khian mirhing rilru put hmang a in ang lo bawk in kan damchhan pawh hi a in ang hmel loh hlawm e..

    ram hmangaihtu te: hnam tana thil tha tih.

    sakhaw mi te: hun pum ah pathian rawngbawl.

    thil pakhat, dam chhan sawi tak ah chuan ka roomate Pa hian ti hian a sawi thin..chaw hi kan dam chhan a nih vangin, puar taka ei tur..a ti thin..!! a dam chhan kha mak ve deuh asin.

    ReplyDelete