Monday 21 January 2008

Zoram Zunzam

Tuk khat chu ka in ngaihtuah lunghnur a, ka nu han biak mai ka tum a, a lo leng bo daih mai si a. Ka nu tluka ka ngainat leh ka biak fo Pi Lalsangzuali Sailo lah chu biak tur a awm tawh si lo va. Ka khua a har ru hle a ni. Khawhar zual changa ka han biak veleh zauh thin thiannu runlum nuthai chang tawh Daduhi lah chu chhungkim lenlai chenin London khawpuiah a khua a har lo nasa tawh mai si a. Han biak buai rual chi lah ni suh. Internet ka han khawih dawn a, ka mit lamin a lo ngei ta deuh nge ni, a thip vet tawh mai a, khawih tam loh a that zia ka hre si. Ka guitar ka han hmet rak dawn emaw chu aw ka tih lahin, a mood ah ka awm thei ngang si lo va. Thiante in lamah ka han leng chhuak mai teh ang, ka han ti zet a, mahse nikhua chuan lenchhuah lohah min tlak ta zawk a. Tichuan, ka khumah chuan ka muzal ta mai mai a, lehkhabu chhiar ka tum zet a, mahse a fuh chuang si lo. Ka rilruah chuan ka thian te, ka chhungte, kan thenawm te, kan naupan tet lai te chu a lo lang riai riai ta mai a. Eng dang ngai lovin ka suangtuah ramah chuan ka cheng ta ni berin ka inhria a. Darkar tam tak chu ni mah suh se, chu suangtuahna khawvel thlawhtheihna chuan min lenpui veng veng mai a, hmana kan tuanna tlang leh mualah te chuan min hruai kir a, Muvanlai ang maiin thangvansang atangin ka chhuk en em ni chu aw tih theih turin a fiah kurh mai a. Nuam ka va ti em.

Chu ram chu Romei khu zam raih mai chuan a lo bawm chiai mai a, a chhehvela Zobawm dingdi te chuan ka lung min len a, va tinrengten an tlan thin Tuangtuah par te chu a vul lai tak mai a lo ni bawk a, a par tlantu sirva leng rualte hlim thin zia te kha aw, Sakhi leh Sazuk te tana chawtui ber mai Thingvandawt te chu a rah bawr lai tak mai a lo ni bawk a, phunchawng leh nauban par te chu mawi takin an par kur nghiau mai a. Tlangsam leh zapanhlo erawh a kuhmum a awm tawh lo va, a par awmchhun pawh a tang par ang maiin a chuai tan tawh a. Han deh deuh phei chuan a til ar ar mai thin. Kan han ram vak a, vahluk leh ram-ar beiseiin thawm dim zetin kan han vak thauh thauh mai a. Chutihlai chuan,vaukama ngaihngam taka lo tla kerh kerh Vahmim leh ram-ar kan thawng thlawk dawr dawr ta mai thin a ni. Chu suangtuahna khawvel chuan nunhlui min fan tir zel a.

Unau hmelhai hunah zet phei chuan Siahthing zar bela zaitin rem thiam Sirva zai te chuan hawn a hun tawh tih min hriat tir thin a. Kan vanneih chang phei chuan ram-ar tui leh thuro nupa te kha kan ak hawng ve thin kha a ni a. Vanneih zual chang phei chuan chingpirinu pawh khawih phak lek lekin kan sir lawkah a sawt auh auh thin a, Vau ngaw khup atanga riakmaw nau ngaia tap ri erawh hriat a nuam fahran thin lo. Hre ngailo tan phei chuan chak mangkhenga tlan dawr dawr na tur a ni. Mangkhairalveng leh vamur hramri erawh chuan eng emaw ti zawng takin lung min len a, khua an tihar ru tlat thin. Changkak thlawk del del te kha a mawi thin ngawt mai. Hlawhtlin deuh chang phei chuan in lama chaw eia min lo nghak tlattu ka nu leh ka naute thawm hriat chak hrim hrim avangin, thim thet thetah pawh kan tlan haw dawr dawr thin kha a ni a.

Naupang pawnto rual kan ni a, khawlaia 'tin dial dial tin dial' kan han ti a, kut invuan tawna kan han in kai diat diat mai te leh, ring zet zet a 'lallo kawng ka kian ngailo' kan han ti rual thep thep mai thin te kha hringnun bul tanna hlu tak a va ni teh lul em. 'Kinga lu thleleka, laikinga lu thleleka' ti paha kan han thle dual dual thin te kha kei ka tan a hlu si thin. Zing khua a lo var a, Arpawmin kan han chhuak leh hna hna mai thin te kha, engto nei lo rual kan nih a va hriat thin tak em. Kan Arpa chhiarkhuan huai theih zia te kha aw. Zofaten Sappui nun reng ngai bil lova, a thlum a al ei za ho va, ngaihngam taka vahkhuai ianga kan lenna ram chu ui tak chungin ka hawi kir san ta rih a.

Tuan leh mang atanga ngaihngam taka kan pi leh pute tuallenna, sahrang leh mihrang hmaah pawh zamlo tea do an lakna khua leh tui ngei mai chu kan Zoram nuam hi a va ni teh lul em. Israel te iangin babulon ramah te chuan zion hla mawi rem ve kher ngai mah suh se la, he tuipui ralah hian Zoram Zunzam phur zawh erawh a har lua ka ti. Tuipuisahlahah te chuan ka tingtang bang ve kher lo mah ila, engtinge Miramah hian kan Zonunmawi kha ka hnuchhawn theih ngawt ang le. A ni, tuantul vanga inthen ngai hi hringmi lengte chan atan chuan a rawng lua deuh lo maw tih mai a awl fo. Chhimthlirpui a lo hrang a, kei ka thinlaiah lentu chhawl iangin min vel a, ram a zawnga ram nuam leh mawi pawh, ram a zawnga ram hreawm leh nunrawngah a lo chang thei teh meuh mai hi a lo ni. Kan rama thenawm khawvengte ngaihngam taka kan han inkawm dar dar thin lai te kha suangtuahna ramah chauh lo chuan han ngaihruat thiam pawh a har ta talh mai ka ti.

Kum hei leh chen mahten, an sawi thlang sappui iangin luiral rammawi kai mah ila, nang ngaih lai bang ni awm dawn si lo, khuangruahpui sur haw pui luang te leh turni sa virthli leng pawhin a len zo lo va, a tleng fai zo hek lo. Aw, Zoram zunzam leng ngaih hi a va na em. A ni, a len hian a leng zual e, tinkim dawn changin hmana lungrualtea chhungkima kan lenna tlang te, kan zolur leh thal romei zam chiai te, Zolentu leh lalthang zai nem diai mai te chu thinlaiah a cham reng a. A ni, Zozia leh Zonun te chu puan ang hnawl zai kan rel lawng e, kumtluang pawhin.

(Hmasang kan piputen, Sahrang, mihrang hmaa zamlo va, Luchhum banchhum huama an lo venhim, Ngaihngam tea laitual an lenna Zoram.!! A thlum a al pawh ei bil lo vin, Sem sem dam dam, eibil thi thi' ti a, thih leh ruam khatah, dam leh tlang khatah' an lo tihna ngei mai chu he Zoram hi a lo ni si a.)

Chu ram nuamah ngei mai chuan, chung vansang atanga Zan lalpa leh zan lalnu Hrangchhuana leh Chawngmawii te chuan lanu valrualte tana malsawmna nih tum ranin an en mawina an chhuah hram hram thin a, Pi Hmuaki erawh chuan zaitin phuahtin Zonun a lo awi thin, Saikuti leh Laltheri ten an di vallung an hnem thin a. Ropuma leh Kamlala ten pheihkhai rual takin zai an sa a, Jesse Lalrova leh Laltuaia te an her thul thin. Chu Zoram ngei mai chu mizo hla kungpui sakhming chullo Rokunga'n 'Kan Zotlang Ram nuam hi chhawrpial run i iang e' a lo ti hial a. Vankhama leh PS. Chawngthu ten zaitin vawrin chhuatpui rem mam laiah an chheih thung. Zoram leilung a ral a nih loh chuan an kutchhuakte hi a boral tawh dawn si lo, an va hlu em.

Suihlung muang te a Zofate tuallenna Zoram hi, mawina tinrenga thuamtu chung Pathian van lalin vengin, hual him zel se, hlemhletna leh sualna te chu thuam ang do zelin, in hmangaih tawnna nen thuam zel ila. Leilung leh a chhunga awm zawng zawng a boral hma loh chu Zofate luah ram nuam lo ni zel se ka va ti em. Hei lo liam a Zunleng ngah, thlang sappui ngai bil lo va chhawrpial run kan kaina ram ngei mai hi, kan ram kan tih theih awmchhun chu a ni si a. Nang leh kei hi khawiah pawh awmin, changkang viauin in ngai thin mah ila, he 'Zoram Zunzam' ah ngei hian chhawl ang kan uai zawr hnap reng dawn a nih hi mawle..

16 comments:

  1. Pan lai nun in sawi takah chuan, Thlasik khawtvawt ah zing vartianah kan han tho a, kelawngin kan han kal ngei a, kawnglai a lung ke zungpui a han chhuih a tukkhum thleng a an hit chho te kha a ngaihawm letling ngawt mai.

    Kan pi leh pu te hnam a an lo chian zia te, an doral laka an inthurual theihzia te hi ngaihtuah chuan tuna kan ram leh hnam min tichhe thei kan doral te lakah hian tanrual ve theih hi a va chakawm em.

    A ngaihnawm, ka lung a ti leng khawp mai, i thuziak ka chhiar pah hian ti ve khanglang ila, ka naupan lai te ka zuk chhuikir a, ka lung a ti leng a, eng eng emaw ka ngaihtuahchhuak a,keimahin ka nui var var mai.
    Amah C Durthanga'n 'Tuan tul vanga sappui ram zuk kai pawn, an pianna zoram nuam bawk an ngai leh thin, engdang vanga nilo pianna chunnu, zoram hnuntui ngaih an bang bik si lo" ti a a lo chham chhuah hi a dik hmel ngawtin ka hria

    ReplyDelete
  2. amuana (hotupa) ekhai, nang meuhvin i lo chhiar a, hringnun chhukchho hrethiam a, engkim mai hriatthiampuina nun i nei hi i awhawm ngawt mai. Chutihrualin i vannei hle bawk a ni.

    Phakarna, tanghmahaina, hlemhletna leh dawihzepna te hi tunah chuan kan ta neih ta ngawt mai a ang thin. Sahrang, mihrang hmaa zam ngailoa te hi Sum lakah kan zam ta a nih ber hi le.. insiam that dan awm se ka ti ngawt mai.

    Kan tet lai nun ringawt pawh tunlai nun nena khaikhin chuan, mihring dikna lamah ngat phei chuan inthlau hman ta a ni. Hotupa Avena te, Hotupa Mafaka te ho thukhawchang hriat a chakawm e..

    ReplyDelete
  3. i pic dah te reuh chu le,Arpachal khuang ri al al...min ngaihtir dawn trep a lawm le!.ar pawm a nisen sa hnuaia veng kawmkar ah kan kal lai te kha...haha,kan lo va mawl tak e aw.!

    >b>mi ramah zawng lunglen a na e,lamang lo let ka nuam e,a rei tawh lo`ng e,min lo nghak la,inthen tawh lon`g aw,aw Zoram min nghilh bik suh ang che,dawn changin Zoram kan ngai vawng2 Hmangaih biahthu inhlan bang lo ang aw...ti in Mizo Idol zaithiam te pawn an lo sak kha maw.

    + Tribal power hla i dah hi a mawi tawp....

    ReplyDelete
  4. awzzman, ni e tiraw, arpawm chu ka hrat ve thei raps mawle.. ar huai vaklo pawm phei chu rual awh kha a na duh thei mai mai..hehe

    Ni e, Zoram ngaih hi a na a ni. Hmangaihte lenna a ni si a..:)

    ReplyDelete
  5. I ziak tha leh pek khawp mai, i tawngkam hi ka hriatthiam loh te pawh a awm lawm mawle! Lungleng thei tih takah a lo leng a ti vong a ti vong a nih dawn kha :) Lunglen hi chu a na ve duh em a ni...nia, hmanlai hun te khan lung a ti leng duh asin..nun hlui te han ti ve ngial ila..ka zak leh deuh e a:)

    ReplyDelete
  6. ekhai, Puii, i dam thin maw? i reh vang vang lutuk a, i mizoram zin chu i hlawhtling hawng hle a nih danw hi kan lo ti hman a sin..:) in duh phah kher loh tur..an ti a nia..:)

    Nang te chu i lung pawh a leng ve meuhlo, an tiin ka hre a..:)

    I hriatthiam loh lai chu, han sawi la, ka lo hrilhfiah ang che aw.

    ReplyDelete
  7. a dik khawp mai..mihring hi kan that lai leh chak lai chuan ram dang a awm pawh hi a nuam ve thei phian a. mahse an upa tawlh tawlh a mizoram an ngai tawlh tawlh zel mai ani te chu an tih hi maw le!! hotupa..

    ReplyDelete
  8. I kutchhuak chi hrang hrang han thlirin 'Mizo' tih leh 'Mizoram' tih hian i thinlung a luah hneh hle tih a hriat a. Ram leh hnam hmangaihna thinlung i nei lian hle a ni tih a lang chiang hle. Nangmah ang thehthawh mi za hnih-khat lek pawh hi intelkhawm se, kan ram hian engtiang takin nge a that phah ang tih hi ka lo ngaihtuah daih mai.

    Mi tamtak chuan ram danga kan awm hian mi changkanzia te kan han hmu a. Kan ram leh hnam hmusitnan kan hmang tlat. Hei hi ram leh hnam phatsanna chi khat chu a ni chiang khawpin ka hria. Tan han la zel teh hotupa, zirtir kan ngai nasa tawh a nia.

    ReplyDelete
  9. @ekhai hotupa (avena) a dik a sin. Hnam dang nupui pasal nei ho pawh hi an vanglai chuan a hreawm dan leh a nawm lohna hi an pawh rih vak lo va. Kum 50 an pelh chiah hian, lunglenna hmun a lo hrang a, ei duh zawng te, tawng duh zawng te leh ngaihtuahna te a lo thuhmun reng thei tawh lo va. Tam tak chu an inchhir thin a ni awm e.

    Chutiang bawkin ram danga awm pawh hi ngaihtuahna ril vak hmang lem lo va, awm naw naw hi chuan a hreawm hauh lovang. Mahse, lung a fing tulh tulh a, rualawh a na tulh tulh a, hnam tan tih theih erawh kan nei tlem hle si a ni.

    ReplyDelete
  10. @mafaka,(hotupa pahnihna) ekhai, ka phu loh thil min hrilh a, a der emaw a tak emaw pawh ni se, a lawmawm reng reng. Mahse, kan hnam tan hian tih theih a tlem hle si hi rilru hahna ber pakhat chu a ni. Kan hriat zawng te, kan ngaihtuahna leh duhdan te hi theih ang tawka puanchhuah hi a ni rih ber mai. Nangni ho in han zirzo ang a, Zofate tan malsawmna in la nih ngei ka beisei a ni.

    ReplyDelete
  11. Mizo hnam tih lova khawvela ka ngaihsan ber chu Israel ho khu anni "Aw jerusalem ka theinghilh che chuan ka lei hi ka dangah bet tlat rawh se, ka ku ding lam hiana thil thiam hi theihnghilh ve rawh se ect' ti thei khawp a mahni ram ngaisang leh ngaihlu hnam hi anni a.

    Mizo te pawh hi mahni kan in ngaihsan a kan in ngaihhlut ve hunah kan la changkang ngei ang.

    Hmun hran ah awm mah la i thinlungin zoram a hlat mawlh lo tih ka hriat pui a che. Naupan lai hun sawi chhuah chang te hian thian hluite an ngaihawm zual , mi dang bulah chuan sawi ila chu mi chu chu chu ania ti angaih tawh chin ah chuan awmzia a nei tlem bik thin. Naupan lai hun sawi ch thianza hovin tumah hrihfiah leh ngai chuang lo vek ni ila a nuam zual.

    ReplyDelete
  12. ekhai, zarbawih, i ti lawmawm e, thu leh hla thiam takin in han tuihnih meuh hi chuan kan phuisui phah viau zel a ni. Ni e, naupang lai nun hi ngaihtuah a la tawi ang reng bawka, a lo hlimawm lai tak a ni dawnin ka hre fo thin. Thluak a rim hunah zet chuan a tlachawpa nuih uarh uarh phei chu har tawh tak a ni.

    ReplyDelete
  13. a va han lunglen thlak thin ve. Kan naupan lai kha Kolasib kan om thin a, ram hnuai kal na tur a tam sia, ka kal nasa ve khop mai./ A chang leh hnim te kan han bawh eng a...guardian angel hi kan lo nei tak2 a niang, kan na ngai lo reng2.

    Ka lung a vang leng tak em

    ReplyDelete
  14. ekhai,Btei, lungleng ve theilo turah ka lo ngai mai che a sin..:) Tet lai sawi tur i ngah ve dawn chu..:) Thingtlang nun hi nuam ve deuh a sin..:)

    Mahnia mal tlat reng zawng, a khawhar thlak thin e tiraw.. chantawk khuarel hi a famkim lo emaw ni chu aw tih a awl thin khawp mai.

    ReplyDelete
  15. E, Pu Puia chu i bei tha khawp mai. Kei aiin i tuan a tha a, mi rawn zawng chhuak leh nalh mai. I blog hi duh angin ka la belchiang hman lova, mahse kan thlir thuak hian belchian a dawl dawn tih a hriat.

    ReplyDelete
  16. @thara, hehe. Hman chang chang leh khawhar chang chang hian blog hi a tangkai thin ngawt a sin.. thiante rualte tlawhtu an lo awm ve phei chuan a phurawm ve thin a..kan hotu thenkhatte nen..:)

    ReplyDelete