Saturday 14 March 2009

Nangma Tan Chauh

Lenna tlangte lo dangin, tuanna mualte a lo hrang zo ta. Siktuithiang dawn a, a tlum a hang eibil mai lo va, sem sem dam dam kan tih thin lai te kha hmanlai an chang zo ta. Nunhlui mual liam hnu ngaia luaithlipui nul tak ka nap hial. Aw, khuahmuna len loh zawng tawrh thiam a har thin ma nge. Hlim leh lawma kan lenlai ni te chu tawnmang mawl mai an lo chang zo ta si. Dar ang intawn leh nan lamtluang a thui lua ka ti. Chhawrhthlapui van zawla a lo eng chang te hian awmkhawhar lunglen a hril chhuak lo thei si lo, laikhum belin riahrun rem zai rel thin mah ila, zan mut chhin zai reng ka rel thei si lo, ngaihlai bang lo nang zuna uai chu thlafam chan hial ka nap thin a, hei lo liama damlai pialral awm tak maw. Aw, tawnmangah tal hmuh che ka nuam e.

A ni, mariaktea ka run riangte ka nghah chang ni te hian awmhar lunglen a zual thin a, ka perhkhuang leh zai rimawiten min hnem zo ne maw! Nang tel lo va he hringnun hmachhawn tur hian mi phal suh la, i sakhming tel lo hian dawnlungruk a kim thei mawlh si lo. Kei ka duhaisam kumtluang samang inthen lo tea i tangnem bei hun ka nghakhlel em e. Ka hlimna leh ka lawmna tikimtu, ka lungngaihna leh khawharna thawidamtu chu nang ngei hi i ni si. Hal lo tein vul reng la, thliah loh par iangin mawi kumkhua ang che. An sawi hawilopar ianga chuai ngai lo turin khuanu'n vengin awmpui che se la, chutin Zofa thang leh tharten i par tlanin khuavel kan la chhing ngei ang.

Tunah tuanna tlang lo dang rih mah se, thinlaiah i hlui thei mawlh si lo, a thar zel thin ka thinlai rila'n. Hnam dangten i sakhming selin ankanem hlan lo che mah se, kei ka tan i mawina a danglam chuang si lo. An sawi thlang sappui nun ngai bil lo va, hmangaihte lenna Zotlang mawi ni kumtluan la, Chutin, i finna leh thiamna lo pungin, par ang lo vul zel se. I tluk sual palh loh nan i kechheh uluk la, fimkhur takin kal dem dem ang che. Chutin i hrin keini Zofaleng zawngte hian daifim leh zing nichhuak zungzam iangin kan thiam, kan finna tinrenga chawm che kan nuam a. Duah tea lo thang lianin par vul zel la kan ti. A ni, kan sakruang leh thisen pawh Nangma Tan Chauh.

20 comments:

  1. Kan tlang kan ram, kan mi kan sa te hian kan zonunmawi hi kan kal san thui poh leh kan kehchhiatna vangkhua a zau ting mai dawn a ni.
    Tuna kan tawrh mek; Hlemhletna leh sualna chi hrang hrang hi zonunmawiin a lehthal tikah kan ram chu a par vul leh ang.

    ReplyDelete
  2. eee hotupa, kei mi mawl tan hi chuan i ziah te hi hmanlai "mizo love songs" vel a ang ka ti. Thu hriatthiamloh te pawh ka nei nual :-( Mizo literature/language ka la zir miahloh vang te pawh a ni mahna, mahse ka bo angreng he post ah hi chuan. Ka chhiar chhuak vek tih tal rawn sawi tur in ka rawn comment e hotupa. i luangliam nasa viau angin ka ngai a, mahse thu thenkhat ka hriatthiamloh vang zawk te emni hetia ka ngaih, min lo hrilhfiah thei em. Thanx.

    ReplyDelete
  3. Hotupa, i va han thai ril raih raih ve le! Hei zet chu.. a message hre tur chuan chhiar chian a ngai kher mai.
    illusionaire, ka lo chhang ang che - hetiang hi sap tawngin engtin nge an sawi ka hrethiam chiah lova. Kan hotupa hian poetical word hmangin Prose a construct ni berin ka hria (lolzz) a dik em hotupa??

    Nula ngaihna lam emaw ka'n ti dawn rawk a, a lo ni leh miah si lova.. i ziak tha e.

    ReplyDelete
  4. E khai, hotupa a ril ruih ruih hle tak mai. Kan ram neih chhun hi riang teh mahse kan ngaih a bang thei si lo a nih hi ti raw! 'Romantic' hawi deuh ruih lam hi i chemkalna lam a ni hrim hrim maiin ka hria:-)

    ReplyDelete
  5. Hotupa chuh : Keipoh love story deuh ruih a chhiar ka lo tum pek a, Zoram tak ai hian ngaih dang riau neiin i phuah a ang :)

    ReplyDelete
  6. Mizo tawng hi chu i hnehsawh ve ngawt mai a. Literature lamah kal law law mai teh a, i thu remkhawm dan hi a mawi thei khawp mai. English leh Mizo thiamtak pawn a mawina tak tak hi an letling theiin ka ring lemlo.

    ReplyDelete
  7. Lung a kuaiin a ngaihnawm e.

    Hotupa hetiang lam hawi hi tunlai chu i post ta fo mai a, turtu tha deuh hi a awm aniang a!
    :-)

    ReplyDelete
  8. Kan hotuten min lo chhiar sak liam liam thin a, keia thuziak tlawm tak a karah fakna ka han dawng thin phei hi chu ka lawm tak zet a, ka phur phah thin khawp mai.

    Kima of Sandman zawhna erawh hotupa Zaia hian a chhang dik viau a, sawi nawn ngai tawh lo mai se la, Mizo tawng upa leh thuun tam tak hi hriat thiam chuan a ril em em a, mahse hriatthiam loh erawh chuan a buaithlak thei fu mai a, keipawh ka hriatthiam aiin thiam loh hi a la tam zawk niin ka hria. Ka inzir ve mek zel e..:)

    ReplyDelete
  9. Tha hle mai...Nula tan emaw tiin ka chhiar a.."Umm~~~ PU Zoruna hian a NULA lehkhathawn a rawn post nih dawn hi "...tiin ka'n ngaihruat te te a...ka chhiarthla zela...ekhai !!! NULA pakhat tan mai zawng a lo ni hauh lo mai...HNAM PUM huap a lo ni zawk ...tih ka hre leh zela...tha ka ti triah2 khop mai...

    ReplyDelete
  10. Chhiar nuam tak, thuchah tha tak keng tel bawk si, thuziak hlu tak a nih hi..

    Hetianga thu han thluaithlum vel hi i hnehsawh riau mai, kei chu tawng un deuh han hmanzawm zat hi ka thiam ve der lo nia...

    ReplyDelete
  11. A ril lutuk a kawchhung lam a fan deuh raih raih in ka hria :)

    A ngaihnawm, hetiang lam hawi hi rawn chhawp chhuak zel teh khai hotupa :)

    ReplyDelete
  12. @virgine_girl, thanks. I dam thin a?

    @zovala. I tilawmawm thin e. Ni e, love story emaw an tichawk a nih hi kan hotute pawhin..:)

    @luliana, ekhai hotupa, va tilawmawm ve.. hetiang lam hawi hi rilrua a luhlai loh chuan a har khawp mai, ka hul tlat pek thin a. Mahse rawn tih zauh zauh ka tum ang e..:)

    ReplyDelete
  13. Thianpa: i phuahchhuak nalh khawp mai. Chhiar a nuam khawp mai.

    ReplyDelete
  14. e Hotupa Zaia te pawn min rawn hrilh fiah a, a lawmawm e. A ril tih chu ka hria, mahse a ril dan kha ka rawn sawi thiamlo a nih ber hi. A tha e, tiang ang hi rawn phuh chhuak leh zel te hotupa, chuan keini ang ten kan lo zir ve thei dawn a lawm.

    ReplyDelete
  15. e U Puia chu nang ni hi i ni...Ram leh hnam hmangaihtu dik tak chu....!

    ReplyDelete
  16. @EPISTEMOLOGY, thianpa, ka lawm e. Hun neih ang zelin ka la rawn ti leh dawn nia.

    @illusionaire, hotupa, ni e, rilru luh laia ziah chhuah loh chuan han tih mai chi pawh a ni lo, keini ang tan chuan. Mahse, i fuihna angin rawn tih zauh zauh erawh ka tum ang e.

    @Awzzman, ka nau, ka lungdam mah mah e...Nangni thangtharte zarah hma kan sawn zel ang chu.

    ReplyDelete
  17. I trawngkam thiam anga thiam ve lo leh trawng upa vak thiam lo tan chuan love story emaw kan ti trep mai lawm mawle.. a tawi fel in a a thu nalh khawp mai!!

    ReplyDelete
  18. Babylon luikamah...chutah kan thu a...tih nen a danglam hranpa lem love. A saptawng takin from a distance hian awmzia a lo nei thuk khawp mai. Kan chan chauh hian thil hlutna kan hre chauh thin a. I hla dah ho hian lung a tileng e...

    ReplyDelete
  19. @puii, chuti em ni.. ka nau thin hi chu aw.. i timah mah lo maw..:)

    @Raldawna, Ni e, tiraw, a taka han tawn chiah hian Babylon luilama an tingtang te a ban ang deuh khan, mi ramah chuan lungawi taka awm mai chu a har deuh a nih hi mawle.

    ReplyDelete