Thursday 29 November 2007

Zorock (Rosangliana) Zunzam

Kum tam a liam ve ta, Pu Rosangliana (Zorock) pawhin a vanglaini a hmang chul tan a, kawngna leh chak lohna hrang hrang bakah nupui fanau chawmna lamah a hmanhlel ve ta viau a ni mai thei, a thawm a ring ta meuh lo, Sipai a nih vang chauh pawh ni lovin, chhungkaw paber tan chuan chhungkuain ei leh in kham khawp an neih a lo ngai a, fate an lo seilian a an hau tak chho vei tawlh tawlh nen. Atan chuan "Zoram Ngaih hla" nalh tak han phuah pawh thil har tak a ni kher awm lo ve. A dinhmunin a zir miau si alawm.

Pu Rosangliana hi Mizopaah chuan pa sang pawl tak a ni a, fit 6 vel zeta sang a ni. Kum lamah pawh kum 50 a hnaih thuak tawhin a rinawm e. Hmun hrang hranga a khawsak hnuin a hna nghet ni turin Shillong mualah Indian Sipai music band ah a awm mek a, amah hian bass a perh a, a zai pah bawk. Tin, Jazz lam tuimi tak a nih avangin hetiang lam hla hi an sak tam ber a ni hial awm e. India ram chhunga Sipai Band lar lang pha zingah an tel ve hial. A naupan tleirawl lai hi atan hriatreng tur vek a ni. Mizoram thingtlang khaw pakhat "Khawkawn"(Khawkawn khaw lal thin Phungchawnga Sailo chu ka pu u chiah a ni a, Zote ah insawnin lal a ni leh a, rei vaklo ah a thi ta a) an tihah a lo piang a, a pa hian a naupan laiin a thihsan a ni awm e. A nute zinga upa ber Pu Tlangthanga Tlau chu Burma Sipaiah a lut a, a nu nau Thansiama pawh health lama thawk turin Mizoram atangin Rangoon lamah an chhungkuain Seventh-Day Hospital an pan ve bawk. Hetih hun lai hian Seventh-Day Hospital Rangoona mi hi damdawiin tha pawla sawi a ni a. A bik takin Mit lamah phei chuan a ber a kai hial awm e. Chutah chuan Missionary anga rawihin a nu nau Pu Thansiama te chhungkua pawh chu an awm ve ta bawk a. Tin, Rosangliana nu ngei Pu Rodallovi pawh chu a unaute awmna lamah chuan a pem chho ve leh ta a. A ni hi Khampat lamah in leh lo neiin a khawsa zui ta bawk a.

Chutia a nu te lam bela a khawsak a lo tul tak siah chuan Rangoon lamah a putea(Pastor Dr.Thansiama Tlau, tunah chuan Maryland, USA-ah an chhungkuain an khawsa mek) te hnenah te chuan a han awm ve ta a, lehkha zirin a tleirawl hun chhung rei vaklo chu a han cheng a ni. Chuvangin a tan chuan Rangoonah pawh in zali(400) kan chuang e, han tih chu a awm hliah hliah a ni. Mahse, hun a lo inher zel a, a Pu Thansiama te chhungkua pawh India lamah tla thla leh in Pune (Spicer Memmorial College) lamah a zir belh leh ta a. Tichuan, India ramah a thawk hlen ta zawk a. A zir zawh hnu reilo teah Shillong(ATS) lamah a thawk chhun zawm ta a, reilo teah Seventh-Day hmunpui Hosur lamah health director hna chelh turin an ruai leh ta a, Mizo zingah a awm chhun leh thleng sang ber pawl a ni hial awm e. Tichuan a pension hnuah an chhungkuain USA lamah an pem ta a ni. A ni hi Rosangliana tan chuan pa nih tling tak leh kawng hrang hranga enkawltu a nih avangin a ngaina hle ngei ang a, "USA-a unaute ka ngai", a han ti pawh hi awm hle a ni. A tet lai zawnga a pianpui tluka a lo awmpui thin a unaute awmna ni miau hek le.

A nute zinga upa ber Pu Tlangthanga pawh Sipai atanga pension in Khampat lamah inhmun leh lo neiin an chhungkuain an khawsa ve ta bawk nen, Rosangliana nu Pi Rodallovi a lo awm sa bawk nen Rosangliana tan pawh awlsam taka khawsak zawm ve nan a remchang a ni thawkhat ang, a tleirawl len hnu deuh thleng chu a han khawsa ve leh naw naw a, hetih lai hun hian Thlanvawng thing nena tuk chawp Tingtang chu khawlaiah awrhin, zan Thla eng hnuaiah a thiante nen an zai ho thin a ni awm e. Nula la rim ngam chiah si lo, ral khat atanga zai khum vel an chin lai pawh a ni fahmiang, a zai ring thei rap a ni awm e. Amah hi pa sang tak a nih avangin an thian za hoa Football Field a an han thut khawm te hian fiamthu thawh pahin a til hi a hmuam vek thei..an ti. Chutiang khawpa pa sang tak leh ria tak chu a ni a. Sipai atan chuan tling ngei tur pawh a ni reng reng e.


Hun te an lo liam zel a, tleirawl hun chhungte chu an liam dawn meuh chuan Shillong lamah chhuk thlain a thiante nen Sipaiah an lut ta hlawm a. Silai kah thiam tak a lo ni veleh zel a, an duh hle a ni awm e, BSF ah a tang phawta a hnuah Assam Regiment lamah a lut ta zawk a. Shillong atang chuan a thianpa Khawtinkhuma(Khampat atanga a thian tha ber) te ho nen music band an zawm ta a, hla a phuah tan ta bawk a. Chung a hla phuahte chu a thianpa Khawtinkhuma nen chuan a thluk leh music kalhmang turte an duang pah zel a, kum tam tak an beih hnuin Mizote music rimaw hmanga dengchhuak thei tu a Album hmasa ber 'Ni berin alang' tih chu a han record ta a. A hla remsaktu T.4 band te hi hranghlui musicians chuai theilo ho an ni a. Rosangliana hian a han thlang fuh ngei mai. An ni lah lawm, Rosangliana lah lawm, hla pakhat a sak zawh a piangin an in chibai zel e, an ti hial a. A awmzia chu, Rosangliana hian perh nawn ngai emaw record nawn ngai emawin a sa sual ngai lo va, a beat pawh vawikhat te mah a tisual ngailo. He a Album hmasa hi chawlhkar khat chhung lekin a record zo vek a ni. Heng avang hian a remsaktute hian thiam an ti lutuk a, a zai zawh a piangin chibai an buk ziah a ni awm e. A hnuah pawh heng ho hian Rosangliana tluka zai remsak nuam leh zaithiam kan la remsak ngailo. An ti hial a ni. A hnu deuh lawkah Pachhunga pawhin a lengzem album hmasa ber atan 'Di loh Di' tih chu a han record veleh ta bawk a. T-4 band bawk a han hmang a, a hnuah pawh Mizo zingah hmangtu an awm ve ta zel a ni. Ni e, a mah pawh musician bassist a lo ni ve bawk a. Tin, mahni hla phuah leh kum rei tak a lo chaih tawh a nih vang te pawh a ni ang e. Talent kan nei vek miau si alawm.

Tichuan, a hnu lawkah chu Album hmang chuan a han lar tan ta a, Mizoram mai pawh ni lo, Zoram khawvel a han deng chhuak ta mai a. A talent neih that zia chu miten an lo hre tan ta a. He a lar vanglai denchhen hian Vulmawi Recording te chuan Lammualah(A ni chuan 'khawpui lammual' a ti kher thin) concert nei turin an ruai ve leh ta a. Musicians pawh khawchhak lam mithiam rawih ni se, an ti a. Rangoon lammi an ruai nghe nghe a ni. Khatih laia Effect set pawh la thiam mang lo leh a hang deuh tlawnga zai thin Mizote tan chuan music ah bung thar kan lut a tih loh theih loh ang. A ni, tum ang ngeiin Shillong tlang atang chuan a rawn rock ta mai a. Rosepari te, Ka thai duh lai, Ni berin lang, Vei suh AIDS leh 4, Aw Mama, 5 Stars, Can't live without you, Ka pianchampha, etc.. te a han sa a, a album a music tlukin a remtute an thiam a ni bawk a, a va nalh hlawm tak. Musician te lah thiam, a zaitu lah thiam. Guest Artiste ho Rebecca Saimawii te ho pawh an rock viau a nih kha. 'Spending my time' tih Roxette hla a sak phei kha chu a va nalh em ve aw, a music khan a ori a tluk hialin ka hria. Tichuan, Mizorama a hmasa ber leh hnuhnung ber ni rih turin Mipui an pung khawm tam a, tun thlengin record a la ni ta zel a.

Lammuala lenglo khawp mipui an pung a, pal hungna pawh tih chhiat vek khawpin ticket nei sa ho pawh an lenglo a nih kha. Tichuan, he mi hnu lawk hian Album 2nd pawh a siam veleh ta a. Mizorama an lo lawm em avang leh an lo duhsak em avangin 'A' side hmasa berah 'Sailo' tih a thun nghe nghe a, hei hian khawpui lammuala Zorock concert neih hlut a nih zia leh Mizo mipuite lawm a hlawh zia a tilang chiang hle awm e. He ti khawpa lar leh zaithiam si hi sum leh paiah a intodelh hleithei chuang hauh lo mai a, a chhan chu Mizo Hla market hi a la zim em vang a ni. Amaherawhchu thil tha tak mai chu kha Zorock huhang kal chho zel khan Mizoramah pawh music lamah nasa takin tan a rawn lak tira Rock Band tha tak tak Tribal Power te, Dream Hunter te, Albatross te an rawn chhuah phah hi a ni. OP-a of Tribal Power phei chuan Rosangliana atang hian Mizo hla sak rock dan te kan zir a, Mizo hla rem rock dan thlengin, a zaidan hi kan zir nasa thin khawp mai. A ti hial a ni.

Awle, kum tam a liam ta, Zorock pawh a reh ta vang vang emaw kan tih hnuin thangthar zingah a mah ngaisanga chawimawi phu titu an pung tulh tulh a,a zaithiam zia leh a rimawi ropui zia te chu Zofate thinglungah a rawn vul thar zel a, tunlai zaithiam lar 'Mizo Idol' zinga mi hriat hlawh tak tak Remkimi te, Awmpuia te leh Mathlenga te chuan Mizo zingah zaithiam an tih ber thu an sawi chhuak a, tin, a hla record hnuhnung ber 'Zoram ngaihhla' te chu an sak sak ta fo siah chuan Zorock chu chawi larin a awm thar leh a ni ber e. December 15,2007 chu 'Zorock Nite' tiin a tan hun an siam dawn a, amah Rosangliana ngei pawh Shillong tlang atanga rawn tel ngei tura sawm a nih angin tel ngei a tum thu te pawh a sawi tawh a, amah chawimawina hun hman a nih tur thu te a hriat phei chuan a lawm em em a. Ka phu loh malsawmna a ni, a ti hial a, keini thangtharte thinlungah pawh "Zorock Zunzam" chuan bu a la khuar nghet hle a ni ang. Ngaihthlak ngun pauh leh a ril zia a chiang a, han ngaihthlak nawn leh hian a music leh hla thluk inchawih tawn zia a hriat theih a, han by-heart chiah hian a a zunzamah kan uai ta thin a ni. Chul tihni neilo tur Zorock rimawi vul zel se, thang leh thar lo awm zel turten hlut nachang pawh kan hriat deuh deuh a rinawm.

A Album te chu:

1.Rosangliana Vol.1 (Rangoon)
2.Mizoram Centenary pual
3.Rosangliana Vol.2 (Rangoon) hei hi Paite version a siam.
4.Rosangliana Vol.3 (Monalisa,Aizawl, Guitarist: Hmingpuia)
5.Rosangliana (OTTO Recording,Aizawl, Guitarist: Thangbawiha)
6.Zoram Top 3 with Muanpuia of Dream Hunter and OPa of Tribal Power (An mahni hla phuah theuh an sa, guitarist: Hmingpuia)
7.Thlarau Rosepar (Rangoon)
8.Zoram Ngaih Hla

Heng a chunga tarlan list-a hla zawng zawng hi a ma phuah vek a ni hlawm.
(Note: Rosangliana hi kum 2001 khan a chenna in Shillongah nilenga ka lo kawm ve tawhna atang te leh a putea te bakah a cousin thenkhat hnen atangin heng a chanchin tlangpui ka han ziah te hi ka hriat a ni hlawm. Amah ngaisangtu lo nih ve manah a tan ka han hlan nghal bawk e)

Kristian Chhungkua by Rosangliana



Tuaia & Jessea Rock 'N' Roll by Rosangliana (Zorock)

14 comments:

  1. kan hotute , in blog hmai ava lian sawt ve le :))

    Rosangliana hi chu kan tleirawl chhuah ve tirh a rawn lar tan kha ania, rose pari, five star hotel etc vel kha chu kan sa ve nasa thin alawm.........

    'ka nghak ang che zan khua rei thleng pawh in..
    VIP kha han theh chhuak la min zui mai rawh..... ' tih vel kha :))

    ReplyDelete
  2. Zorock hi chu ka ngaisang khawp mai. Tuna ka awmna(China)thlengin hei a cassette kala kawl ran mai ;) Tunhma phei chuan ka ngaihthlak ngun ber pawl ani awm e (ka u mipa hian a ngaisang hle bawk a, a hla a play ngun si...ngaihthlak loh theih loh :))

    Shillong a concert a neih thin lai pawn,laichhuat kanlo hawl pui ve tawh thin lolz...

    ReplyDelete
  3. Mizo hla tun thleng a ka la ngaihthlak reng peih leh nalh ka tih a, thiam ka tih tawp theih loh chu Zorock hi. Ka ipod ah pawh zorock hla hi chu engemaw zah ka dah reng..

    ReplyDelete
  4. @avena, ni e tiraw, a hunlai na na na kha chuan rimawi lamah pawh beng a var phah khawp mai. Mizo hla hmangin thluk dang dai tak tak leh blues te, rock te pawh a lo vuah rem theih ve tho mai tih kan hriat phah tlangpui hlawmin ka hria.

    Ka pi doctor tih kha ka duh ve thei em em bawk..:)

    @jinx, first of all, thanks for visiting. Ni e, keipawh hei kalna apiangah a album pathum vel chu ka nei keng tel deuh ngei thin. Tunah hian vol.3 tih loh chu ka nei kim vek. Centenary lawmna erawh ka nei lo hrim hrim a. Aw sang si lo, aw tha chuang si lo, aw pangngai taka zai satliahah chuan thiam khawp mai. The Rolling Stone singser ang deuh niin ka hre thin..hehe

    @jerusha, tunlai i rin lai chu a ni em lo maw, indiaah emaw i awm reng tih laiin i lo zin leh daih thin a, nang hi zawng, khawvel i fang bik reng mai a. I lo ngaithla ve thin a ni maw Pu Zorocka te, rin aiin i rock daih mai ka ti...:)

    ReplyDelete
  5. zorock hi ka ngaisang a nia, a chanchin kimchang tak i rawn ziah avangin ka lawm e

    ReplyDelete
  6. This comment has been removed by the author.

    ReplyDelete
  7. Zorock-a chu kan khua apiang alo ni reng ani maw.

    thanks for the information Pu Zorun.


    "Vanglaini" tih kha keichu athu tha kati asin.

    ReplyDelete
  8. @thangh, Niang chu mawle, mahse a pianna tak hi Kolasib a ni mai thei. Ka lo zawt lo va, a hla thuah khan a sawi lang zeuh a.

    ReplyDelete
  9. Pu Zorun kan zawt chianga, Kolosib chu a nupui te khua ani e.

    Pu Chawngsailova (Keichuan U Chawng katimai, Lal chu laawm nise, Khawkawn laltur) te vel i hre mial lo maw? Pu Chhuangkima of Hrangchhuana vangkhua te i hria em? Kan zawt vel maimai che anih kha . . . kan kho Lal chhungkua ania anni ch

    ReplyDelete
  10. This comment has been removed by the author.

    ReplyDelete
  11. @thanghming, ic, a lo nih tak chu. Vawikhatmah ka la han thleng miah lo va, ka dam chuan nakum lamah erawh ka pu lung phun that kan tum avangin ka la han kal chuan ka ring.

    Hetiang hi ka hriatdan chu a ni a: Tunhma chuan Hrangchhuana(Ka pu) awp chin ram hi a zau em em a, Khawdungsei,Ngopa,Khawkawn,etc.. vel khi a pa Liankhama atanga a chan a ni awm a. Fapa pathum a nei a, an lo tlangvalin a fapa upaber Lalzidinga chuan Ngopa a awp a, a fapa pahnihna Phungchawnga chuan Khawkawn a awp ta bawk a,(mahse a awm rei meuhlo an ti, Zote lamah a in sawn san a ni awm e) Tichuan a aiah luanzakhama(?) a lal ve a ni awm e, a hnu deuhah a ni pawh hi Ngaihthanga'n a thlak ni awm takin an sawi thin a, Pu Phunchawnga fapa Ngursailova hi Ngopa atangin aizawlah kan inah a rawn leng zauh zauh thin a, ka lo zawt detail teh chiam thin lo va. Chiang takin a pa insawn chhan leh thihdan ka hre tam lo. I hriat zawk chuan min han share teh khai.

    Tichuan, ka pu Hrangchhuana erawh chu Khawdungseiah a thih thlengin a lal ta a,(a ni thlanlung khi a nia, han chei that kan duh chu, tunah chuan YMA hall-in a hliah lek lek ta a) a thih hnuah a fapa Shillonga pawh a lal hman a, tichuan kum 1953 thlengin lal ban a nih hma chu a awp ve ta a ni. Nikum khan ka pu Hrangchhuana'n 1932 a Aizawl bawrhsap lehkha a thawnna hlui em em mai kan hai chhuak a, Vanhnuailiana atanga an ram awp khua zawng zawng a tarlang a, lung a tileng teh a sin. An chhungkaw thlalak pawh ka kawl ran. 1920 vel a mi a ni awm e. Ka Pu Lalzidinga pawh a la tlangval a. A indan hma lawk ni awm tak a ni.

    ReplyDelete
  12. hanti tawp ila detail takin kalo ngaihtuah ngai rengreng lo . . . mahse tuna k ahriat dan chhinchhuan Pu Liansailova thlanlung kha, YMA hall an saklaiin an tichhee palh a, a bung an zawm thatleh tunah YMA hnuai ah a awm e.

    Tunhnai khan pu Tumpanga a kha arawn larthar leh e. chuchu a nimai naupang ho deuh chuan kan hriat ohak.

    Pu Pachala hi i hre ngai mial em ?

    ReplyDelete
  13. Ekhai, lung i tileng hle mai thanghming, Pu Tumpanga chu hre teh meuh e. A ni kha ka Pi te lam Hrahsel an niin ka hria. An sang hlawm khawp mai a, R.Thangmawia of Zoro hian a sawi thin a, in chhung an rawn lut hi kawngkharah pawh an kun a ngai e, a ti thin a. Kei chuan ka hmu pha lo va. An sawi thin. Ka pi unau fate an ni hlawmin ka hria.

    Tuna electric veng YMA president te pawh hi kan cousin tho a nia, a ni pawh hian ka pu Thlanglung chei that chu a sawi fo thin. Hun kan nei lo ve bawk a ni. Ni e, i sawi ang hian a thlanglung chu an tichhia a, an tung ringawt tih kha kan hriatdan a ni zawk e. Keimahin lam thiamloh a ni ve bawk a, han hung that a, siam that kan tum mai bik lo va, tin khiti lamah kan chhungte an tlem tawh nasa mai si a, chuvangin kan ngaihsak tawklo a ni.

    Pu Pachala hi Tumpanga u a ni lo maw? ka chiang lo. Aizawl lamah hian Hrangchhuana tu leh fate chu an tam khawp mai. An hausa hlawm tawh lutuk a, thlahtute lam pawh an ngaihtuah hman tawhlo a nih hi. Liansailova i tih hi Hrangchhuana i tihna a nih ka ring. Liansailova hi chu Phungchawnga fapa hming niin ka hria. Min han share zel teh khai.. Kan la thleng chho ve mang si lo.

    ReplyDelete
  14. Pu Rosangliana aka Zorock, Mizo hlaphuah leh zaimi a chuan ka ngaisang ber che. Khawvel a evolve ang zelin i lyrics leh music pawh a tunlai ve zel mai a,i hlathu reng2 pawh hi belhchian a dawl ka titakzet mai. I tar ve deuh tawh na chu, zailam ti em2 tawhlo mahla hla phuah erawh hi chu chhunzawm zel la ka ti (ilo ti reng pawh ani mahna)Engpawh chu nisela, ngal fimin dam rawh!!!

    ReplyDelete