Wednesday 18 February 2009

Sateek-ah Palai

Palai han tih hian Inkhawmpui palai te, Buaina avanga inremna siamtu palai te leh Nupui/pasal chungchanga palai te hi Mizoten palai tih kan hman tlanglawn deuh te chu an ni mai awm e. Tuntumah erawh chuan nupui/pasal thua palai kal chungchang leh a kaihhnawih tlem ka han tarlang ve thung dawn a ni. Tlangval laia nupui/pasal tuahrem chungchanga palai hna han thawh chu a tlangval hna chiah lo a ni lo mai thei e. Mahse, tirh ka ni ve miau si a. In sit hle mah ila, chhungkaw aiawha tirh kan nih ve miau si chuan kan kalchhan ber "Insawirem" chu kan hmachhawn tur a ni ta mai si a.. A hmasa ber leh a vawikhatna a nih angin a khawr theih hle mai.

Hmanni ka aizawl cham chhung khan ka thianpa nauin nupui neih a tum avangin a bialnu te khua Sateek-ah palai hna thawkin tumhnih ngawt mai ka zu kal a. Aizawl to Lunglei Lamlian siala hnathawkte an lo hmanhlel lai tak a ni vei nen, Bike-in vaivut khu tak leh lungrem khawrawk tak karah chuan eng emaw ti tiin kan in khalh thleng thei hram a. Aizawl atangin darkar 1 lek emaw kal a ni na a, kawng an lo siam lai tak a nih avangin beisei aia rei kan tlan a, kan bal hle bawk a ni. Mahse, he kawng hi an siam zawh hunah chuan aizawl leh lenglei inkar kawng that dan tur te ka ngaihtuah erawh chuan a phurawm khawpin ka hria. Mipui tan chhenfakawm a la ni ngei ang. Sawrkar pawhin he kawngpui siam mek hi uluk lehzualin enkawl se la, he kawngpui hi a la pawimawh tulh tulh dawn si a.

A vawikhatnaah chuan kan hlawhtling mai lo va, a la naupang si a, B.A te han zo ve te te se la, a hrim hrimin chhungkua pawh kan lo inrawn khawm ve ang e tiin tawngkam tha tak nen chuan kan inthlah tho tak na a, kal leh chakawm em em tur chuan min mangtha chiah lo em ni chu aw ka ti rum rum a, nuber lah chuan, a reng rengin palai te chu upa deuh hlek an intir a ni ngai a, in rawn kal naupang hlawm reng reng lutuk mai, a ti fiamthu deuh bai bai bawk si nen, an mi tiam nia han kal leh pawh a chakawm lo ru riauin ka hria a. Mahni lo maha nula rim duh vei nen zankhat pawh kan ui tuk mai a ni si a. Mahse, ka thianpa hian mi ngamtlak bakah kan lo kal ve uk tawh si avangin kal nawn leh tur zingah pawh chuan min telh leh ta tho a. Tichuan a vawihnihna atan Sateek khua chu kan pan leh ta a. Kawng a khuk thin em avangin Motor nen kan kal a, ka la rui zui lehnghal a. Luhai burin Sateek kan thleng thei a. Fiamthu-in kei chu ka um chanve der mai a nih hi mawle, ka ti a.. kan nui dar dar a.

Chhungkua an lo inrawn khawm tawh bawk a, tunah chuan kan nih nih kan ni thei tawh ang chu kan ti a. Ka motor rui luhai bur mai tihreh nan ni pah fawmin thlifim hip pahin i chhuak lawk teh ang tiin ka thianpa nen chuan engmah sawi set set lo chuan kan va chhuak lawk ang e, kan ti a. Kan chhuahsan a. Kan kal zel a, Sateek Presbyterian Biak In kawt lamah kal zelin hmanlai Seteek Lal ni thin Lianphunga Bung awmna te chu kan hnaih ta hle mai a. He Bung hi Mizorama Bung lian ber a ni nghe nghe. Mahse, kan va pawh hman ta chiah lo va, a tawpni te a ni tawh bawk a tiin Ar lei tur kan zawng pah fawm a. An zawrhna kan hre mai si lo va, intin kan zawt kual a ni ber mai. In pakhatah chuan Ar an lo ngah khawp mai a.. an lo chhangchhe hle mai bawk si a.. fiamthuin fa in neih leh hun chu a hmingah "Artluangi" phuah nghe nghe teh u, ka tifiam a, kan nui bawrh bawrh hlawm a, kan duh anga lian tha tak mai Arpa kan lei sak a.. kan khai chho a, kalkawnga naupang tualchai ho han hmuh te chuan lung a tihleng duh hle mai. Kawng sira Arnu leh arpa han inchhai khat khat hmuh ngat phei chuan naupang lai min tingai zual fo thin, tichuan Ar chu talhin ka puah te te a, kan hlim tlang ta viau a.

Tichuan, kan kalchhan ber thutawp sawiho pawh chu Arsa chhum lai tak hian kan tan ta a. Rin aiin an lo inhawng a, kan beisei aiin an nem ta bawk nen, kan duh ang ngei chu min tihhlawhtlin sak an intiam ta a, a ni erawh kan ruat nghal ta mai thei lo na a, a thu chuan kan insawifel thei ta a.. ka phawk a chhuak pek a, fiamthu ka thawh ta zel a, kan nui deuh dar dar reng a, tlai lam dar 6 vela hawn tum kha dar 8 velah pawh kan la hawng hlei thei ta lo va, aizawl lama nula rim pawh chu kan thulh ta bawk a.. fiamthu karah thutak deuh pawlh chang a awm a, Power(Electricity) pawimawh zia te leh Aizawl leh Thingtlang inkarah danglamna lian tak ei leh bar bakah nunphung leh zirna thlenga hmanraw pawimawh tak a nih tur thu te pawh ka sawi a, intodelhna hmanraw tha tak chu electric hnianghnar neih zet a tul thu te pawh ka sawi a, an Amen viau chuan ka hria. Tin, mi dilchhut tak mai ka lo ni vei nen, an pitar ber kum 90 mi vel chu hmanlai thil ka zawt a, Sateek tih hming a lo put dan te, an khaw thenawm Aibawk khua a lo pian dan te leh MNF ramhnuai mut laia Sateek khaw mipui tawrh dan te bakah Sateek khawpum mai a kang fai vek dan te ka zawt a. Tin, hmanlaia an lal te chanchin phei chu lehkhabuah kan lo chhiar nel nual tawh bawka, a ngaihnawmin a hunlai chuan an lo tuar nasa ngei mai.

A tlangpuiin MNF ramhnuai hunlaia Thingtlang mipuiten an tawrhna zozai kha theihnghilh mai chi niin a lang lo va.. thi leh dam kara an awmdan te mit ngeia hmutute han kawm chu rilruah Capt. Thanghleia te, Capt. Thangrehlova te leh Capt. Lalthana Sailo te an rawn lang lo thei lo va. An hmuh phak tawh leh hriat thiam dan tawka Mizo hnam leh Mizoram chhan tuma an lo inpekna thuk zia te chu rilruah a thar fo thin. Palai hna kal e ti lo chuan Politic thuthlung nen a hmawr kan bawk ta zawk niin ka hria..:)

17 comments:

  1. E khai hotupa, palai riap mai maw! Mahnin neih hmaa midang tana han palai leh rih te pawh hi a tha ve viau bawk a nia. I ziak ngaihnawm phian leh nghal a hei!

    ReplyDelete
  2. Hotupa chu i tuan a rang hle mai. Nia, hei sawi ve reng rengah history-a chuang reng tur zinga mi a la ni ve dawn a ni. Tlangval palai ngei mai chu..hehehe

    ReplyDelete
  3. Tlangval laia han palai chu ! :-) A Palai tan hian Palai ve tep te pawh a ngai dawn anih hmel e a! :)

    Saw lam tlangdung saw bon tak ani, Hualgo , Melriat vela kan kal chang pawh hian, Hnathawh kawr kan ha mai thin :-) A diak lai lahin, a hlauhawm bawk si, siam tha vat se duhawm khawp mai .

    ReplyDelete
  4. Hptupa, arsa chhum lai tak maia in kal chhan in sawi khi a fuh hle a niang.

    Next-ah chuan mahni leh mahni inpalai mai a va tul tawh awm em.:)

    ReplyDelete
  5. @seki, Aizawl atangin Melriat thleng kha chu kawng a tha tawh lutuk tlat.. chak tawkin a tlan theih a, mahse a piah lam kha an siam tan chauh a, Tachhip leh Hualngo hmun vel kal pawh a nuam ngawt tawh ang. Sialsuk pawh an thlen phei mai a rinawm. Sawrkar thar hmalak chhunzawm dan a zir pawh a ni thei ang a.

    Tlangval laia palai kal chu ka tih nawn leh tawh ka ring chiah lo, a lo tihchi tehchiam dawn lo tlat..hehe

    @puibawiha, hehehe, a hun hi hriat a ngai ve thin a nia.:) tak tak a na, kan thlen hma daih tawha thutlukna lo siam tawh sa an nih a rinawm mah. Kei chuan upa tak tak palai tirh ka duh ka inring..hehehe

    ReplyDelete
  6. Palai atan hian an makpa te an tir a ni lawmi. Tlangval an tir ngai emi a ? Ka hriat vawikhatna a ni tlat.

    Ho mai mai: "Aaa ! Mama, tuna za**fawk tawhin nakin a nghak theilo" han ti pawp la anlo dawngsawng tha viua zawk chein ka ring :D

    ReplyDelete
  7. Palai lamah chuan expi nei taw bawka a lehpek chu...hre thiam mai em :D

    ReplyDelete
  8. @chhangte_ll, nia tiraw dan kan neih pangngai angah chuan tlangval intirh chu a awm meuh lo. kan upa ve ta deuh nge ni, hei in enfiahna tha tak te pawh a ang rum rum mai e a..hehe

    @Ngursailova, i hming atang chuan ka cousin ni awm tak i ni. Ka cousin hming pawh Ngursailova a ni ve a.. Nia thil reng reng hi chu tawnhriat chi te pawh hi awm ve chawk a nia..:)

    ReplyDelete
  9. Hotupa nge nge..hlawhtling leh pek hle mai mawms..7th-day tlang lam a palai kha chu ka tih ve tur ah lo dah hmiah mai rawh :))

    ReplyDelete
  10. ekhai..palai angreng deuhin ka kal ve tawh asin..mahse engmah ka sawi ve lo..:)

    ReplyDelete
  11. @avena, ekhai hotupa, chuti chu nangin thapui min thawhpui dawn a nih ngat chuan lawmin kan zai mai ta lawng..:)

    @hruaia, keipawh sawt ngam pawha inring lo kha a tulna avangin ka han sawi ve hram chauh a ni. Hetiang lam hawi hi Mizote hian tawngkam bungraw hran deuh kan lo nei a ni tih ka hre ve chauh niin ka hria..:)

    ReplyDelete
  12. Ka palai hmuh ve chu amah leh amah a rawn in palai mai asin, mahse a tluk lo deuh che aniang a hlawhtling lo tlat hahaa

    Nang pawh Kawng khat chiah i bak tawh e... a tawpah tih HUK

    ReplyDelete
  13. Mahni ta tur pawh nangmah ngei i palai keuh anga ni mai alawm...hihi..training i nei tawh bawk a

    ReplyDelete
  14. Palai tirh ve a ngaih hun ah chuan biak dan tur kha i hre sa thlip tlep tawh awm sia, i palai tirh te kha i hrilh lawk sa tlap thei dawn a nia, expi nei tha bik hle mai. :)))

    Zofest a i thusawi lai pic ka nei a, i duh chuan ka lo thawn dawn che nia auh!!!

    ReplyDelete
  15. @varte, ekhai i rawn luh ve teh mial le.. mahni in palai mai chu a tha phian ang a, mahse hlawhchham palhin.....? hehe tih Huks hi Masi kan hmang hnem tulh tulh a, kan hreh tulh2 dawn a ang ta riau mai..

    @luliana, ekhai hotupa, exam chu i chhang tha bawk ang chu maw.. Durtlang ka rawn leng a, rilruah i lo lang a, mahse in awmna ka hre si lo. January khan a ni a, Guwahati lamah i chhuk leh tawh mai thei bawk a.. inhmuh ho a chakawm nen.

    @wonderboy, ekhai hotupa, chibai, thlalak chu i remchan chuan ka duh khawp ang. ka email: lpsailo@gmail.com a ni e. Palai lam chu i tan kan lo sial lawk a ni ber e.. a tul dan a zirin avena nen pawh kan kal hreh lovang.. a neih ber turah khan han chiang phawt la...:)

    ReplyDelete
  16. This comment has been removed by the author.

    ReplyDelete
  17. Hmanlai chuan Sateek tih hi an la phuah lo in ka hria.... LIANPHUNGA SAILO HUN LAI KHA CHUAN ...PHULPHUI KHUA TIH NI IN KA KHRIA TUN HNU AH HI chuan SATEEK KHUA Ti in an phuah leh daih sia SAILO LAL te kha lo tho lh ta se.... Mak an ti ngawt ka ring a ni....ani.....😀😀😀

    ReplyDelete