Friday 28 March 2008

'Lam Ang Ka lo Let Leh Ta E' Vala!

Thla khat zet Zorama ka thang vang vang hnuin ni 27, march 2008 hian Ka chenna ka thleng thla veleh ta. Zoram ka cham chhung hian, harsatna emaw buaina emaw ka nei meuh lo va. Ei leh In lamah erawh pumin a lo ngeih teh chiam loh avangin insiamrem mai a lo harsa a. Thenrual tha leh hmelhriat thaten chaw eiah min sawm pawh tam tak chu ka kal thei meuh lo a ni. Amaherawhchu, hun erawh hlawk takin ka hmang liam niin ka inhria a. Min enkawltu Pathian chungah lawmthu sawi mawlh mawlh tur ka va ni teh lul em. Ka hawn chhan pakhat Ngopa lama ka Pu te thlan siam that erawh rokhawlhna avangin kan thulh leh ta rih a.

Kan mithiamte zingah Brig.T Sailo pawh darkar 3 aia rei mah kawmna hun ka nei thei a. Kan hlim tlang hle. A ni hi mi duhtui tak leh mi tawng mai mai lo a nih avangin kan inkawm tak tak hmain tunge ka nih a, khawi lam chhuak nge ka nih tih chu a hriat duh hmasa ber a ni a. Thlahtu atang leh ka nu leh pa te khua atangin ka han insawi te te a. A hnuah chuan chhungkhat hnai takah kan inchhuah ta nghe nghe. A nupui pi Siami pa pu Dahrawka hi Khawdungsei lal thin ka pu Hrangchhuana te ina lo seilian a lo ni reng a, hei hi a nupuiin a rawn sawi chhuak a, kan chhungkhat dangte pawh unau ang maia an lo en thu te an sawi ta zel a. Tichuan a ni pawhin nel takin min kawm theih phah ta a ni. A ni hi mi ze nghet tak leh tawng tamlo tak mai a nih avangin a thil hriat leh hmuh zawng zawng pawh sawichhuak ngai lemlo mi a ni a. Heng avang hian mi tam tak chuan a thiamna rengah pawh thiamlo an chantir fo thin a ni. Mahse, hei hi thil tha ber a ni lo nia ka hriat thu te ka sawi ve a. Chung thil tam tak chu min hrilh ve nualin ka inhria a. Video camera ka lo kenglo chu ka inchhir ngei mai. Kan inkawmna zawng zawng kha a buin siam teh reng ila, thangtharte tan a va hlu dawn em. A ma chanchin a ziahna 'The Army' tih chu min present a, kan lawm hle mai. He lehkhabu bawk hi MPC Head Quater atangin Pu Dr.Kenneth Chawngliana'n mi rawn present ve leh bawka. Ka lawm thuahhnih khawp mai.


Ka mi chhuan te zinga mi HT Sangliana nen hun remchang tak neiin kan inkawm thei bawk a. Tin, nilengin kan inzui a. Kan zingah hian 'Zoram Kuthnathawktu Pawl, president pu Thankanglova' a tel ve zel bawk a, a ni nen pawh hun remchang insiamin inkawmna hun tha tak kan nei thei a, ka lawm hle. A bik takin Thingtlang lama kan unaute dinhmun chhiat zia leh chem sen hial lek tawh mai an duh thu te ka hriatin Zoram hmasawnna hian thingtlang a thleng pha lo hle a ni tih min hriat tir a. An hmel leh an kut leh ke te ka han thlirin lungawi thei ziazang an lo ni lo. Heng te avang hian Zoram politic chu her rem a lo tul ta a ni. Tin, Pu Sangliana ngei pawh Zorama chuang chhuak a, Zoram siamthat chu a tum ber a lo ni ta a ni. Zoramah khua a var tawh ang em? tih erawh beiseina mai a la ni rih awm e.


Mi huaisen leh zahpah nei lem lo, dik nia a hriat huai taka kaltlang pui mai ngam thin Pu M.C Lalrinthanga pawh a chenna in ah kan han kawm a. Thalaite ngaihven hlawh ber te zingah Zoram politic chiri mek chu a ni tawh nia a hriat thu leh chu mi avanga a lawm thu te min lo hrilh a. A ni nen hian Mizo Union hun atanga MNF hun thlenga Zoram politic dinhmun te min lo hrilh chipchiar hle a. Tin, Pu Hawla chungchanga a lehkhabu ziak min present nghe nghe. Kan beng a var phah hle a. Zoram hma hun lo kal zelah thawkho zel turin kan in thlah liam a.




Mizo Culture leh Society venhimna kawnga kan mi huaisen leh tlawmngaite zinga mi Pu Malsawma Kawlni leh Pu R.Zamawia te nen pawh hun hlimawm tak hmangin kan inkawm thei a. An ni hnen atang hian ramhnuai boruak leh a kaihhnawih bakah thangtharte tana rohlu ni kumkhua tur 'Mizo Nationalism' thinlung chu vawng nun zel turin kan inchah a. An ni pahnih kawmna hun remchang ka nei thei hi ka lawm a. Pu Malsawma phei chuan an hmalakna kawnga governor hmuh pui turin min sawm ve nghe nghe a. Kum lamah kan pa te rual ni mah se, an rilruah a la thalai hlein ka hria. Dam reng hlawm teh se.


Tin, YMM a an president Mahera nen pawh phone ah vawi duailo kan in be thei a. Ka thuziak fahrah ve te te atangin min lo ralkhat hmelhriat ve hle chu niin, kan in nel tak zek a. Tin, Chhim lama Youth for Mizoram a an president Chhuana lah chu ka rawngbawlpui a lo ni ve zel nen, an ni thalai pawl te zarah beiseina a nung thar hle. Zoramah khua a la var ngei ang.


Kolasib ah YMA leh MZP te tangkawpin Seminar an huaihawt a, keipawh thusawi tura sawm ka ni a. Mahse, ka pum a dik theih loh avangin ka kal thei ta lo va, a ni hian min rawn phone leh a, kal thei lo mah ila, mipui pungkhawm tan thuchah tlem tal nei la, an rawn ti a, tichuan lungawi takin kan in thulh san ta a. Ka ui hle a. Remchangah zinna hun tha zawk ka la neih ngei ka beisei. Kolasib mipuite rilru sutthlak a ropui ka ti hle.


Thildang chu sawi rih lo mai ila, kan thlan laihna lamah thingpui rawn semtu MK-i chanchin te, Malaysia kal tur Lengpuia ka han veiliam Maggie leh Hlutei te pawh kan sawi tel rih lovang a. Ka rawn hawn lama ka chuanpui Belinda te, Mapuii te, C.Lalhmingmawii te leh midangte pawh kan sawi rih lovang. Ka Bike nena ka chetsual thu phei chu sawi rih loh a him ang ka ring hehe. Chuti lo chu kan hotuten a sei an ti lutuk palh ang e..:) Tichuan, ka nau te pahnih Baby leh a fanu Sailotluangi, Ka nau Sangzuala leh a fapa Lalropuia ten Lengpuia min thlah liam ta a..Ka ngai dawn hle mai.

13 comments:

  1. This comment has been removed by a blog administrator.

    ReplyDelete
  2. ekhai pu, nang chu mi pawimawh i kawm kual hnem bik hle mai. Nang hi, kan lo level pui kawm ve hmiah che a, ka zak leh thar deuh rum2 riau in ka hria, i thiante ho khi an bon riau. I blog post update zing deuh toh la.

    ReplyDelete
  3. wel kam bek to blogger world!! eih i bike chuan khamah a tlan liam pui em lo che maw? chu Mizo mipuite tan hna tha tak i han thawk a..khaw nge kan chibai teh ang che!!! good job Bro.

    ReplyDelete
  4. @DayDreamBeliever, lolz, bei zahthlak thei em mai nang chu.. nang alawm le, keini ang akzathnih mai mai te pawhin kan han be pha che hi vanhnuai leichinah hian vanneilo in ti rual pawh kan nih loh hi le.. ni e, nang berin i tih chuan theih tawpin update kan lo tum ve tawh ang e..:)

    @Awzzman, I fel thin e. Ni e, theih tawpin Zoram tan kan bei zel a niang chu.. eng teh ual tithei lo mah ila, theih ang tawk theuhin aw..:)

    ReplyDelete
  5. i article ngaihnawm tak chhiar leh a nuam thin e.. i vanneiin i ropui bik kher mai mi hlun tak2 te i han kawm thei a..i pum a tha lo chu a poi a nih chu a, mizo chawhmeh pawh i pumin a ngeih tawh lo nih kha awmbo rei ltk tawh a niang. Next post leh tur chu a ngaihnawm hmel khp mai..happening hmel khp :)

    ReplyDelete
  6. Welcome back hotupa! I Aizawl haw chu i va kawm hrawl hlawm tak ve! Nang zawng kan ram hi i vei bawk a, eng emaw tak zawng i la vei chhuak ngei ang. A ropui e.

    Heng i'n sawi lan thuak thuak bakah hian kumpuan bawhzuina atana 'chhungkaw inrawnkhawmna' chungchang te pawh post lehah chuan kan lo beisei ang e:)

    ReplyDelete
  7. @puii, thanks. Lehpek lamah thupui fun deuh nena rawn belh ka tum ang e. Heng kan mi thiamte hi vanneih thil thua kawm thei hloh ka ni zawk a, a lomawm teh a sin.

    @faka, ekhai hotupa, a hmasain, ni 26 khan Belinda L sailo te nen air deccan ah kan chuang tlang a, aizawl to kol kha..han sawipui tur avang sia, i chanchinte a ni kan sawi kai tak ni. Ka nu nau alawm a ti a. Ka hre reng tawh tho na a, a lo ni maw, ka han tih leh tak tho kha.. Mafaka hi zawng, nupui neih a hun tawh lo maw, ka ti zauh pek a, nang i nei tawh bik em ni? min ti zaih mai a, chhan thiam a har hle. Avena ka sawi kai hram. An ni pahnih hi bangalore an zin ngun riau, te ka ti ta mai mai a..kan hlimtlang phian hlawm...:)

    ReplyDelete
  8. e khai, zin report chu ngaihnawm hle mai, Tutu te bulah maw haw lamah i thrut a? kimchang deuha hriat te pawh chakawm hle mai, mifa te chu an lung a leng leh dawn mang e..

    welcome back to the net world bro..

    ReplyDelete
  9. azaia, chibai, thanks. MK-i hi kan veng nula hmeltha a ni piah lamah zaithiam kan neih tlemte zinga mi a ni a. Thlanlai thingpui a rawn sem lai ngei mai hian ka rilruah i lo lang nghal tak a sin..

    ReplyDelete
  10. ekhai!! hotupa chu zin report ngaihnawm hle mai..han thawh zel teh..

    ReplyDelete
  11. Hotupa, kimchang zawk a hriat a va chakawm ve, a sei ka ti hauh lo mai, han thai leh vat teh

    ReplyDelete
  12. @avena, ekhai, kan hotute in lo dam tlang chu a lawmawm hle mai. Kan lo hriatdanin hotupa mafaka nen B'lore lamah in tleh thla deuh chhen niin an sawi a, kan lo ral khat phur ve em em mai a nia. Kan ngaih pawh a tha viau zel e..:)

    @amuana, thanks. Hun han nei deuh ila, in hmuam muk ngai deuh chi te leh chetchhiatna bawk sawi a ngai leh dawn. Ka pi Zemabawka mi hian Zarkawt thleng min phur mai teh, a ti khanglang a. Thuampui leh Bawngkawn inkarah vawihnih ngawt ka thlauh pek a.. vanneih a siamin a na lo hloh.

    ReplyDelete
  13. WC Back... lo ti ve chhe2 ni lom ni. I han hmang nuam in i han hmang tha am lom om e, eh!

    keini poh tun lai chu office lam kan buai thei ltk a, i ron let poh ka hre mai hman lo ni e

    ReplyDelete