Vanduai Vannei

Ka nghahhlelh em em December thla a lo thleng dawn ta e tia thlumtea thlira ka lo thlir thin Zoram chuan chhuah hun chu thulh thut a lo ngai ta. Eng dang vang a ni lo va, he "Informal Meeting on Future of WGIP" vang hi a ni. Urgent information ka dawn avang leh zin tum tawh te pawh tulh leh theih ni se tia ngenna an rawn siam deuh kher avangin keipawhin ka tum chu ka thulh leh ta zawk a ni. Engpawhnise, meeting nazawng hi a pawimawh em em vek kher lo va, tel vek kher pawh a ngai lo va, thu leh hla han thawn mai chang te pawh a awm fo a, tuntum erawh a pawimawh satliah pawh a ni lo va, a tul em avangin ka han tel ve leh ta a ni. He Meetinga thurel leh sawihona lam chu tarlan ka tum rih lo va, ka vanneihna leh vanduaina lam zawk hi tuntum hi chuan tarlan ka han tum zawk ang e.

December 4 khan a nikhatni atan meeting chu kan tlingtla a, meeting hun ka tlai tep tawh avanga ka bungrua leh thawmhnaw thenkhat chu Geneva Rail Station locker-a ka hnutchhiah chu han lak zet a, ka thlenna tur UN Mandat lam pan leh nghal deuh mai ka tum avangin ka necktie leh kawrchung pawh a ngai ngaiin ka ha rih nawk nawk a. Bus chuan dan hi tih than loh chuan direction diklo zawk lama chuan palh a awm avangin leh ka chuan sual fo tawh avangin ka fimkhur hle a, chuvangin ka zawng kual rei fu reng a ni. A tawpah ka chuanna tur nia ka hriat Bus number 5 chu chak takin ka pan phei a, ka lawn chho chiah rual hian mi pakhat hmanhmawh taka rawn chhuk hian a meitalh leh Meizial a thlauh palh a, chu chu ka rah sak ka hlauh avangin ka ding chawt mai a, a ni pawh chuan ka rah sak a hlauh avangin ka kekawr hmawrah a chelh ve bawk a. Tichuan, a chhar a, an chhuak a, bus a inkhar a, a kal ta a, ngaih tha taka ka thut lai chuan mi pakhat hian sap tawngin ka pu i wallet han check teh, a bo em? mi rawn ti a, ka han check chu a lo awm ta der lo mai a. Eheu, min ruk sak ta em ni dawn? tiin hmun hrang hrang te ka han dap kual a, ka ahna kekawr ipte veilam chu a lo ruak ta tlat mai si a, ka bing ta chum chum mai a. Bus driver ka han hrilh nghal a, english a lo la thiamlo zui nen tawng te kan han let te te a, tichuan a hrethiam nghal a, Police a phone nghal a, tichuan bus stand hmasa berah tawng lettu nen chuan kan chhuk nghal a. Rail Station lamah chuan kan kir leh ta a, mahse khua a thim tawh avang leh dar 8 lai a nih tawh avangin Police office pawh chu a lo inkhar hlawm tawh si a, tichuan city Police station kan pan ta nghal a. Rilruah ngaihtuahna a kal thui hle a, ka wallet ah hian Geneva ka cham chhunga hman tur pawisa fai ka dah a, ka credit card te, ka ATM card te, ka medical Card te, ka Bus/Tram/train card kum 2 tana ka siam te bakah thil pawimawh tam tak ka dah vek mai si a. Ka rilru a buai ru hle a ni.


Mahse, thlaphan hmel tak leh buai hmel viaua lan erawh ka duh hauh lo va. Ka buai avang leh ka phi chung avanga kawngro a sut teh chiam dawn loh avangin cool tawka awm mai chu tha ka ti ta zawk bawk nen, Police Station ah chuan ka han in report ta a, an ni chuan an lo hrethiam nghal deuh mai a, tunlai hian hetiang hi a tam a, fimkhur hle tur a sin, min lo ti ve bawk a, ka luh hma hret hian Mumbai lam Vai pahnih Wallet tibo ve tho te chu an lo awm ve bawk a, an ni pawh French thiam bik maplo an nih avangin an khawngaihthlak hle mai a. Kan han inzawt a, an ni ai chuan ka thil tihbo chu a letin a tam si a, pawi min tihpui hle a ni. Tichuan, kan thil tihbo te chu detail taka kan hrilh hnuah min register sak thlap a. Min hriatpuina lehkha te chu min pek hnuah kan chhuak leh ta a. Zan dar 9 a rik tawh avangin ka thlenna tur UN Mandat pawh an khar a hun tawh a, chanchin han hrilh turin ngaihtuahnaah a awm meuh tawh loh avangin engmah ka hrilh ta bawk si lo, ka buai ru ang reng hle a. Cheng khat pawh ka nei bawk si lo va, ka buai em em a ni. Ka bank card emaw credit card emaw te chu lo kawl ila, khawiah pawh pawisa a lak chhuah mai theih tur kha a ni si a, mahse, wallet hian a keng tel vek avangin kut bengin ka awm ta a ni.

Ka han ngaihtuah ta vang vanga, hmelhriat lah chu an vang nasa mai si a, tin, an tawng ka thiam loh avangin ka tlangnel lo hle mai bawk si a. Chutia rilru beidawng ang reng taka ka awm lai chuan ka Mobile chu ka bag chhungah a lo la awm hlauh mai chu lo niin, ka han la chhuak ta a, hmana ka hmelhriat tawh genevaa khawsa ka Zohnahthlakpui Davida number chu ka han zawnga, ka lo la nei hlauh mai pek a, ka lawm teh a sin. A hnathawh zan a nih chuan a awm dawn lo chiang khawp zan dar 9 ah phei chuan. Mahse, ka han be thei nghal a, a dam vak loh avangin leave a lo lak ni kher kher a lo ni a, chuti ni lo se zawng zan dar 12 vel thleng duty nei thin a lo ni a, vanduai tak chu ka vannei fu ta mai a. Tichuan, ka harsatna te ka hrilh hnuah ekhai, lungngai suh, ka rawn lam nghal ang che, tikhan lo awm rawh, mi rawn ti a, reilo teah kan inhmu ta a, ka lawm kher mai. Mahse, ka Credit card kha min ruk sak zingah a tel avangin rilru erawh a nuam thei lo va, bank han call mai turin a number ka lo nei si lo, a tuk zingah ka bank number te chu zawng chhuakin ka han call nghal a, min lo block sak nghal thuai a, tichuan ngaihngam tak chuan ka awm thei ta a. Meeting lah chu zing dar 9 a tan tur a nih avangin zan lam mut that vak loh nen chuan hmel a lang phuai duh kher mai. Mahse, thulh thei ka ni lova, thulh tur pawh ka ni lo va. Rilru nuam tak leh lungkham lo hmel taka awm hram hram ka tum ta zawk a.

Ka rilruah heti hian a lo lang ta a. Khawiah pawh hian mi tha an awm rualin misual pawh hi an lo awm vek mai a. Geneva phei chu khawpui muang tak leh mihring cheng te pawh hawihhawm tak mai a ni thin a, mahse, misual rukruk ching pawh an lo awm ve nual tho hi a lo ni a. Chumi khami ah lo dah ila, a bo lo tur, khatianga meitalh leh meizial a tih tlak lai khan trick a lo hai a ni awm sia, lo din lek loh tur, te ka ti a, ka ngaihtuah neuh neuh a, Sebo hnua kawngkhar an changzo ta a ni. Chutihlai chuan heti hian ka han ngaihtuah ta zawk a, tihbo tur neia kan awm te hi a lawmawm zawk a, a rutu ni lova, a ruksak nih te hi kan va nihlawh em. Ruksak duhna thinlung nei lo va kan han awm te hi kan la vannei ma nge. Ka wallet leh a chhunga awm zawng zawng ka sum te, ka cards te leh thil dangte chu ru vek mah se, ka hlawh lak tur min ruk sak thei lo va, ka nunna pawhin engmah a tuar bawk lo va, ka la vannei ma nge, Lalpa hian kan mamawh chinah chuan min veng chiang hle mai. Tiin ka ngaihtuah chhuak ta a, ka lawm ru hle mai a. Lawmthu ka sawi ta zawk a. Ka pawisa te kha thil sual tih nana hmang lo va, thil tha tih nana an lo hman zawk nan pawh lungsi takin ka tawngtai thei ta a ni. Pathian chuan engkim mai hi a relfel thin a, kan tana tha ber turin rem a ruat thin a ni. Vanduaina a awm chuan vanneihna pawh a awm thin a, chhiatna kan tawh hun a awm a, malsawmna kan dawn hun a awm bawk thin a, a thil tha leh kan duh zawng zawng te hi nei vek thin ila, siamtu kan hrechang hauh awm si lo, chhiatna kan tawh aiin malsawmna kan dawn a tam fe zawk a, chutiang bawkin kan vanduai hun aiin kan vanneih hun a tam zawk thin si a.

He Meeting ah hian Bolivia ram tan Case lian tak mai khelho a ni bawk a, an ambassador chuan mittui tla zawih zawihin report a pe a, tanpui an tul zia nasa takin a sawi a, tunah hian Bolivia ramah chuan civil war a thleng mek a, an ram hruaitu pawh UN in a ruat rih hmiah mai a ni a. Tawngtaipui an va mamawh em. An ni chauh a ni nemaw.. Khawvelah hian keini aia a let tam taka vanduai, an mihring nihna chanvo pawh hauh pha hlawl lo, thihna ruam kara khawsa mek, indo avang te, khawmual chhiat vang te, hrileng avang te leh natna hrang hrang avangin nitin mi tamtakin hreawm tuarin nunna an chan mek a, kan chenna khawvelah hian remna leh muanna bakah he khawvel hi a lo him theih nan nang leh kei hian chanvo kan nei ve a ni.

Heal The World: