Saturday 5 January 2008

Ka Chetchhiatna..:)

Chetthatna hlir hi kan ta tur a ni emaw tih hi a awl khawp mai a. Chetchhiatna te hi kan ta ve tho hi a lo ni a, a mawi tawka chawhpawlh ang hrim hian ka nunah pawh hian a inzep tel fo a, eng emaw chang hian rilruah a lo lang leh a, tinuitu awm hran si lo hian mahni tea nuih vur vur a awl duh khawp mai. 'Uipui pawh a vah a vah chuan ek thing a tawng nge nge thin', an lo tih ang deuh hian hmun hrang hranga lo khawsa thin tan chuan boruak in lum let hriat tawk loh avang te leh nunphung a danglam avang te pawh hian chet that reng chu a theih bik loh a ni chek ang chu. Nui vur vurna tur tawk hi chu ka hringnunah hian a tlazep ve leh thin. Chungte chu tlemte chauh lo tarlang ila:

Kan tleirawl lai deuh khan Aizawl New Market bulah hian nula thenkhat kan kalpuite nen kan din laiin car pakhat in turn tur hian a number plate hriam tak mai hian ka mawngah a rawn tai hrawih mai pek a, a thler tuarh mai a, fit 6 lai dawn hian a tet thla a, mawng tam lang deuh thaw hian ka awm pek a, mipui tamna hmun a ni lehnghal a, ka zak mai mai teh a sin.. A tih luih a ti tawp si lo va, han hau vak dawn ila, din lohna tura ding ka ni zawk zamah lehnghal si a.. nula zah rual vel nih lai kha a ni bawk si a, khawhawi a zim duh khawp mai.

Pune Mizo Kristian Fellowship ah kan in khawm hmasak ber tumin kan kal hma ang reng si a, tlar hmasa lamah min thut tir a, nula hmuh ngai lo tak tak, hmeltha tak tak leh no nalh tak tak an rawn lut zut zut ta mai si a. Mit pawh a lo hlei deuh a ni mai thei e. Sir zawna nula pakhat phei chuan lung a dum hman hle mai a. Ban nan lal tawngtaina kan chham zo chu tlar hmasa ber atanga chhuah tur a lo ni si a, ka thiante nen kan han inzui chhuak a, nula lam pawh chuti bawk chuan an chhuak hmasa ve a.. ka hnung chiaha rawn pen chhuak ve nula chuan ka pheikhawk hnunglam hi a rawn rap palh pek a, a lo mawih tawh viau pawh a ni thei e.. a hnuai phah hi a tla hlawk mai pek a.. mawza lo tharlam em em tawh bawk si lo nen, tlar hmasa lama thu kan ni bawk si a, mipui paltlang tur a la thui nasa mai si a, ka va zak em ve aw.. min rahsaktu lah zak bawk.. a hma zawnga ka lo hmuh hmelthatna pawh kha, ka cancel leh vek tih a awl teh a sin.. a hnuah erawh kan in kawm ngeih ta zek a.. kan sawi chhuah chang hi chuan kan in chum awn awn mai thin.

Vawikhat chu MZP president thin ka thianpa te nen hian meeting kan kal ho va fawren ah. Meeting hall hi darthlalang bang deuh vek a nih avangin hre ngailo tan chuan bang neilo emaw tih a awl hle a..ni khat chu Ka thianpa tlai hlau lutuk chu chak fal tak hian a kal nghauh nghauh mai a, darthlalang bang chu bang tih hre hauh lovin a han su pawp mai a, a ri dawp mai a, a hnungzuia chak taka kal keini lawmah a tla a, kan nui dar dar mai a, a rawn leh hawi a, ka hai chhawlh mai a, a rawn tia.. A hnu lawka building pakhat zawka kan coffee in zo, tei chhuak tur chuan thianpa ang bawkin ka han tauh ve leh bawp mai a, nuihtu ni tawh lovin an nuihah ka tang ta zawk a, mi dang an tam nasa mai si a, khawhawi a zim duh khawp mai. Keini chauh pawh kan ni lo, midang pawhin an tauh chawrh chawrh fo mai.. a hnuah erawh darthlalang bang pawh ni lo, bang nei lo hrim hrim pawh kan ban zuau zuau hmasa ta fo..:) mi fimkhur ve tawh te..:)

A hnu lawkah hmanhmawh em emin Rail Station chu Bus nen ka pan phei a, ka thutna sirah hian ka jacket zeeper head hi a tla zep a, a tang tlat mai pek a, a hma atang tawhin ka han pawt a, ka han sik kual vel ngial thin a, a nghet tawlh tawlh emaw tih mai turin a zep thuk telh telh mai a. Rail Station hmunah pawh chuan chhuk thei lovin ka chuang tlang ta zel a.. A tawpah ka han ding chu amah hian a rawn pawk chhuak nawlh mai a, ka han en chian nak alai chuan ka thutna kha a lo che thei a, ka thut hnan mai lek lo niin, ka sira nu pakhat chuang ve lunglawmah a tla a, a nui tet tet reng mai a.. Ka Rel chuan tum chu ka chuanglo chiang teh a sin, darkar khat ngawt ka nghah leh phah.. mi hrelo ve te..:)

21 comments:

  1. he he,sawi duh hlawm ila chuan chetchhiatna nei vek kan ni awm e. Chhiar anuam min ti hlim e!

    Tumkhat chu College ah NSS Winter Work Camp neiin Khawruhlian ah kan kal a, zanah ami pa ho zawng kha nula rim turin kan chhuak ve hlawm a, tumah kan hriat loh avangin kan camp na hmun bula naupangkan hmuh ho chu nula rim tur an awm hnaih leh hnaih loh kan zawt ta ngawt a, anni lah chuan awlsam te in aw khutah khuan 1 chu awm an tia, a hmingte min hrilh a. Min kawhhmuh na hmun In chu kan thleng a, kan zinga a huai ber chuan kawngka a va kik dat dat a.Inchhunga awm pahin naupang hovin a hming min hrilh ngei chu va lamin a mah a awm leh awm lo chu a va zawt a. Chu ve leh tapchhak a thu chhungkhat nu ber chuan aw keimah hi ka nia enge nita a lo ti mai chu! a rawn tlan chhuak rang teh asin! Kei ni ho pawnah kan lo nui char char thunga...mahni chanchin sawi lovin thiante chanchin ka sawi hlauh anih hi:-)

    ReplyDelete
  2. e khai hei chuan, khushwant singh, A Thanglura te ho thuziah a pawl pha tlat mai ka va nui nasa em. Chet chhiatna ka nei ve nual, mahse kei zawng ka chet chhiat dan a changkanglo thin em mai a, sawichhuah tlak loh a ni fo hlawm.

    ReplyDelete
  3. I thil ziah ho chu min ti hlim hle mai. Mahni chauha awm pawha nuih vur vur na tur hi a tam duh khop mai :)

    ReplyDelete
  4. @lolzzz, azassk, nula lama chetchhiatna chu ka la thup rih a, tih leh hun atan ka khek rih dawn..hehe. amuana sawi ang hian a changkang lo lulai lutuk a, mahse, hun kaltawh a ni tawh a, history a ni ta sa sa, ka la inpuang zel dawn.hehehe.. Sunde Sikula hmeichhe pakhatin hnung lam atanga min kek tluk lawp thu pawh ka la zep rih ang..:)

    @amuana, hehehe, a changkang lo nia kan hriatna lai tak kha nuih titamtu a ni ve fo a sin.. zahthlak tak tak chu a tam duh khawp mai. Mahse, hringnun hi a che tur a nia. Pal buak a tam chuan baw lo chin pawh a tam fo e, an tih kha maw.. kan la hre chhunzawm turah ngai phawt ila..:)

    @jinx, ka thianpa MZP president thin ka tih hi nikum hmasa khan aizawlah chaw kan eikhawm laiin ka sawi dawn a, mi sik nasa lutuk a, ka pehhel ta ringawt pek a. A ni hi kei aiin a che chhe tam zawk a.. ve khanglang hian..:)

    ReplyDelete
  5. Chet chhiatna lam thil a ni na a, min ti hlim ngei mai. Ni e, hringnun hi zawng 'learning by trial and error' a lo ni vek mai...

    Pune nula nena in 'inhmelhriat' chhoh zel dan hi sawi zau deuh a va tha ve... 'Nupui neih kum' te a ni bawk a:)

    ReplyDelete
  6. Mafaka, lolzz, pune lam chhas nena hringnun kal chho zel hi chu hotupa avena inpuan hma chu sawi theih a ni bik lo va..Chennai krismas hlawk taka a hmanna lam hi hriat hmasak atan a a tha mai thei..:)

    ReplyDelete
  7. hotupa chu che chhia han tih ah i che fuh lo zawk mah mah anih hmel zawk e :)) ngaihnawm khawp mai!!

    Pune lam nula nen chuan in chet chhiat (che sual ani lo ania :D) zui zel dan hriat ava chak awm em!!

    vawi khat chu, Ratu ah KTP conference hian ka kal ve a. In khat ah mikhual 20 aia tam deuh vek kan thleng a. kan khat ang reng khawp mai a. kan thlen in te kawng khar hi , mizo kawngkhar , mau a siam, sir zawng a nem tawlh a hawn chi ang kha ania. chuan chaw ei kham kan chhuak lawk kha kan lut leh tur kawngkhar kan nem tawlh , kut la lathla si lo khan ka pen lut nghal a, nula pakhat chhuah lo tum ve chiah lo awm kha ka hmu tawh si lova...chiang lutuk mai hian a hnute pahnih ah ka nem thlawp mai a hihi......

    inchhungah khan mi an thu khat thup sia , zahthlak duh ve ang reng khawp mai lolzzzzzzzz........

    hotupa mafaka chuan sawi tur a ngah khawp in ka ring; tunlai tak phei chuan Bangalore thleng in a puan in a zauh tawh e an tia, sawi tur nei ngah tawh khawp in a rinawm :-))

    ReplyDelete
  8. lolzzzzzzzzzzzzzz avena.. ka nui nasa ngei mai a.. tete-a in nem sak palh hi a awm reng reng. Tute emaw naupang harh rual vel nih lai pawhin 'khawih sak zeuh leh tlanchhiat nghal rual thin te pawh an awm kha mawle.lolzzz

    I sawi ang chi hi hotupa mafaka pawh hian sawi tur chu a hre nual ang mawle. A puan in zauh pawh a hlai tha ta viau mai si a, keini lam pawhin sawmna chu kan beisei ngam ang chu.. Bangalore chu minu an tam an tih kha..:)

    ReplyDelete
  9. hahah aizawl khawpui lai taka kekawr thler chungah i han ding hawi hil tur chu....nula tawih deuh2 te khan an lo thlir ve reng awm si che a...!hringnun hi a mak teh e....kei chu ka chetchhiahna ka sawi ve duh leus....a zahthlak..lolz

    ReplyDelete
  10. hehehe, Awzzman, a zahthlak lutuk hi chawngheina tham a tling mawle.. mawng a lo var vak si lo a..ka ngaihtuah hian ka la zak chem chem..min theihnghilh hlawm tawh ang chu maw khatih hunlaia mi te kha chuan..:)

    ReplyDelete
  11. hahahaa...keimahin ka khi vur2 mai, ka nuih a za ltk.

    Nuihzat soi takah chuan HBC kal lai, 1st yr kan nih lai a nia..College Weekah khan Chheihlam intihsiak a nia. Tumah lam thiam om hek lo, 1 khan ka thiam a tia, a lam ta a, Chheilam ni si khan a lam sang khop mai a, kan nui nasa ltk a..tumah zai thei kan om lo. Chuan ka haw kongah khan ka ngaihtuah zui a, ka nuih hi a za ltk hi a va han hrehom tak.

    Keimahin ka haw si..bus ka chuanga..ka lo nui a niang, ka piaha thu nula kha a bula mi mipa 1 bulah khan "Enteh, a nuih a za ltk" a ti ri ka hria a..ka va hoi a, kan 3 chuan nuih za ltk in kan nui vek...ka lom kher a sin, lolzzz

    ReplyDelete
  12. hehehe. almost unreal, Mahni tea nui vur vur chu mi a..an ti thin a, mahse mi a kherlo pawh an nui ve tho alawm tiraw.. keipawh ka nui sung thin..hehehe. Han ngaihtuah let hian thenkhat chu a nuihzatthlak lehzual thin a, thil kalhmang kan chhui zui a, nuih a za tawlh tawlh duh ve khawp bawk mai..

    Kan thianpa Chawnga pawh Vai film hmuh nawm takin a en ve a.. a chhan a hre si lo va, a thlir liam ve mai a. Hawn kawngah Valtea'n a lehlin sak a, a mittui a tla ve kauh kauh mai mawle..Kuch Kuch Ho ta hai ..tih film kha ni tain ka hria. A lar vanglai khan..

    ReplyDelete
  13. avena hi zawng mi rilru nei ngang hi a nia, chet chhiatah pawh a kawng hmang hi a hre riau a nia:))

    Vawikhat chu zan rei tawh takah hian kan upa pakhat rei tak damlo tawh hi 'a thi' an rawn ti ta mai a. Hmanhmawhin ka tlan thla a, in ka thlen chuan mi an lo tam hle a. Tumah pawh en kual lo vin 'ruang' lam chu ka pan ding nal nal a. "A va pawi ve aw!" ka ti a. An lo tap deuh pur hlawm bawk a. A thih dan vel zawh ka tum lai tak chuan a rawn che ta mai a. A lo thi awzawng lo! Thuthang diklo ka lo dawng chu niin! Ka che vel min lo chiktu thiante ho chu an lo nui tat2 a!

    ReplyDelete
  14. lolzzz, mafaka, zahthlak ve duh dawn chu mawle.. khaw hawi a zim mam mam ngeiin ka ring bawk. Thihna lam kher a ni lehnghal a.. Mahse, nang zawng, i in adjust thiam thuai ka ring nghal mai a, kei chu ni ila, ka mualpho viau ngei ang..

    lolzz, avena hi chu a chetchhiatna ber pawh i han sawi ang hian, a fuh viau zamahin ka hria a. Chetchhiatna ni lovin, chetthatna ni zawk mah tur a ni..hehehehe

    ReplyDelete
  15. chu..kan hotute, puia leh mafaka chuan ka chet chhiatna chu chet thatna ang ah in ngai ta deuh tihna em ni le!!!....:))

    vanduai-vannei, an tih ang chi ah chuan kei ka ngai hauh hlei nem.......mahse, nula zen ngam khawp a huaisen an awm laiin, sakei sual ngam khawp a huaisen an awm bawk e an tih kha maw :-)) chechhia kan tih a dang ani ange!!

    ReplyDelete
  16. ekhai, hotupa, chetchhiatna hi a category hrang hrang a awm ve a lo ni.. che chhe ro roah pawh vannei tak chu kan awm a nih hi..:)

    Hotupa mafaka pawh hian hetiang deuha tihpalh deuh thil thua chetchhiatna vannei tak a neih ve ngei pawh ring ila..:)

    ReplyDelete
  17. E khai puia, avena chetchhiat anga che chhe ve tur chuan 'zei' a tel a ngai an tia lawm. Ka tlin ve tlat lo:)

    ReplyDelete
  18. Hotupa, vawiin a ka article ngaihnawm deuh chhiar kah khawiah nge a lo awm tak, ka lung ati leng a, ka comment treuh ang chu tiin ka lo lut a :)

    ReplyDelete
  19. ekhai, hotupa, tlem te siam that ka duh a, draf lamah ka dah rih a, kar leh hian ka rawn dah chhuak ang chu ka tia..a va lawmawm ve, ka luan liamna min lo hriatthiam pui chu..

    ReplyDelete
  20. hahhaahh...keimahin ka chhiar a, ka nui tiah tiah mai mawle ring tawk tawkin! i kekawr thler ber hi ka nuih a za bawn! a dang pawh lo post leh zel teh,,,min ti hlim tawpz! :)

    ReplyDelete
  21. hehe, puii, ni e, remchang hmasa berah Part 2 in ka la rawn chhunzawm mai thei. Hei aia ka chetchhiatna a la awm nual a nia.. inphawrh law law ang aw ni..:)

    ReplyDelete