Sunday 17 October 2010

Thlirna Tarmit

He khawvela mi vannei berte chu chantawka lungawite hi an ni mai awm e. Psychologist-te chuan mihringzia hi Introvert leh Extrovert tiin an thenhrang phawk a. Introvert-te chu mi inthlahrung thei tak, mi zakzum, tawng tam lo, mi insum thei leh mi khirhkhiap takte hi an ni a. Tin, mahni mawhphurhna hlen zo tak, mi uikawm tak, engkim felfai taka tithlap thlap mi an ni. Extrovert-te ve thung chu mi inthlahdah ve tak, thusawi tur pawh ngaihtuah hmasa lem lo va tawng chhuak phawng phawng, mi rilru tur pawh dawn hmasa lem chuang lo, mi sawisel leh hauh pawh pawisa lem chuang lo, mi thil phal tak, awlsam taka thian siam zung zung thei mite hi an ni thung. Kan seilenna inchhung emaw min enkawltu kan nu leh pa emaw, Sikula kan zirtirtute emaw atanga kan zirchhuah a zirin heng kan han tarlan tak te hi eng emaw chen chu neih kawp theih a awm thei bawk. Hmel tih loh zia leh nungchang chu thlak theih tak a ni, an lo ti a. Heng Introvert leh Extrovert type atang hian keimahni nun leh ziaah a inbuk tawk kan thiam pawh thil tul tak a ni.

Chhungkua thlah khat vek pawh kan zia a inang lo fo. Phir unau pawh ze hrang daih an awm thin. Chuvangin kan mizia chu thuhmun vek lo va duan kan lo ni. Nupa ze inang lutuk chuan buaina an ngah tam bik fo. Uikawm nupa lutuk, tawng tlem tak ve ve, midang pawh tlawhpawh lem chuang lo nupa ngat phei chu neinung viau mah se, kan awt kher awm lo ve. Chutihrualin nupa thil phal lutuk, thiante tan reng renga hun pe nupa, mahni chhungkaw tan pawha thahnemngaihna nei lem chuang lo nupa tan chuan hmasawn a har hle thung ang.

Chhungkua reng rengah uikawm deuh te, thil phal deuh te, zaidam deuh te, thinchhe deuh te, tawng tlem deuh te, tawng tam deuh te, taima deuh te, thatchhe deuh te etc.. kan awm khawm a, kan ze hrang hrangte a tulna hmun leh hun a zira kan hman tangkai chiah khan chhungkaw nuam a siam thin a ni. Bai tui tak siam tur chuan a bawlhlote a tawka kan pawlh thiam a tul thin. A al lutuk emaw a dak lutuk emaw chuan eitu a nei lo mai thin ang hian heng ze hrang hrangte hi a hmun leh hun a zira kan pawlh thiam a tul.

Awle kan thupuiah lut tawh ila, khawvela mi vannei berte chu mi lungawi theite hi an ni, kan tih tawh ang khan, kan mize hrang hrangte atanga kan chanpual siamtu min duansakah hian lungawi phawt mai ila, hmeltha kan hriat theihna chu hmelchhiate avang chauh a ni a, thil tha kan hriat hran theihna chu thilchhia a awm vang chauh a ni.

Kan awmna tur, kan hna leh nihnaah hian lungawina famkim hmuh harsa kan ti fo thin, mahse i awmna tura Pathian ruatsak che kha i pawm thiam phawt chuan mi vannei ber i ni thei tho. Chuvangin engkim mai hi kan thlirdan a zirin a thim hle thei a, a eng hle thei bawk tihna a ni. He khawvel hi eng tarmit rawngin nge kan thlir? tih hi kan inzawh fo atan a tha ngawt mai. General ropui Nepoleans chuan " ka dam chhung hian niruk lek pawh hlim taka awmlai ka neih ka hre ngai lo" a tih laiin Midel Hollen ve thung chuan "Hringnun hi a va mawiin a va nuam em" a ti thei thung tlat zu nia. Thil reng reng hi a inbuktawk kan hriat a, kan chawhpawlh thiam phawt chuan chhungkuaah pawh, mimal nunah pawh lungawi taka awm thei kan ni. Chutiang mite chu mi vannei berte an ni si a.