Nangma Tan Chauh

Lenna tlangte lo dangin, tuanna mualte a lo hrang zo ta. Siktuithiang dawn a, a tlum a hang eibil mai lo va, sem sem dam dam kan tih thin lai te kha hmanlai an chang zo ta. Nunhlui mual liam hnu ngaia luaithlipui nul tak ka nap hial. Aw, khuahmuna len loh zawng tawrh thiam a har thin ma nge. Hlim leh lawma kan lenlai ni te chu tawnmang mawl mai an lo chang zo ta si. Dar ang intawn leh nan lamtluang a thui lua ka ti. Chhawrhthlapui van zawla a lo eng chang te hian awmkhawhar lunglen a hril chhuak lo thei si lo, laikhum belin riahrun rem zai rel thin mah ila, zan mut chhin zai reng ka rel thei si lo, ngaihlai bang lo nang zuna uai chu thlafam chan hial ka nap thin a, hei lo liama damlai pialral awm tak maw. Aw, tawnmangah tal hmuh che ka nuam e.

A ni, mariaktea ka run riangte ka nghah chang ni te hian awmhar lunglen a zual thin a, ka perhkhuang leh zai rimawiten min hnem zo ne maw! Nang tel lo va he hringnun hmachhawn tur hian mi phal suh la, i sakhming tel lo hian dawnlungruk a kim thei mawlh si lo. Kei ka duhaisam kumtluang samang inthen lo tea i tangnem bei hun ka nghakhlel em e. Ka hlimna leh ka lawmna tikimtu, ka lungngaihna leh khawharna thawidamtu chu nang ngei hi i ni si. Hal lo tein vul reng la, thliah loh par iangin mawi kumkhua ang che. An sawi hawilopar ianga chuai ngai lo turin khuanu'n vengin awmpui che se la, chutin Zofa thang leh tharten i par tlanin khuavel kan la chhing ngei ang.

Tunah tuanna tlang lo dang rih mah se, thinlaiah i hlui thei mawlh si lo, a thar zel thin ka thinlai rila'n. Hnam dangten i sakhming selin ankanem hlan lo che mah se, kei ka tan i mawina a danglam chuang si lo. An sawi thlang sappui nun ngai bil lo va, hmangaihte lenna Zotlang mawi ni kumtluan la, Chutin, i finna leh thiamna lo pungin, par ang lo vul zel se. I tluk sual palh loh nan i kechheh uluk la, fimkhur takin kal dem dem ang che. Chutin i hrin keini Zofaleng zawngte hian daifim leh zing nichhuak zungzam iangin kan thiam, kan finna tinrenga chawm che kan nuam a. Duah tea lo thang lianin par vul zel la kan ti. A ni, kan sakruang leh thisen pawh Nangma Tan Chauh.

A Rem Si Lo

A sakruang leh kimtlanga hmangaihna bet tel tlat mai te chu sawi tel pawh a tul lem lo'ng, a mit mengmawi leh biangsum inchawih tawn zia lek fang phei chu a hmel hmu thintute chuan ANGEL an ti a nih pawhin an mawh lo ve, chu chu fakna uchuak a ni hauh dawn si lo va. Chu ai mah chuan thenrual kawm thiam tak a nihna chuan lengzawngte a tihlim a, tu hriatpui si lo hian tatu nih an phu hliah hliah vek ang a, ka chanpual lo ti mai tawk te pawh an awm ta ve ang. A ankanem thlum tak mai avang te chuan hringnun timawii lo titawk te pawh an awm mai thei e, tu hriat va ni suh.

Chutianga a rualkawm thiamna leh a hmelthatna te chu chhuanpui mai a hnekin a thiante tichapo tirtu a ni hial zawk a, a bula chen a nawm tlukin a thian nih pawh insawitheihna tham hial a tling ta ve ang. A tawnah ka luangliam lo a nih pawhin ka tuiral mai ang titu pawh Mizo tlangval zingah hian an kat nukin ka ring. A ni, Pasaltha Vanapa pawh kha la dam teh reng se, he Tuaitiri tawnah hian zawng, tui ang a nem duai ve thovin ka ring.. Chu ngei mai chu Thlang sappui Lanu an lo tih mitmeng pawl ralh mai leh bahsam buang hnap mai, han en mai chuan vantirhkoh thlah emaw tih mai tura fai nalh a ni a. A han hawi zawnga a sam buang thak mai a han invawrh phingphileng siau siau mai te chu thlunglu tihaitu a va ni teh lul em.

A sakruang leh kimtlang mawina te, a lungril leh ngaihtuahna tluangtlam tak leh a thenrual kawm thiam zia pawh kan sawi tawh a, a hmelhriat nih pawh chapopuina tham hial a tlin thu kan sawi tawh bawk e. A ni, tlangval a zawnga tlangval berhchep ve tak, hmel leh pian zia-ah nise chhuan tur nei hawt lo, mongoloid thlah tih taka hnar bang sang lo ve tak leh mitmeng zim set mai tan chuan a voh bik nih chu vawikhat dam ve manah han hnar chu har tak tur a ni ngei mai. Hei lo liama lei malsawmna enge awm chuang ti hial duh pawh an awm mai thei e. Mahse ................? A Rem Si Lo ! A ni, Thlang sappui ngai bil lova kan lenna Zotlang mawitu runlum nuthai atan chuan Zolanu ngat le...

Sateek-ah Palai

Palai han tih hian Inkhawmpui palai te, Buaina avanga inremna siamtu palai te leh Nupui/pasal chungchanga palai te hi Mizoten palai tih kan hman tlanglawn deuh te chu an ni mai awm e. Tuntumah erawh chuan nupui/pasal thua palai kal chungchang leh a kaihhnawih tlem ka han tarlang ve thung dawn a ni. Tlangval laia nupui/pasal tuahrem chungchanga palai hna han thawh chu a tlangval hna chiah lo a ni lo mai thei e. Mahse, tirh ka ni ve miau si a. In sit hle mah ila, chhungkaw aiawha tirh kan nih ve miau si chuan kan kalchhan ber "Insawirem" chu kan hmachhawn tur a ni ta mai si a.. A hmasa ber leh a vawikhatna a nih angin a khawr theih hle mai.

Hmanni ka aizawl cham chhung khan ka thianpa nauin nupui neih a tum avangin a bialnu te khua Sateek-ah palai hna thawkin tumhnih ngawt mai ka zu kal a. Aizawl to Lunglei Lamlian siala hnathawkte an lo hmanhlel lai tak a ni vei nen, Bike-in vaivut khu tak leh lungrem khawrawk tak karah chuan eng emaw ti tiin kan in khalh thleng thei hram a. Aizawl atangin darkar 1 lek emaw kal a ni na a, kawng an lo siam lai tak a nih avangin beisei aia rei kan tlan a, kan bal hle bawk a ni. Mahse, he kawng hi an siam zawh hunah chuan aizawl leh lenglei inkar kawng that dan tur te ka ngaihtuah erawh chuan a phurawm khawpin ka hria. Mipui tan chhenfakawm a la ni ngei ang. Sawrkar pawhin he kawngpui siam mek hi uluk lehzualin enkawl se la, he kawngpui hi a la pawimawh tulh tulh dawn si a.

A vawikhatnaah chuan kan hlawhtling mai lo va, a la naupang si a, B.A te han zo ve te te se la, a hrim hrimin chhungkua pawh kan lo inrawn khawm ve ang e tiin tawngkam tha tak nen chuan kan inthlah tho tak na a, kal leh chakawm em em tur chuan min mangtha chiah lo em ni chu aw ka ti rum rum a, nuber lah chuan, a reng rengin palai te chu upa deuh hlek an intir a ni ngai a, in rawn kal naupang hlawm reng reng lutuk mai, a ti fiamthu deuh bai bai bawk si nen, an mi tiam nia han kal leh pawh a chakawm lo ru riauin ka hria a. Mahni lo maha nula rim duh vei nen zankhat pawh kan ui tuk mai a ni si a. Mahse, ka thianpa hian mi ngamtlak bakah kan lo kal ve uk tawh si avangin kal nawn leh tur zingah pawh chuan min telh leh ta tho a. Tichuan a vawihnihna atan Sateek khua chu kan pan leh ta a. Kawng a khuk thin em avangin Motor nen kan kal a, ka la rui zui lehnghal a. Luhai burin Sateek kan thleng thei a. Fiamthu-in kei chu ka um chanve der mai a nih hi mawle, ka ti a.. kan nui dar dar a.

Chhungkua an lo inrawn khawm tawh bawk a, tunah chuan kan nih nih kan ni thei tawh ang chu kan ti a. Ka motor rui luhai bur mai tihreh nan ni pah fawmin thlifim hip pahin i chhuak lawk teh ang tiin ka thianpa nen chuan engmah sawi set set lo chuan kan va chhuak lawk ang e, kan ti a. Kan chhuahsan a. Kan kal zel a, Sateek Presbyterian Biak In kawt lamah kal zelin hmanlai Seteek Lal ni thin Lianphunga Bung awmna te chu kan hnaih ta hle mai a. He Bung hi Mizorama Bung lian ber a ni nghe nghe. Mahse, kan va pawh hman ta chiah lo va, a tawpni te a ni tawh bawk a tiin Ar lei tur kan zawng pah fawm a. An zawrhna kan hre mai si lo va, intin kan zawt kual a ni ber mai. In pakhatah chuan Ar an lo ngah khawp mai a.. an lo chhangchhe hle mai bawk si a.. fiamthuin fa in neih leh hun chu a hmingah "Artluangi" phuah nghe nghe teh u, ka tifiam a, kan nui bawrh bawrh hlawm a, kan duh anga lian tha tak mai Arpa kan lei sak a.. kan khai chho a, kalkawnga naupang tualchai ho han hmuh te chuan lung a tihleng duh hle mai. Kawng sira Arnu leh arpa han inchhai khat khat hmuh ngat phei chuan naupang lai min tingai zual fo thin, tichuan Ar chu talhin ka puah te te a, kan hlim tlang ta viau a.

Tichuan, kan kalchhan ber thutawp sawiho pawh chu Arsa chhum lai tak hian kan tan ta a. Rin aiin an lo inhawng a, kan beisei aiin an nem ta bawk nen, kan duh ang ngei chu min tihhlawhtlin sak an intiam ta a, a ni erawh kan ruat nghal ta mai thei lo na a, a thu chuan kan insawifel thei ta a.. ka phawk a chhuak pek a, fiamthu ka thawh ta zel a, kan nui deuh dar dar reng a, tlai lam dar 6 vela hawn tum kha dar 8 velah pawh kan la hawng hlei thei ta lo va, aizawl lama nula rim pawh chu kan thulh ta bawk a.. fiamthu karah thutak deuh pawlh chang a awm a, Power(Electricity) pawimawh zia te leh Aizawl leh Thingtlang inkarah danglamna lian tak ei leh bar bakah nunphung leh zirna thlenga hmanraw pawimawh tak a nih tur thu te pawh ka sawi a, intodelhna hmanraw tha tak chu electric hnianghnar neih zet a tul thu te pawh ka sawi a, an Amen viau chuan ka hria. Tin, mi dilchhut tak mai ka lo ni vei nen, an pitar ber kum 90 mi vel chu hmanlai thil ka zawt a, Sateek tih hming a lo put dan te, an khaw thenawm Aibawk khua a lo pian dan te leh MNF ramhnuai mut laia Sateek khaw mipui tawrh dan te bakah Sateek khawpum mai a kang fai vek dan te ka zawt a. Tin, hmanlaia an lal te chanchin phei chu lehkhabuah kan lo chhiar nel nual tawh bawka, a ngaihnawmin a hunlai chuan an lo tuar nasa ngei mai.

A tlangpuiin MNF ramhnuai hunlaia Thingtlang mipuiten an tawrhna zozai kha theihnghilh mai chi niin a lang lo va.. thi leh dam kara an awmdan te mit ngeia hmutute han kawm chu rilruah Capt. Thanghleia te, Capt. Thangrehlova te leh Capt. Lalthana Sailo te an rawn lang lo thei lo va. An hmuh phak tawh leh hriat thiam dan tawka Mizo hnam leh Mizoram chhan tuma an lo inpekna thuk zia te chu rilruah a thar fo thin. Palai hna kal e ti lo chuan Politic thuthlung nen a hmawr kan bawk ta zawk niin ka hria..:)

Nang Chauh

Van thengreng leh boruakah te, tuifinriat leh khawmual zau takah te hian hahchawlh theihna a awm lawm ni tiin nun chawlh hahdamna zawngin kan phiruai thin. A ni, he hringnunah hian thawhrimna leh lungngaihna chauh lo chu hringfate hian chanvo kan va nei chau em. Kan dam that lai hunte chu hlobet par ang chauh leh ni lo chhuaka tla leh mai thin ang chauh a ni si. Thlakhlelh nei nia kan inhriatna lai tak hi kan hlim lai tak a ni lek fang a, kan hlim kumhlun dawn emaw kan tih laiin he leia hmu leh tawh hauh lo tura inthen a tul leh si thin nen, khawiah hian nge kan duhthusam leh hlimna tluantling chu kan hmuh tak ang le, tia inngaihtuah lungpuam mai a awl thin. Mahse, kan beidawn hnu pawha kan beiseina nung awmchhun "Nang Chauh hi i ni Aw, Lalpa" titheitu apiang mai hi a kutchakin a chelh a, muanna leh hlimna thuruk a pe thin.


Kan mit hian khua a hmu thei lo a ni thei e, mahse kan bengin rimawi tinreng a hre thei ang. Kan beng pawh lo ngawng se, kan mit erawh chuan khaw eng mawi tak a hmu thei ngei ang. Kan kut leh ke te chu a piangsual a ni thei e, mahse kan thlarau chawlh hahdamna tur erawh min ngaihzual tirtu a ni a, natna khirh tak veiin thi thei reng dinhmunah pawh ding ila, kan thlarau leh kan taksa neitu angchhunga chawl tur kan nih avangin nghakhlel taka min thlir tirtu a ni thei tiin Lal Isua neitute chuan harsatna hrang hrang lakah pawh lawm takin an nihna an pawm thei mai thin. Joba chu a neih zawng zawng laksakin, a nupui leh fanau zawng zawngten an thihsan hnuah pawh a siamtu chuan a kalsan lo va, amahah a nung reng a ni tih a hriatin a vui lo va, a thlaphang hek lo. A nunah he lei taksa veivuta siam hi veivutah a kir leh ang a, a thlarau erawh a siamtu hnenah a chawl dawn a ni tih a hriatin hlim takin "Saruakin ka lo piang, saruak vekin ka kir leh dawn, mahse ka mamawh Lalpa ka neih avangin tunah hian ka lawm a ni" a tithei tlat zu nia.


Mizo nu zinga kan hriat hlawh tak tur Pi Lalsangzuali chu hun a hmangaih em em a fapa'n a thihsan thut a, hun rei vak lo hnuah, natna khirh takin a tlakbuak veleh ta bawk a, a mitin khua a hmu thei lo va, a lu a hai a, a chau a, daktawrte an beidawng tih a hria. Mahse, chu a natna khirh tak chu hnuchhawnin a siamtu hnenah a kir dawn ta tih a hria a, a hmangaih leh a thlakhlelh ngawih ngawih a pasal leh fanaute zinga awm reng thei a ni lo tih a hriat tlat avangin a rilruah a belh Pathian hnenah chuan hetiang hian a chham thei tlat zu nia. He hla hi a hla phuah hnuhnung ber a lo ni ta bawk. (A hnuaia music video hi)


KA DUH BER LALPA,
by: Lalsangzuali Sailo (L)

Hei leh chen kum tam min hruaitu,
Ka Lalpa, ka tan i va tha em,
Malsawm tinreng ka chhiar seng lo,
Hlim leh lawmna, chatuan nun nen,

I tel lo chuanin, mitkhap kar pawh ka nung zo lo,
Ka chau leh thin, nang chauh i ni, ka duh ber leh,
Chatuan thlenga ka belh tur chu.

Ka chhingmit khua fiah lo mah se,
Thlarau mitin a fiah chhandamtu,
Ka vui lo ve, engpawh thleng se,
Chatuan Van khawvar min hruai thleng ang.

Ka hahchawlhna leh thlamuanna,
Innghahna beisei dang ka nei lo,
Ka pumin nei rawh, ka inhlan e,
I angchhung muanna ka rawn pan e.

Ka Nghilh Lo'ng Che!

Maltinsawmtu chung Pathian kaihhruaina vang liau liau ka ti lo thei lo. Thangvansangah mupui lian ang mai a, thlawhtheihna chhunga ka awm lai kha chuan ka hmangaih Zoram leh a chhunga Zofate reng lo chu ka rilruah engdang a lang lo. Ka suangtuahna ram chu tluang takin nikhat chhung lekin ka thleng ang a, thenrual tha leh chhungte hmel hmuh ngawt pawh chu he lei malsawmna ropui berte zinga mi a ni si a, tia ka ngaihtuah neuh neuh lai kha chuan, tuipui ral lama ka let leh hun tur reng ka ngaihtuah pha meuh lo nia. Mahse, vengtu chung lam enkawl avang bawkin "lam ang ka lo let ang dawn nia" tiin Zoram nuam chu ka mangtha leh ta rih a ni.

Ka hawn dawn tuka kan thenawm khawvengte bakah, kan unau thenkhatte an rawn leng khawm a, min thlah tuma rawn kal tih hriat fahranin keimah ang bawkin hlim hmel an pu bik hauh lo va, kan nguai deuh bar vek niin ka hria. Chuta ka rilrua lo lang ta chu.. P.S Chawngthu-a hla "Samang then ni te zawng, lo her chhuak leh thin e, a mi leng tawnah hian, tuar dan hril thiam awm maw? tih hla chu ka rilruah a lang lian hle mai a. Tum dang ang lo tak maiin ka lung a leng ru riau mai a. Kolkata to Aizawl ticket ka lak lai vela ka hlim nen..ka ti vang vang mai a. Lung a hnur a ni ber e. Mahse, he khawvelah hian awmkhawm tel tel reng thei kan nih miau si lo. Intawhkhawm hun a lo awm ang bawkin, inthen hun pawh a la thleng ngei dawn si a. Kan hmachhawn mek inthen hun aiin he lei ram kan then hun zawka ngaihtuah phei chuan kan la vannei hle zawk ni te pawhin a lang.

Zoram ka cham lai hian ka tih tur ka tih si loh, ka tih loh tur ka tih tak sawi tur a awm nual a, tin fuihna chihrang hrang inang lo tak tak ka dawng a, thlan thiam pawh a har hle a ni. Tin, sawrkar thar a lo piang ta fam chu ram hmasawnna kawngah pawh beiseina sang tak ka nei thar ve a. Chutiang lam hawi deuh te pawh chuan ka ngaihdan leh duhdan vawi duai lo ka sawi chhuak ve a, ka thaw huai pawhin ka inhria. a hlawhtlin leh tlin loh lam erawh mawhphurtute koa a innghat a, hunin a la hril ngei bawkin ka ring.

Chetchhiatna lam erawh sawi rih lo ila, a la rei lo deuh lulai a, a la zahthlak pha tlat mai a. Tunah rih chuan Zoram leh a chhunga cheng Zofate ka chunga an thatna leh hawihhawmna te kha ka ngai a, Aw, Zoram nuam, engtik lai mahin "Ka Nghilh Lo'ng Che" tih hi ka sawi theih hmasa ber ni rih mai se.

SIKNI ENG

December thla kan chuankai meuh chuan thing tin par a mawi thin e tiru. Va tinreng ten partin zu an dawn a, an lenlaini an chen thin. Van boruak thiang tak karah si meikhu leh romei khu zam raih te khian boruak dangdai hun lawmawm a entir a. A ni, chhumzingin thlapui eng mawi tak mai a khuh no paw riai mai a, Thlapui chuan chhumzing chu achhun eng paw riai mai bawk a, heng thil pahnihte hi han thlir vang vang pawh hian a inhmeh zia leh a inchawih mawi tawn zia a lang a ni. Heng te hian Siamtu khuarel famkimzia leh ropuizia a puangchhuak chiang thin. Tlangsam a han par vul chuk tawh phei chuan Lal piancham hun lawmawm hi kan rilruah a lang lo thei lo thin a nih hi. Chungtiang bawkin pardang te pawh hian lung an dum a, Thinlai an hnem thin. Han hawi vel ila, masi parmawi tinreng mai a han vul chuk tawh chuan lunghlui a lenga, tu emaw ngaih em em sawi tur awm chuang hauh si lo hian, lung hi a leng veng veng mai a ni. Heng bar thla par te hian Kristmas rim an ti nam vek mai. Thingtlangah chuan Masi rim a nam ta, kan ti thin a nih kha.

Zokhaw lam atanga tu leh fate chak dap a, khawpui lam rawn pan duah duah mai te leh, naupang lawm leisak theilo nu leh pa nih hreawm zia hria ang mai a theihtawpa thlan fara hnathawkpa tih hriat ngawih ngawih leh kumpuilingleta fefap khawpa hnathawkpa hmelpu ngawih ngawih ten an fate tana an theih tawp a tha leh mawi thawmhnaw leh balloon cheimawi rawng chi hrang hrang tial vel te an han lei hawng sup sup thin phei chuan lunglamah engemaw mawlhtu awm ang hrimin thinlai a fan chhuak thin, hengte avang ngawt pawh hian Mizo Kristiante tan a siam ang hrimin masi hi a hlu bik riau a ngaih theih a ni awm e. A ni, thingtlang leh hmun hrang hrang atanga mahni khaw lam pan a bawr fahran maia inkhai thliah thliah chunga an han in seng sang sang mai han hmuh te hian SIKNI ENG hlutzia a hriat theih a. Bazar leh a chhehvela thil zuar ten Christmas sale tia an authawm ri te chuan boruak a siam a, a ti masi a ni. khawvawt lam hret si, mahse la vawt chhe lutuklo leh inchei nuam tawk leka boruak nuam chuan SIKNI ENG huntawng nawmzia a tichiang a ni.

Ram hla a u leh nauten chhungkaw kima Lal pianchampha lawm nan tiin hmuntin hmuntang atangin mahni khua leh tui ngei kan pan dem dem a, chhungkaw kim taka he hun lawmawm hi hman theuh kan duh thin a ni. Theihnise, tute pawh hian mahni vangkhuaah ngei lawi tura pan vek kan nuam awm e. Chhungkaw rual leh neinung deuhte phei chuan program mumal tak an duang leh ngei ang a, awmni khamin ran pui te talhin ruai ropui tak an kil ho leh ngei dawn si a. Heng te hi tunah chuan kan nunphung pangngai a ni tawh a, kan tihdan pangngaiah kan neih tawh a ni ber. Kan awihlai puan ang hnawlin kan in saseng dem dem thin a, chu mai a ni lo, he hun lawmawm hian mitin te rilru a ti phawklek a, nula leh tlangval ten chance tha tak an neih chu pumpelh tum hauh lova party leh picnic program an siam te chuan hun dangdai Lalpiancham hun lawmawm SIKNI ENG lo in herchhuak ropui zia a tichiang leh zual a ni. Chhungkaw tin kan phusa sang sanga, chhungkim takin ruai kan han theh thin te kha a va lo hlu em tiru. Chumai a ni lo intihhlimna hrang hrang hmangin awm ni kan kham thin hi kei chuan Lalpa malsawmna kan dawn liau liau ah ka ngai e. Naupang deuh ten thleng kan dawh thin a, Masi-pa in kan dil apiang zanah min lo thlak saka, zing khawvar hun kan nghakhlel em em thin a nih kha. Heng hun te hi naupang tan chuan a hlu a, a hlimawm a, kan naupan laia Masi kan nghahhlelh chhan pakhat a nih thin kha maw.

Chuan le! Urlawk zan kan hnaih ta deuh deuh va, hla dang a lang thei ta lo, “kum sul liam hnu kan nun ngaih lai tho leh thin, Remna Lal pian hun champha hmatianga kan thlir, SIKNI ENG mawi leh zan boruak thiang leng vel, ngaih lai tizual tur reng an maw”! Tih hla te hi mitin te thinlung luah khattu a ni ta tlat mai a, he hla tel lo hian Masi a kim tlat lo. kei zawng mittui nena ka lo chham ve fo a ni tlat. Chutah, “Kumpui sul a lo vei chang hian lunglen a tho leh thin, ngai lo leh lawm lo reng hi awm thei lo, kan ngaih Kristmas ni eng a lo zam thar leh ta” tih te chuan thinlung a ti phawklek a, mi a vel a ni ber e. kei zawng mittui tla zawih zawiha ka sak loh theih loh hla mawi a ni tlat a sin. “pawmlai nei leh lusun fate chantawk hi dawn ve teh, hnutiang mual liam hnu ngaiin an tap e. Par ang an lawm hnu, he ni ropui lo thlen hian, chhungkim dar ang lenlai kha ngai zualin, tapin luaithlipui an nul ngei ang” tih te phei chu a thu a tha mai pawh a ni lova, a thluk hian lung a kuai hrim hrim tawh a ni. Hmanlai deuh chuan tunlai ang hian Masi hla kan la ngah lo va, Music a ngaihtlak theih phei chu Pi Lalsangzuali Sailo kha a ni deuh mai a. Zanlai muttui lai tak maia ri riai riai lo lang thin pawh “ A chungnung bera chungnung, chung nung ber Lal ropui leiah hian kumkhuain rem leng se Haleiluiah” tih te “Kumhlui thlahna”Kum hlui aw¨ding rih rawh, zamual chu liam mai lo la” tih te khan lung a ti leng veng venga, tu ngaih sawi tur hre hauh si lo khan, mitinte thinlai a thawng vawng vawng thin a nih kha. Heng te hi Zofate thinlai luahtu hla mawi a ni a, kan thinlai hnemtu ani. Keizawng he hunah kher hi chuan hla dang a lang thei mawlh lo.

Kum a lo liam zel a, hmana nula tlangval thin kha an tlangval nula reng lo va, hmana putar leh pitarte kha an tar reng lo. Hnah hlui a til a, hnah tharin a thlak leh thin. Aw! hringnun hi han dawn ve vang vang mah te u! kan vul lai ni hi a rei lo lua teh a sin. Kan hringnun par vul lai hi a tawi mang e, kan dam chhung te chu ni thawnthu angin a tawp thin. Keizawng heng kan hun tawng ropui Masi hunah tal hi chuan lenrual kim taka lung duh te nen nuihiau par tlan ka nap thin. Thuro iangin thla nei teh reng ila, Kan Zotlang ram nuam, han fan del del ka nuam a, siktuithiang dawna lenrualte nen tualchai ka nuam thin. Kan hun leh ni te hian min nghak mawlh si lova, kum a liam a nga, hai ang tarin mual kan la liam tho tho dawn si. Tute mah hi kumhlun tur reng kan awm lo. pakhat temah kan awm lo. A ni, Kei chuan he hringnun hi hlim taka hman lian ka duh a, Lal pianchampha te hi chhungkaw kima len rual te nen hlim taka hman ho dial dial ka thlahlel fo. Mahse Nang leh kei hi kan duhthusam ang ngawtin kan awm thei lo a nih hi. He hun lawmawm Kristmas lo thlen apianga ka hriat chhuah lo theih loh thil a awm. Chu chu hmangaih taka min enkawltu, Naupang mai ka nih lai pawha Hnam rilru min lo tuh saktu ka zuapa a ni e. A lei hringnun lo chawlin he leiah hian hmu dawn tawh lo mah ila, nghilhni reng ka nei thei si lo. Aw, SIKNI ENG lo herchhuak e, mahse Nang ngaih a zual leh si thin. Zuapa! thlafam vangkhua lawi mai lo ni la, keini I hrailengte lawm a kim tur. He SIKNI ENG hian I hlimthla kan chantawk min ngaih tira, kan thinlai muhnu a kai tho leh thin. Aw, Nang nghilhni kan nei long che. Tia chham mai loh chu tih theih dang reng ka nei si lo.

Zofaten kumpuilingleta Tlumtea thlira kan lo thlir leh nghahfak ber kristmas leh kumthar boruak hi kan huntawng ropui ber a ni a, ngai lo leh lawm lo tunge awm thei ang? Masi hla sak tawh phei chuan lung lam a kuai a, thinlai a thawng dawt dawt mai thin a nih hi. Remna Lal hian thinlai hnem mawlh teh se. Mitin ta tur chanchintha Lal Krista lo piang kha, lawm turin Khawchhak mifingte chuan an neih ro thil hlu te kengin Bethlehem dai an pan a, Ran thleng tlawm taka nausen piang chu chibai bukin an thil hlu te an hlan a ni. Chu nausen chu khawvel chhamdamtu a ni tih an chianga, an zahzia lantir nan chibai zahawm an buk a ni. A ni, Vawiin niah hian keini Lal Isua hnung zuitute hian enge neih ro thil hlu kan neih ve le? Sum tam tak kan nei lo a ni thei e, beraw leh mora te phei chu kan nei ve kher lovang. Rangkachak leh lunghlu pawh kan nei kher lo thei. Mahse, kha nausen kha engkim titheitu a lo ni a, a ni chuan amah ringtute a thlahthlam ngai lo va, a veng reng thin a ni. Chutihlaiin kan neih ro thil hlu a phut ve tlat mai pakhat a awm; Chu chu kan thinlung a ni. Bethlehem khua ran thlenga nau lo piang Lal Krista hi a tlawm lua ma nge tiru, khawvel hian Lei leh Van Lal a nih hria se a va piang ropui dawn em. Hawh u, keini a chhandam fate chuan kan thinglungte ama hnenah hlan tharin, chibai zahawm buk turin i inbuatsaih ang u hmiang.

Pu KC.Lalvunga(L) phuah 'SIKNI ENG' Daduhi sak hian ka lung min len fo:


Late, Lalsangzuali Sailo, Krismas hla(Remna Lal a piang):

Beiseina Nung Nen

Ka suangtuahna vak vel chu a phi ruai mai a, ka ngaihtuahna chuan hla tak a thlir a, mita hmuh theih si loh a chu, ka thinlungrilah erawh a lang chiang hle si. Rilru mumal pawh pu hleithei lo va, ka suangtuahna riang tak vahvaih lai chuan, he ka taksa hi ka hnuchhawn ta emaw tih mai turin ka sakruang chuan awmzia a nei tam lo va, a hahchawl a nih chiah loh pawhin a muhil a ni ta ve ang. A ni, mawlhtu eng emaw chuan mi tiharh tlat mai a, muttuina leh dawihlo dangten awmzia an nei lah lo. Chutianga BEISEINA Nung nei a ka awm lai chuan, ngaiteh, i puanven sawichhing la, harh ta che, engah nge i thlaphan a, i rilru i tihhah mai le.., rawn ti chiah mah suh se, ka chhia leh tha hriatna mawlmang tak chuan mi sawi harh a, mutmu pawh tuah hleithei lo va awm, kei a riang vala chu ben harhin ka awm ta a ni ber e. Chu chu hringmite min sawiharhtu darthlalang a ni a, ben harh zawh loh nih chu khawvela thil hlauhawm ber a lo ni thin si a.


A ni, he kan Zoram khawvarna lamtluangah hian beiseina nung chu a la bet ve tlat a. Natna khirh tak veiin, harsatna hrang hrang karah chaurau ek thai hial mah se, Zonu chhulchhuak Zofate tana RAM BIK a nih miau avangin, chu Zoram insiksawi hun chuan ka thinlungah hmun pawimawh ber a luah lo thei si lo. AW, Rorelna fel leh dik changchawi a enkawltu mamawh em em kan ram riangte khian chhanchhuaktu a ngai a, a rum vawng vawng mai a lo ni e. Hruaitu hlemhle takten hun lo kal zel tur thlirlawk a, Zoram tana hmathlir thui tak nena ram an hruai loh avangin kan 'Zan Ar Khawthim Dai Kal' a nih ber hi. Dikna leh Mawihawihnate chu kan vui mek a, a thei thei, a chak chak, a huai huaite lalna RAM-ah kan chantir a ni ringawt tawh a nih ber hi le. Zoram tana pa nih tling, hruaitu arsi engmawi, mahni aia ram dah chungnung zawk, hun lo kal zel tur thlira thangtharte hmakhaw ngaimi leh fefap khawpa ram tana hnathawkmi te tan hmun siam sakin, chu mi ngei chuan he Zoram hi han tuai hriam se ka va ti thin em.


Aw Zoram, tluchhe mai tur atan kan phal lo che a, tho la, ding ta che!..Baal hmaa thingthi ve ngai lo dawiburten an dawt at zawh loh darfeng valrual a za tel i tan kan la awm e, lungphang suh la, zam hek suh ang che. I tan chhuihthangval rualten suihlung rualin phaikhai kan vawr za ang a, i hliam te chu thawi dama awmin, mawina nena thuam i la lo ni chek ang. Chutin i chhungah Chhinlung chhuak Zofa hnahthlakte suihlungrualin halloten sirtiang kan sawn za tawh ang a. Chu hun chu thlira beidawng lo, Zofa Lanu/Valrualte "BEISEINA NUNG" hi lo thamral mai lo se.