Monday 2 June 2008

Tuipuiral Mo

Thanglunghnemi zai kan ngaihthlak chuan "Zofaten kan fan a ril tual tual" tih te Isua'n khawvel hi a dengchhuak ang' tih te kan hre thei ang. Chutiang zinga tel ve ngei tur chu Rodawngliana (RD) leh Karin te inneihna hi a ni ve ngei ang. Mizoramah ropui takin an lawm tawh a. Chu mai chu duhtawk mai lovin, Karini awmna ram leh khua ngeiah a chhungte leh thenrual tha bakah a thian tha ten lawmna neih ve leh ngei an duh tlat a. Chutiang khawpa lawmpuina thuahhnih ngawt mai atan zawng kan Mizo tlangval hian a phu chiahlo kan ti a nih pawhin makpa ngainat awm leh mifel tak fapa thar tluka an en theih RDa hian a phu ve bawk a ni ngei ang.




An rawn thlen hnu reilo teah sawmna leh information an sem chhuak a. A ni atan 31/05/08 (Inrinni) ruat a nih ang ngeiin a hun taka sawm bik te leh mipuite an thleng kim vek a. Tan hun atana ruat sa tlailam dar 3:30 a rit hmain mipui te chu Biak In chhungah kan kim vek tawh. Ngawi rengin Biak In chhungah kan thu thup mai a. Ngai teh, pawn lam atang chuan naupang duhawm tak tak pathum te chu rawn lutin parpang hnahmawi chitinreng te chu biring vawrh an sawi ang maiin RDa leh Karin te kalna tur carpet sen chungah chuan an theh til ar ar mai a. Mopa leh Monu ten an rawn zui nghal bawk a. A inchawih mawi ngei mai. Mipui kan ding thup a, Mopa leh Monuten an thutna tur an thleng fel chiah tihah a rualin an thu thup a. Thupuangtu'n hun hmandan tur a puan hnuin zaina nen hun hman hmasak ber a ni a. Music a tha bawka, zai a nuam ngei mai. Hla hruaituten an zir vawng zawk nge ni aw phak bakah zai rin palh pawh awl tak a ni.


Tichuan, Churh pastor'in Thusawina hun a hmang nghal deuh mai a. Englisha lo let turin South African nula fel tak mai ruat a ni a. A aw a fiah thain a english a nalh bawk a. Ngaihthlak pawh a nuam kher mai. Pastor hi pastor la thalai tak mai a ni a, fiamthu thiam tak leh thusawi thiam tak a ni bawk a. Boruak a chawk zangkhai thiam a, a kar lakah fiamthu a pawlh zauh thin avangin kan nuih dar dar chang lah a tam. A hmasa berin; Inneih vawihnihna kan hmang dawn a, hetianga vawihnih nupui leh pasal angkhat tho, hmun hrana inneihna siam that leh a ni hi a danglam hrim hrim a, a ropui bik a ni, a han ti a. Tin, RDa hming pum a han lam dawn a, a sei tha ve ang reng sia, Lalrodawngliana han tih tuah mai chu lam dik a har ngang a ni ang, RDa tiin kan sawi zel mai dawn nia a ti ta a. Mizorama an lawm ropui dan te, an lo ngaihhlut sak dan te kan lo hria a, thlalak leh film ah te kan hmuhin Mizoram mipuite leh kohhrante kan ngaisang a, an zing tel ve pawh ka chak hle a ni, a ti.

Ram hrang leh hnam hrang daih mai innei ta chu kawng leh lam taka ngaihtuah chuan thil mak tak a ni ve thei a, eng emaw zawng tak chuan a huphurhawmna chin pawh a awm ve thei ngei ang, mahse, nang leh kei hi Krista-ah chuan pumkhat, hnam khat kan lo ni tawh a. Jentel an awm tawh lo va, Juda an awm chuang lem tawh hek lo. Mingo leh Mihang te, Asian leh Indian te pawh Isua-ah chuan angkhat vek kan lo nih tawh avangin kan Culture zia leh NUnphung te chu lo inang vek lo mah se, Isua kan rinna avang zawk erawh chuan engkim hi theih loh a awm lo va, a ni thei vek a, a tha thei vek a ni, a ti a. Harsatna leh beidawnna a lo awm fo ang. Chung te chu hnam khat leh hnam khat, Culture thuhmunah pawh a awm thei vek a. Inthenna leh inhauhna te pawh a thleng thei vek a ni. Mahse, Isuaah erawh chuan engkim hi a fel thei a, kan innghat bur mai tur a ni. A theih hram chuan zanah in mut hmain in nupain tawngtai dun ziah turin ka fuih a che u. a ti a. Heng bakah hian fuihna thu tha tak tak a tam a, kan tarlang seng lovang. A thusawi zawh hian Karin u mipa a solo a, RDa hian nalh takin Harmonica a ham sak nghe nghe. Mizorama Praise & Worship leh Youth Mission vela Harmonica hamtu ber a lo ni thin bawk a, thiam an ti hlein ka hria.


Tichuan, a thusawi zawhah chuan ruat bikte tawngtai tura koh chhuah kan ni a, Karin-i pa, Kei, South Africanpa leh Pastor te chu a inchhawka nupa tuak tharte tana tawngtaina nei tura tih kan nih angin mahni tawng ngeia tawngtai ni thei se tih a ni bawk a. Ka tawngtai hma lawk hian pastor hian Mizo tawnga tawngtai kan ngaithlak nghal dawn e, a han ti zauh a. Tichuan min sawm hmasa ber a, Pathian hnenah malsawmna leh lawmthusawina te kan dil hnuin midang pawhin an tawngin an chhunzawm ve zel a, a tawp berah Pastorin a khar a, kan zai hova, tichuan refreshment ei turin chhawng hnuai lamah kan chhung thla a, Theirah chi hrang hrang bakah In chi chihrang hrang a tam ngang mai a. Chutiang zingah chuan Champaign te pawh a awm a.


Tin, ka mi hriat ngai loh, Ngo vuh mai sambuang deuh chhap nula thenkhat chuan Mizo tawng tlem a zawng an lo thiam a, Mizoramah an lo zin ve tawh thin lo niin, a then chu Mizo chhas nei te an ni bawk a. Keipawh chu min ngaina nghal deuh mai a. Kan ti ti ho nasa hle. Chung ho chuan ka hming pawh hrilh nawn ngai lovin an ko fiah thiam nghal mai a. An ngainat awm duh khawp mai. A then chu Venghluia lo khawsa ve zawk te, a then chu Chaltlang te, a then chu Republic vengah te an ni hlawm a. Mizoram nuam an tih thu leh kal leh an chak thu te pawh an sawi chamchi a. Thil mak tak mai chu Pastor leh heng mo lawmnaa rawn kal zawng zawng te hian India ti lova Mizoram an ti direct nghal tawp mai hian ka ngaihtuahna a tithui hle a. Mizoram chu ram bung pakhat ang maia ngaiin Mzoram a ri chhen mai a ni. Lawmawm ka ti hle.


Inthiarna In leh hmun khawi emaw lai reng rengah RDa te nupa hlimlai hmel thlalak tar a ni thlauh mai a. Tin, a duh apiangte tan Guest Book changkang tak dah a ni a, a sir lawkah Camera man a lo ding a, a hmaah chiah hian Mizopa leh Mizonu inthiam lim lian pui mai dah a ni a, a lu ah mahni lu rawlh theih mai turin an kher kua a, thla an lak pui luai luai mai a. Heng thlalak te hi Guest Book ah chawp leh chilha tarin, thu tha tak tak an ziah hnan a. Hetianga Mizo thuam leh Lim nalh tak maia lo buatsaihtu leh a nachang lo hretu hi a ngaihsan awm a, Mizo nih a tinuam a, Midangte pawhin Mizo thuam an lo hriat ve phah a ni.


Tichuan, thlalakna hun te inkawm khawmna hun te darkar khat chhung lai mai kan neih hnu chuan Programme chhawng hnihna tan a lo hun leh ta a. Dar 6:00 chiaha tan tur an tih ang ngeiin kan kim leh thap mai a. Aizawla an inneihna video te thlir hovin, kan ngawi thup a. Chumi hnu reilo teah ei leh in buatsaih a ni ta a. Mikhualte hi an kilna tur dawhkan ruat fel thlap a nih bakah an thutna turah present te takah RDa leh Karin-i te thlalak dah vek a ni a, chutah chuan a thu turte hming pawh ziah thlap a ni. Kei pawh Monu leh Mopa te chhungkaw dawhkanah ka tan thutna min lo buatsaih sak a, Mizopa tih takah RDa nen hian Mizo tawnga tawng zauh zauh kan ching hle. Kan hnam zia nge ni, nuam kan ti tlat thin alawm mawle. Tichuan Monu Karin chuan mikhualte inhmelhriattirna neiin an lo kalna te a sawi hlawm a, London atang te, Holland atang te, Germany atang te, a then chu Sweden atang te an ni hlawm a. Kan inpawlh nuk a nih ber chu.
Sambuang chhas an ni thum hlawm bawk a. Keini Mizopa hmel ang pu chu RDa leh Kei chiah hi kan ni a. Indian South African inti Vai pakhat a awm ve a. A hmel a vai tih loh chu thil dangah chuan a sap vek thung a. A nupui pawh sap a ni. Chaw ei hma hian RD-a chu tawngtai tura sawm a ni a, Sap tawngin a ti ang chu ka lo ti rilru a, mahse, Mizo tawngin a rawn bei veleh ta daih mai a. Mizo nge nge kan ropui thin e..:) Dinner thuihnai tak kan ei ho hnu chuan Mizorama lo awm ve tawh thin Sap nula pakhat chuan min hrilhru a, Mizo hla "Han thlir teh u, Ka Lal Kross khi' tih hla chu zan lam programme a sak pui turin min sawm a. Ka phur teh lul nen, a hnuah Sana ka han en chuan Dar riat a lo kawk ta vu si a, ka hawnna tur kha darkar hnih dawn lai kal a lo ni bawk si a. Tichuan, RDa leh Karin hnenah hrilhin midang pawh hrilh buai ta lo chuan ka hawn san ta hlawm a.


Ka hawn kawngah ka ngaihtuah chet cheta, ropui ka ti tulh tulh a, Pastor thusawi te, Karin nu leh pa thusawi te leh Mizoram lo zin ve tawh nula thenkhat ka ti ti pui atangte chuan ngaihtuahna tam tak a lo lut a. Bangalore ah te, Tamil Nadu ah te lo awm kual tawh thin Karini pa hi missionary a ni a. India ramah kum rei tak ka awm ve a, Mizoram hi ka lo hmelhriat ngai lo va, a hming pawh hi ka hre ngai meuh lo va, kan fanu'n pasal a neih dawna Mizoram chanchin kan han chhiar a, kan han zirchiang chu kan tlangnel nghal tawp mai a. Kan han zin chho a, mipui mimir te thatna leh hawihhawmna te chu mak kan ti a, nuam kan ti a ni. An ti a.


Nula thenkhat te pawhin nuam an tih thu leh remchang hmasa bera zin an chak leh thu te an sawi a. Mizo tawng an thiam tawk; I dam em, thingpui i duh em, khawiahnge i kal dawn? etc.. te chu pai miah lovin an sawi thei a, kan hlimpui phian mai a. Mizoram sakhmingin India a luahlan a, Mizoram chu ram nuam leh ram danglam tak a nih thu te, ei leh in bakah culture leh sakhuana thlenga a danglam em avanga a mi chengte pawh kan ngaina nghal mai thei a ni, an tih te ka han ngaihtuahin 'Mizo ni bawk, Kristian ni bawk te aia vannei hi khawvelah an awm bik tawp lovang' ka ti rilru hial a ni.





RD-a nen hian March thla khan Aizawlah kan inkawm tawh a, kan inhriat dan pawh hetiang hi a ni a. Ka thianpa kawm ngeih tak Zohmingthanga, MPS chu Chanmari venga an naupan lai zawng lo awm thin, RDa te nen pawha in hre tha tak leh inkawm ve fo thin an lo ni a. Chumi zarah chuan RDa nen kan inhmelhriat a, phone ah te inbia in kan inhmu ta kha a ni a. Tin, Chanmari venga ka thianpa C.Laldinliana (Kingkonga/Dina) chu RDa thian tha ve tak a lo ni ve leh zel a. Chung te avang chuan RDa nen hian kan in nel nghal deuh mai a ni. RD-a hian Durtlang Hospitalah hna neiin aizawlah an nupa hian an khawsa a, reilo teah Zoramah an kir leh dawn a ni. Aizawla mi hrilh tawh ang ngeiin a vawihnihna atana 'Tuipuiral Mo' lawmna chu tluang takin kan nei thei ta a ni. He mi ni hian "Mizo" tih hi a lar hle a. Mizoram tih pawh mipui mimir te hmelhriatdan a lo ni ta a. Mizo takin kan lawm a, Mizo takin ropui kan ti e. Nupa tuak thar RD leh Karin ten Pathian malsawmna lo chang zel se.

21 comments:

  1. hre ve ngai lo na in "Congrats" ti ve top teng..hehehehe

    ngaihnom thin dup2 ma nge

    ReplyDelete
  2. Keipoh congrats risk ve thruai e :P Pasal ka neih ve hun chu monu kor ang hi ka duh, a var tle sut lo, simple deuh si mahse mawi si zia khi. Pastor thusawi chu ka ei zawng a nih hmel hle mai, rinna angkhat hi poimoh ber maiin ka hria, thildang a poimoh lo tihna ni loin.

    ReplyDelete
  3. e, inneih lam hian a kam che ang ka ti. RTPA pawn a nei tawh sia, Mo lawm te hi kan hnaih ve tawh lo maw?? Invitation chu ka lo beisei ve ringawt mai lehnghal .lolzz

    ReplyDelete
  4. @almost unreal, Mizo gospel music video te i thlir thin chuan a hmel i hmu tawh thin ngei ang. Harmonica a ham thin.

    @jerusha, nia tiraw, pastor thusawi hian keipawh ngaihtuahna mi tithui sak khawp mai. Mahse kei chuan Zolanu ngei ka la ti fan. Monu kawr hi simple tak siin a nalh riau tiraw.

    @azaia, hehe, neih ve mai pawh a chakawm rum rum tak a sin. kan naupang chhe lutuk tawh bik si lo va, ka ti roh roh a, ka lung te pawh a chhe lek lekin ka hria..hehehe, invitation chu lutuk. Nang phei chu Lalthakima hla sa in i zai ngei ang chu le.

    ReplyDelete
  5. Hotupa he thil chu i tih ve hun a han chetdan tur poh min suangtuah tir e. Enge nupa tuakthar tan chuan i han chham sak reng2 a?

    ReplyDelete
  6. Ekhai Sir (Sawmpuia), nia tiraw, ngaihtuahna a kal thui duh khawp mai.. chutiang chuan ti ve ta ila, chutiang chuan sawmpuia neih hunah chuan inthuam ila, chutiang chuan avena neih hunah chuan zai tur ruat fel thlap ila, etc..a tam mai a. a tawp berah phei chuan hotupa amuana neih hunah phei chuan screen lian tawkin tui chhunga inpawm kang lai te kha han tarlang vuh mai ila, tih te thlengin ngaihtuahna a lo chhuak a..:)

    Tawngtai chham kha chu thlarau lam a a ro ve ang reng sia ka by-heart hmasa a. Bahlah lutuk lo chuan ka tlingtla hram. Aw Lalpa kan Pathian, I mi venna leh enkawlna avangin i hnenah lawmthu kan sawi a. Tuipuiral ram hla taka min hruai thlengin vawiin hian RDa leh Karini te chuan i hmaah lo kunin i hriatpui nupa ni turin i hnenah kan hlan a, nupa tuak hlim tak, Mizofate leh khawvela a mamawhtu apiang te tana malsawmna hnar leh belh bul tlak nupa lo ni turin awmpui la, malsawm ang che.. etc..

    a sei fu..

    ReplyDelete
  7. eee Hotupa, a va nawm hmel ve, ka awm ve chak khawp mai. i thianpa RD-a chu min lo wish sak ve ngei dawn nia. A hming an han lam tum vel chu ka hre ve chak :-)

    Almost-i khian a hre lovang tunge a nih... gospel music lam chu a thlir ve vak ngailo. A en a piangin, a vun a rawn thak vak tan a, a kang tep zel... Gospel lam hrim hrim nen contact a neih vaih hi chuan... i hriatthiamna ka beisei e hotupa...

    ReplyDelete
  8. Hotupa chu hman ni lawk ah nula bike a i phurh thu i rawn sawi tawh a..tunah lah Inneih lam in i rawn chhunzawm ta zat mai a...zawlnei puan ngai lem lo in keini ang duang pawh in i hun lo la awm tur hi ngaihdan lianpui kan nei ve leh ta ....thu lawm awm chu puang tawh mai le..:))

    RD-a chu Central KTP in synod hall a zaithiam ho zan khat hun an neih kha video en tawh chuan kha ta phaiphuleng ham tu kha ani e :))

    ReplyDelete
  9. @illusionaire, ekhai kimbawiha chu hmuh lohna che a va rei ta ve..:) i tha thin maw..RDa te nupa hian aizawl an thleng leh tawh mai thei zawk a ni. Leave ka nei tlem lutuk a, a ti a. NI e, ka lo biak dawn che a nia. Mi nunzawi tak mai a ni a. Music a thiam hle.

    @avena, hotupa I RDa hriat ngei hi a ni e. Phaiphuleng chu thiam tak a ni. A han ham hlarh hlarh tawh chuan tuipuiral lanu te pawh an luangliam ve ngei ang..:) in inneih hunah kan ham tir ve dawn nia.:)

    ReplyDelete
  10. A va ropui ve!! Monu chuan Bawkbawn bai te hi a ei ve thei a ngem le? te ka lo ti mai mai a....

    ReplyDelete
  11. An nalh dun kher mai! Pastor thusawi hi sawi that hmel khawp mai. Khuannu samsuih ngei mai ropui e!

    ReplyDelete
  12. Status ah pawh Single thin kha committed ah a luh chhoh thut hnuah a thil post leh hian kan hma lawkah hian "Ni ropui" lo thleng tur hrilhlawk a nei thei angem? Chu chu ni ta se? a hun a tep ter viau tawh a ni thei zel a ngem?

    I sawi dan hmangin an pastor khi Mizo thalaite ei zawng chi tak tur a nih duh hmel ka ti.

    ReplyDelete
  13. @awzzman, Mizoramah kum khat lai a awm tawh a, a ti thei viau a ni awm e. Mak ka ti ang reng khawp mai. Nitin zingtin tlaitin Rice ka ei ziah a, tun thleng chuan ka la tithei khawp mai. a ti a. A nu leh pa hi missionary an ni a, ram danga awm kual fo an nih avangin a harsa vaklo pawh a ni mai thei. Tin, hmangaihna avang te pawh a ni thei tho bawk a..:)

    @puii, nia tiraw, pastor thusawi hi ka dah kim lo zawk a, a sawi tha khawp ang reng mai. Mahse, thil awlsam a ni dawnlo, tih erawh a sawi uar ang reng khawp bawk.

    @amuana, hehe. Hotupa, hei chung lamin rem te a tih ve chuan kan la nei ve ang chu mawle, nang ni te, avena te, faka te ho hian han ti hmasa zawk ula, a fuh zawkin ka lo ring mai mai a, keini zawng kan la mi chhe lulai em mai..:) tui chhunga zo taka pawmtu che ngei mai kha aw ni ang..:)

    ReplyDelete
  14. hahaha khatianga zo taka mi pawm nawlh thei kha nupui atan chuan an tha viau tak anga, damloh nikhua velah pawh hahaha

    ReplyDelete
  15. illusionaire: i comment na apiangah mi kah na tur i zon ziah le...i nula bem ve dan..Chemtatrawta thawnthu zawt...i in hai kaw har ngot ang, lolzzzz

    ReplyDelete
  16. @amuana, ekhai hotupa i rawn tuihnihna hi a dik lehpek ma nge.. Nupui atan chuan sa tha nelhnawlh, in tha zo tak hi an tha fo an tia lom. Hmanlai phei chuan hlothlo chak tur, dam loh nikhua pawha in tha zo tak Mo neih kha kan pipute duhaisam a nih fo kha.. chuvangin i tih fo hle dawn niin kan lo hria e..:)

    @Almost Unreal, Eheu,, B'day Party vela lam dun hap hap hi chuan inkahna te pawh hian awmze thui tak a nei fo an ti em ni kha..hehee. Hopupa Kima hi chu mi zakdek hi a thiam teh a nia aw.. nula bula mawi taka a han nuih var var tawh hi chuan blog lamah chhiar tur tha tak a ngaihtuah chhuak leh tawh ngei ang,, kan lo ti thin a..:)

    ReplyDelete
  17. Telve a chakawm hlemai. Ni e, mizo nih hi anuama, kristian nih hi anuam bawk si..kan han ni kawp ania, ropui tak ani.
    Monu hi achhungte nen an inneih don khan Kolkata synod guesthouse ah kan thleng hova, anfel khawpmai, mizo mo chhuanawmtak ani.

    ReplyDelete
  18. E khai hotupa, tuipui ralah pawh pa chan i chang thei chu a lawmawmin khalama Zohnahthlakte tan pawh rilru hahdam sawng sawngna a ni ngei ang. RDa tan tak pawh a lawmawm hle dawn a ni tih a hriat reng mai. RD a chu high school kan kal ho thin a, mahse kan inhmuh lohna a rei leh ta. Ka lawmpui hle mai.

    Zofate tuipui ral ramah pawh hriat kan hlawh mai pawh ni lova hming that kan chang thin hian Mizo nih a tinuam thin in kan Mizopuite hnam hming tithatute hi an fakawm thin.

    Sap nula nen tu dang tel ve hauh lova a kawp te a "Han thlir teh u, Ka Lal Kross khi" tih hla in sa dun hman ta lo kha pawi ka tihpui ber che...he he

    ReplyDelete
  19. @sino, a lo ni maw.. Ni e, sap ho pawh hi an rilru a lo inang lo ve hlawm dawn khawpin ka hria. Mizo Chaw nitin a ei nghal mai thei te pawh hi a mak ve reng reng tawh e. Tin, Kristian tha tak a ni lehnghal a, Dutlang Hospitalah thlaruk lai a lo thawk tawh nghe nghe a ni awm e. Heng te avang hian Mizozia pawh a hre thawkhat hle turah ka ngai.

    @Maruata, ekhai hotupa, in lo inhria a ni maw.. a ropui thin e. Ka thianpa Kingkonga te nen pawh in in hre hial ang ka ring. Ni e, ka changsang ang reng khawp mai, ama RDa tawngkam takin thlarau lama i hul thu min hrilh hrereng chungin i tawngtai theih chuan kan lawm hle ang, a ti miau si a. Tuipuiral lamah hi chuan thlarau lam chan hi a chau duh khawp a, tawngtai duah pawh har tak a ni. Mahse, Pathian zarah tluang tak leh ropui takin kan tlingtla thei a, Mizo pahnih chauh kan awm na a, Mizo tawng a lar hle..hehe

    Sap nula ka zaipui ta lo kha rel ka chuan laiin ka ngaihtuah neuh neuh a, surprise tura a tih a ni a, RDa pawh hrilh lovin, tumah kan hrilh lo ang a, kan sa thut dawn nia, a ti a, chutih laiin RDa erawh a phaiphuleng ak turin lo hrilh mai mai la, a ti a. Keipawh chu surprise bawkin ka hawng leh thut a..ka hrilh ta si lo va, ka inthiam lo khawp mai. Kum 5 vel kal taa a Mizo hla thiam, a la sa thei tur kha a mak hrim2 chuan ka hria..

    ReplyDelete
  20. thui viau na a, chhiar manhla e...:)

    ReplyDelete
  21. Inneih lampang hi a tuipui fal deuh kan awm a va nih hmel emmm :)
    Hotupa, ni a liam zel, July thla a ni ta, kumpuan kha aw...

    Ziak ngaihnawm hle zel mai. Nupui i neih ve hun i ban thlen ngei ka duhsak nawn leh a che.

    ReplyDelete