Aw! Zoram Nuam, Lam Ang Ka Lo Let Leh Thuai Ang!!

Kum 10 zet chhungte kianga khawsa mumal tawh lo leh Zofate hunpui Kristmas pawh hmang ngai tawh lo val kha lam ang letin Chhawrpial Run panin van dum pawl piah lamah kan han thlawk vu vu mai chu mitthlaah "Kan Zo Tlang Ram Nuam" a lang lo thei lo va, pipute chhuahtlang hmun hrang hrang te chu rilruin a dap kual ruai mai a. Sawi mai dawna sawi hleitheih loh ang hian ngaihtuahna a kual nuaih mai a. Rilruah eng emaw mawlhtu awm ang maiin ka phi sek mai a, Zoram tlang mawi tak tak mai van chung atanga ka han hmu zet phei chu..'Aw, Tlang a zawnga tlang mawi, kan pi leh pute chhuah tlang ngei mai ka hmu leh ta e'tiin ka hmul hi a mur sung sung mai hian ka hria. Chutah hmana thlawhna tumhmun pawh awm ngai hauh lo, tlang sangpui mai rawt rualin Thlawhna tumhmun zau tak a han awm mai te chu ralkhat hriat hle tawh mah ila a takah chuan a dan a lo danglam em em mai hi a lo ni a. Ram dang Thlawhtheihna tumhmun angin ropui rih hle lo mah se, kan phu tawk chuan a tha viau a ni. Chutah chhuahkapuiah ka nu leh Lelte Driver Maduha ten min lo nghak ran mai ka han hmu phei chu lung a chhe lek lek nia mawle..Ka va lawm em.

Tichuan, harsatna hrang hrang karah tluang tak maia Zoram leilung ka han rap ta mai chu lawm avangin ka biangah mittui a luanglo chauh tak tak a, ka thinlung takin " Aw, Lalpa I hmangaihna a va hlu em" tiin lawmthu ka sawi mawlh mawlh mai a, Mi ramah chuan sawrkar hnathawktu Police te leh Airport a thawktu bakah Taxi pu thlengin an tawng kan thiam chhun te tein inthlahrung takin kan be eih thei chauh a nih laiin Zoramah erawh ka pianpui tawng ngei maia ka han be tawng zuah zuah mai phei chu a nuam ka va ti em. Zoram chhunga awm Zofate hian kan hrethiam thin lo, miramah chuan ramdangmi kan nih avangin engkim mai hi inthlahrung tak leh tih dek chunga tih a ngai thin. Mahse Khawvel ram a zawnga ram ngainatawm leh ram nuam ber Zoramah chuan kan pianpui tawng ngeiin tute pawh kan be eih thei a, Hnam dang awmchhunte te te pawh Mizotawng ngei maiin kan han be thei lehnghal phei chu kan vannei tak zet a ni. In ngaihtuah ngai ve emaw chu!

Mahni ram thleng ta chu thenrual tha te chibai buk turin an rawn leng sang sang mai a. Chhungkaw lian ve tak nafam chu keini in te takte a khawsa tan chuan kan lenglo lam a ni. Lengpuia rawn kal ve hman ta ngang lo Lelte Editor Pu Dina pawhin a car hmanga min rawn hmuah tir tho avang pawhin lawmthu sawi ka bat nasat tawh vei nen..Amah chu hman leh hmanlovin kan in lamah a rawn kal hram hram lehzel phei chu ka rilru te te in "Aw, Mizo nih hi a va nuam em" ka ti bang lo. Hun a lo kal zel a, kum 2000 vela aizawl khawpui dinhmun leh kum 2006-a aizawl khawpui dinhmun chu inthlau tak a lo ni tawh a, mihring chengte lamin a lo danglam zo ta. khawlai ka han lengkual a, hmana kawngsir khawi ilo laia tlangval rui hmel tak tak thubial laih laih thin ho kha hmuh tur an lo awm ta lo va, exercise lak avanga sek ni lem si lo va chawnban puar lian deuh deuh te kha hmuh tur an awm ta lo. Kal naran pawha kal hleithei tawh lo, kal kak tuaih tuaih thin ho te kha hmuh leh ka rilruk teh nen ka hmu hlawm ta der lo. Chu a hnekin khawpui lunlai thleng thlengin a lo fai vak mai a. Nula leh tlangval te pawh an hna avangin an phu siau siau mai ka han hmu ta zawk te kha kei aia lawm hi chu an tam bik lo tawp ang tih hial ka duh rum rum. Ka lawm tak zet a ni.

Hun a rawn inher zel a, YZTP ho dinner kilpui turin Beraw tlangah ka han thu ve vuh mai te kha min duhsaktu Pu Enga te, Pu C.Dina te chungah ka va lawm em. Chumai a ni nemaw, Smokie khawsikpui vei lai takin an tana buatsaih Chaltlang Guest House-a dinner neihpuina lehzela ka han tel ve te kha min duhsaktu Pu Dina bakah Pu Mapuia of Greyhound Finance neitute nupa chungah ka va lawm em. Keilah pek lawmthu sawi nachang ka hre ngut emaw, ka sawi pawh ka hre ta chuang lo. Ka va lawm em. Chutah Zofa hnahthlak zinga zaithiam chungchuang Pi Daduhi te, Pi Rebecca Saimawii te ho ka han hmu te kha mit a zawnga mit vannei neitu ka ni ringawt mai. Thianpa Michael M.Sailo te leh Thianpa Rammuana of Saron Veng te chu kum 6 hnuah ka vawikhat hmuh lehna an ni a, ka ngaiin an bula awm a nuam thin mang e. An ni bakah tunlai zaithiam lar ho ka han hmuh mai bakah an zai leh zel ka han ngaithla te kha beng vannei ka nei hi a ni ringawt a, sawi hleihtheih loh lawmna changtu ka ni ringawt.

Hun a rawn kal zel a, MZP hmalakna atanga ka ral hriat Pu Lalmuanawma Mathipi, Pu Dave Chhakchhuak (Journalist), Pu Muanpuia Punte(NESO Vice Chairman) leh Pu Maliana(Lecturer,Mizoram University) te nen Chaltlangah Pi Jasmin-i hova chawhlui min han kil pui zet mai phei kha chu changsang ka inti ngei mai. Pu Muanawma phei chu a hlaphuah thiam em avanga ka lo ral hriat em em mai a ni a, a taka kan han ti ti malh malh ta mai te kha changsang ka inti kher mai. Min ngai pawimawh a, min duhsakna te kha a va hlu em, ka tan chuan "the rest is History" tih mai a awl dawn khawp mai. Lu var leh sambuang varvuh ho hmuh tur an awm lo va, ka hmel ang pu, ka rilru ang pu mi ka hmuh tam zawkna Zoramah chuan kei ngei mai pawh ka tlangnel nghal thei a, ka rilrua ka vei thenkhat ka sawichhuah pawh min lo tuihnih theitu deuh vek mai thian tha ka neih avangin a hlu em em a ni. Ka vision leh ka lo dream ve thin Zoram kalsiamte ka han sawichhuak chu ka thawveng ta huai hian ka inhria.

Ka han awm rei deuh a, State dang atangin phone call ka han dawng a, enge ni tih a lai chuan Guwahati Zofest a thusawi tura sawmna a lo ni chher mai a, ka phu loh sawmna a ni tih ka hria a, lo 'Yes' mai pawh thil awllo tak a ni. Mahse ka 'No' phal bik si lo, inthlahrung takin "Guwahati-a i thlenna tur leh ei leh in pawh kan lo ngaihtuah ang" min han tih hnu phei chuan 'chhei rawh, Zofate inpumkhatna tura hmalakna a ni lawm ni, engvangin nge ka kal loh teh lul ang, ka neih ang angin ka rawn kal ve ang e" ka han ti ve ta piap mai a. A hnu lawkah Pi Daduhi'n mi rawn call veleh, i kalho ang u, keini pawh kan nufain kal kan tum a, a rawn ti veleh bawk nen, chu a chhapah kan kalna tur Car tha zet mai Kan CS Pu Haukhuma'n min han tumsak leh zel te kha kan va in ngaipawimawh tlang e aw ka ti fo thin. Hei hi a lawm mizo nih tinawmtu chu ni. Guwahati Zofest pawh tluang takin kan va tlingtla thei kha a ni a.

Hetihlai hi Youth Icon huntawng ropui lai tak a ni a, ka thiannu Mary VL Sailo zarah a hmun ngeiah ka va thlir thei thin te kha ka va vannei e aw..a thawktu Machhuangi Hnamte leh Dikteii te kha an va fel em. Live music nen ngei maia Mizo hla dik tak mai rem thin a ni te kha Live music chawisanna tha tak a va ni chiang em. Chutah hla reng reng mai Mizo hla ngat sak a han tul te kha Idea tha tak a va ni chiang em. Mizo hla hi Mizote lo chuan an sa dawn si lo, an remhriatna a hlu ma nge. Chutah thangtharte nuna lo bet fo tawh Ruihhlo laka fimkhur a lo nih theih nana Pi Lalsangzuali Sailo hla tha zet mai "Rawlthar tang fan fan" tih hla ngei mai mawi zet mai a zantin an han sa thin te kha, a va tha em. He hla ka ngaihthlak a piang hian ka hnuk a ulh tlat mai pek thin kha a ni a. Amah Pi Zualbawihi ka hriatchhuah bakah a hla thu hian ka thinlung a hneh riau pek a nih chu. Hla rohlu a va ni chiang em. LPS leh UNODC Charca te hmalakna a ropuiin a fakawm tak zet a ni. Mizoram Super Star tih ni hial se ka ti hle mai.

Hun a rawn inher zel a, hun eng emaw tichhung kan lo tum lawk tawh, Zawlbuk Group Seminar hun tur Ni 18.December pawh kan lo hnaih ta hret hret a, he seminar-a tel tur hian sawm bik kan neih avangin sawmna pek paha kawm pah zel kan duh avangin kan buai ta zak zak hle mai a, kan tum angin tlawhchhuak vek senglo mah ila, Mizorama Politician lar zual te chu kan kawm kim viau chuan kan in hria a, mimal anga kan mi ngaihsan thenkhat Pu Bualhranga pawh an inah thianpa Tetea Sailo nen kan va lenchilh a, thu tha zet zet mai kan sawihote kha thalaite tan chona a va ni chiang em. Tin, ziakmi kan neih te zinga ka mi ngaihsan Pu
Vanneihtluanga(Lengzem) pawh a office-ah thianpa Nghaka nen kan va kawm thei a, kan ngaihdan tlem a zawng kan in hrilh tawn te kha a va hlu em ve aw. Hlim takin a office kan chhuahsan hnuah Zonet lamah kan han chho leh a, kan Seminar min rawn cover sak tura kan va ngenna pawh chu lawm takin kan chhuahsan leh ta, an zarah Zawlbuk Seminar ni thlalak kalthei (video) chu en theihin Zoram mipui tan min chhawpchhuah sak kha a ni a, Pu RK. Lianzuala leh a thawhpuite chungah lawmthu sawi kan va ba nasa tak em. Zoram hmasawnna ngai pawimawhmite hi an hlu a ni. Zoram pawhin kawng dik a zawh thuai a beisei awm a. Thalaite hmakhua leh an tana ngaihtuahna thui tak seng mi ram hruaitu huaisen erawh Zoram hian a la mamawh reng niin a lang. Thangtharte khawvelah kan cheng mek a, ram hruaitu un lutuk leh thlirdan hlui tawh lutuk te hian ngaihtuahna tunlai zawk leh hawiher zau zawkte thut hmun kian ve ngam tawh se, thangtharte zingah pawh mahni pum tanghma chauh ni lo, ram leh hnam tana theih tawp chhuah mi mamawh erawh a na hle mai.